ଡମାସ୍କସ୍,୯ା୧୨: ମାତ୍ର ୩ ଦିନ ଭିତରେ ସିରିଆର ବିଦ୍ରୋହୀ ଫାଇଟର୍ସ ଗୋଟିଏ ପରେ ଗୋଟିଏ ସହର ଦଖଲ କରି ବଶର ଅଲ୍-ଅସାଦ୍ ସାମ୍ରାଜ୍ୟର ପତନ ଘଟାଇବାରେ ସଫଳ ହେଲେ। ଏହାର ଶ୍ରେୟ ସିରିଆର ସବୁଠୁ ଶକ୍ତିଶାଳୀ ସଶସ୍ତ୍ର ବିରୋଧୀ ହୟାତ୍ ତହରିର ଅଲ୍-ଶାମ (ଏଚ୍ଟିଏସ୍) ଗ୍ରୁପ୍ ମୁଖ୍ୟ ଅବୁ ମହମ୍ମଦ ଅଲ୍-ଜୁଲାନିଙ୍କୁ ଦିଆଯାଉଛି। ସମ୍ଭବତଃ ତାଙ୍କର ବଢ଼ିଚାଲିଥିବା ସମ୍ମାନକୁ ଦୋହଲାଇବା ପାଇଁ ଅନ୍-ଲାଇନ୍ରେ ଏକ ଫଟୋ ପ୍ରସାର କରାଯାଇଛି, ଯହିଁରେ ରୁଷୀୟ ଷ୍ଟ୍ରାଇକ୍ରେ ଅଲ୍-ଜୁଲାନି ନିହତ ହୋଇଥିବା ଦର୍ଶାଯାଇଛି। ତେବେ ଏହା ଏକ ଜାଲ୍ ଫଟୋ ବୋଲି ଅନେକ ଗଣମାଧ୍ୟମ ସ୍ପଷ୍ଟ କରିଛନ୍ତି। ବିଦ୍ରୋହୀଙ୍କ ସିରିଆ ଦଖଲ ଅଭିଯାନ ସଫଳ ହେବା ପରେ ଅଲ୍-ଜୁଲାନି ଏବେ ଚର୍ଚ୍ଚାରେ।
ପ୍ରତିଷ୍ଠାତା ଭାବେ ଅଲ୍-ଜୁଲାନି ସିରିଆକୁ ଏକ ଇସ୍ଲାମିକ୍ ସାଧାରଣତନ୍ତ୍ରରେ ପରିଣତ କରିବା ଲକ୍ଷ୍ୟରେ ପ୍ରାୟ ୧ ଦଶନ୍ଧି ଧରି ଅନ୍ୟ ସଶସ୍ତ୍ର ବଳଗୁଡ଼ିକଠାରୁ ନିଜକୁ ଦୂରେଇ ରଖିଥିବା ଦାବି କରିଛନ୍ତି। ୨୦୧୧ରେ ଆରବ ବିପ୍ଳବ ମୁଣ୍ଡ ଟେକିଥିବାବେଳେ ୨୦୧୬ ପରଠୁ ସେ ନିଜକୁ ଓ ନିଜ ଗୋଷ୍ଠୀକୁ ଅଲ୍-ଅସାଦ୍ ମୁକ୍ତ ସିରିଆର ଏକ ବିଶ୍ୱସନୀୟ ତତ୍ତ୍ୱାବଧାରକ ଭାବେ ଉପସ୍ଥାପିତ କରିଆସିଛନ୍ତି। ୨୦୧୭ରେ ଏଚ୍ଟିଏସ୍ ସିରିଆନ୍ ସଲଭାଶନ୍ ସରକାର ଜରିଆରେ ଇଡିଲିବ୍ ଗଭର୍ନରେଟ୍ ପ୍ରତିଷ୍ଠା କରି ଏହାର ପରିଚାଳନା ଆରମ୍ଭ କରିଥିଲା। ଲୋକଙ୍କୁ ସେବା, ଶିକ୍ଷା, ସ୍ବାସ୍ଥ୍ୟସେବା, ନ୍ୟାୟପାଳିକା ଓ ଭିତ୍ତିଭୂମି ଯୋଗାଇଦେବା ଏବଂ ଆର୍ଥିକ ପରିଚାଳନା ତଥା ସହାୟତା ପ୍ରଦାନ କରିଆସିଥିଲା ବୋଲି ସ୍ବାଧୀନ ସାମ୍ବାଦିକତା ସଂସ୍ଥା ସିରିଆ ଡାଇରେକ୍ଟରେ ରିପୋର୍ଟ ପ୍ରକାଶ ପାଇଛି।
ଅଲ୍-ଜୁଲାନିଙ୍କ ମୂଳନାମ ଅହମେଦ ହୁସେନ ଅଲ୍-ଶାରା। ସାଉଦି ଆରବର ରିୟାଧରେ ତାଙ୍କ ବାପା ଜଣେ ପେଟ୍ରୋଲିୟମ୍ ଇଞ୍ଜିନିୟର ଭାବେ କାର୍ଯ୍ୟ କରୁଥିବାବେଳେ ସେ ୧୯୮୨ରେ ସେଠାରେ ଜନ୍ମ ଗ୍ରହଣ କରିଥିଲେ। ଅଲ୍-ଜୁଲାନିଙ୍କ ପରିବାର ୧୯୮୯ରେ ସିରିଆକୁ ଚାଲିଆସି ଡମାସ୍କସ୍ରେ ବସବାସ କଲେ। ୨୦୦୩ରେ ଅଲ୍-ଜୁଲାନି ଇରାକ୍ ଯାଇ ଅଲ୍-କାଏଦାରେ ସାମିଲ ହେବା ସହ ଆମେରିକାର ଆକ୍ରମଣକୁ ପ୍ରତିରୋଧ କରିଥିଲେ। ୨୦୦୬ରେ ଆମେରିକା ତାଙ୍କୁ ଗିରଫ କରି ୫ ବର୍ଷ ଜେଲରେ ରଖିଥିଲା। ଅଲ୍-ଜୁଲାନିଙ୍କୁ ପରବର୍ତ୍ତୀ ସମୟରେ ସିରିଆରେ ଅଲ୍-କାଏଦାର ଶାଖା ପ୍ରତିଷ୍ଠା ଦାୟିତ୍ୱ ଦିଆଯାଇଥିଲା। ଅଲ୍-ନୁସ୍ରା ଫ୍ରଣ୍ଟ ପ୍ରତିଷ୍ଠା ହେବା ପରେ ଏହା ଇଡ୍ଲିବ୍ ଭଳି ବିରୋଧୀଙ୍କ ପ୍ରଭାବ ଥିବା ସହରଗୁଡ଼ିକରେ ନିଜ ପ୍ରଭାବ ବିସ୍ତାର କରିଥିଲା। ଏପରି କି ସେ ଇସ୍ଲାମିକ୍ ଷ୍ଟେଟ୍ (ଆଇଏସ୍)ର ତତ୍କାଳୀନ ମୁଖ୍ୟ ଅବୁ ବକ୍ର ଅଲ-ବାଗ୍ଦାଦୀଙ୍କ ସହ ସମ୍ପର୍କ ରଖିଥିଲେ। ୨୦୧୩ରେ ଅଲ୍-ବାଗ୍ଦାଦୀ ଅଲ୍-କାଏଦା ସହ ସମ୍ପର୍କ ଛିନ୍ନ କରିଥିଲେ। କିନ୍ତୁ ଅଲ୍-ଜୁଲାନି ଏହାକୁ ପ୍ରତ୍ୟାଖ୍ୟାନ କରି ଅଲ୍-କାଏଦା ସହ ରହିଥିଲେ।
