ଶୀତଦିନେ ଶୀତରୁ ରକ୍ଷା ପାଇବା ପାଇଁ ଶୀତବସ୍ତ୍ର ସମସ୍ତେ ପିନ୍ଧନ୍ତି। ହେଲେ କେବେ କୌଣସି ପଶୁଙ୍କୁ ଶୀତବସ୍ତ୍ର ପିନ୍ଧିବା ଦେଖି ନ ଥିବେ। ଯଦିଓ ଆଜିକାଲି କେହି କେହି ନିଜର ପେଟ୍ଙ୍କୁ ଶୀତବସ୍ତ୍ର ପିନ୍ଧାଉଛନ୍ତି। ହେଲେ କେବେ କୌଣସି ହାତୀକୁ ଶୀତବସ୍ତ୍ର ପିନ୍ଧିଥିବା ଦେଖି ନ ଥିବେ। ଭାବୁଥିବେ ଏତେ ବଡ଼ ପ୍ରାଣୀକୁ ବା କେମିତି ସ୍ବେଟର ପିନ୍ଧାଇହେବ। ତେବେ ଉତ୍ତର ଭାରତର ମଥୁରାରେ ଏବେ ହେଉଥିବା ପ୍ରବଳ ଶୀତରୁ ରକ୍ଷା ଦେବା ପାଇଁ ଗ୍ରାମବାସୀ ହାତୀଙ୍କ ପାଇଁ ସ୍ବେଟର ତିଆରି କରିଛନ୍ତି। ଆଉ ରଙ୍ଗ ବେରଙ୍ଗର ସୁନ୍ଦର ସ୍ବେଟର ହାତୀମାନଙ୍କୁ ପିନ୍ଧାଇଛନ୍ତି ମଧ୍ୟ। ଫଳରେ ସେମାନେ ଦେଖାଯାଉଛନ୍ତି ବେଶ୍ ଆକର୍ଷକ। ଏହାର ଫଟୋକୁ ଆଇଏଫ୍ଏସ୍ ଅଧିକାରୀ ପରବୀନ କାସବାନ ନିଜର ଟୁଇଟର ଆକାଉଣ୍ଟରେ ଶେୟାର କରିଛନ୍ତି। ଫଟୋରେ ଦୁଇଜଣ ମହିଳା ହାତୀକୁ କିଛି ଖୁଆଇବା ସହ ସ୍ବେଟର ପିନ୍ଧାଉଥିବା ଦେଖିବାକୁ ମିଳେ। ପ୍ରାଣୀଙ୍କ ପ୍ରତି ଗ୍ରାମବାସୀଙ୍କର ଏତେ ଭଲପାଇବା ସମସ୍ତଙ୍କ ମନ ଜିଣି ନେଇଛି।
