କଟକ,୧୧।୬(ପ୍ରଭୁକଲ୍ୟାଣ ପାଲ): ବହୁ ଚର୍ଚ୍ଚିତ କନ୍ଧମାଳ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ହତ୍ୟା ଘଟଣାର ତଦନ୍ତ କମିଶନ ରିପୋର୍ଟ ଗାଏବ ହେବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି କହିଛନ୍ତି ତଦନ୍ତ କମିଶନ ଅଧ୍ୟକ୍ଷ ଜଷ୍ଟିସ ଏ ଏସ ନାଇଡୁ । ଏହା କେଉଁଠି ରହିଯାଇଥାଇ ପାରେ, ଏହାର ଗୁରୁତ୍ୱ ଉପଲବ୍ଧି କରି ଏହାର ପୁନଃ ଉଦ୍ଧାର ପାଇଁ ସରକାର ଚେଷ୍ଟା କରିବା ଦରକାର ବୋଲି ସେ କହିଛନ୍ତି।
ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ହତ୍ୟା ଓ ପରବର୍ତ୍ତୀ ହତ୍ୟାକାଣ୍ଡ ଘଟଣାର ତଦନ୍ତ କରି ପ୍ରାୟ ହଜାରରୁ ଉର୍ଦ୍ଧ୍ବ ପୃଷ୍ଠାର ତଦନ୍ତ ରିପୋର୍ଟ ଦାଖଲ କରାଯାଇଥିଲା। କେଉଁ ପରିସ୍ଥିତିରେ କେଉଁ କାରଣରୁ ସ୍ୱାମୀ ଜୀଙ୍କୁ ହତ୍ୟା କରାଗଲା, ଏହି ଘଟଣାରେ ମାଓବାଦୀଙ୍କ କଣ ଭୂମିକା ରହିଛି, ଧର୍ମାନ୍ତରୀକରଣର କଣ ପ୍ରଭାବ ରହିଥିଲା ଏହି ସବୁ ଉପରେ ବିସ୍ତୃତ ଭାବେ ରିପୋର୍ଟରେ ଦର୍ଶାଯାଇଥିଲା ବୋଲି ଜଷ୍ଟିସ ନାଇଡୁ କହିଛନ୍ତି । ଏପରି ଘଟଣା ଯେପରି ପୁନରାବୃତ୍ତି ନହେବ ସେ ନେଇ କମିଶନ ସୁପାରିସ କରିଥିବା ସେ କହିଛନ୍ତି । ଧର୍ମାନ୍ତରୀକରଣ କାରଣରୁ ସୃଷ୍ଟି ହୋଇଥିବା ସାମ୍ପ୍ରଦାୟିକ ବିବାଦ, ସ୍ୱାମୀଜୀଙ୍କ ହତ୍ୟା ଓ ପରବର୍ତ୍ତୀ ହିଂସା କାଣ୍ଡର ମୁଖ୍ୟ କାରଣ ବୋଲି ଜଷ୍ଟିସ ପରୋକ୍ଷରେ ସୂଚନା ଦେଇଛନ୍ତି।
ବିସ୍ତୃତ ଭାବରେ ତଦନ୍ତ ପାଇଁ ସ୍ଥାନୀୟ ସଙ୍ଗଠନ, ଆରଏସଏସ, ବିଭିନ୍ନ ବର୍ଗର ଲୋକ ତଦନ୍ତ କମିଶନର ସାମ୍ନା କରିଥିଲେ। ତତ୍କାଳୀନ ମାଓବାଦୀ ନେତା ସବ୍ୟସାଚୀ ପଣ୍ଡାଙ୍କ ପକ୍ଷରୁ କମିଶନରେ ତାଙ୍କର ସାକ୍ଷ ଗ୍ରହଣ କରାଯାଇଥିଲା। ପ୍ରଶାସନିକ ଉଦାସୀନତା ଘଟଣାଟିକୁ ଆହୁରି ବଢ଼େଇ ଦେଇଥିଲା ବୋଲି କମିଶନ ପରୋକ୍ଷରେ ସୂଚନା ଦେଇଛନ୍ତି । ୨୦୦୮ ମସିହାରେ ଧର୍ମାନ୍ତରୀକରଣକୁ ବିରୋଧ କରିସ୍ୱାମୀଜୀ ଆରମ୍ଭ କରିଥିବା ଏକ ରଥ ଯାତ୍ରାକୁ ନେଇ ସ୍ଥାନୀୟ ଅଞ୍ଚଳରେ ବିବାଦ ଦେଖାଦେଇଥିଲା । ଏହି ବିବାଦ ପରେ ଜନ୍ମଷ୍ଟମୀ ଦିନ ମୁଖାଧାରି ଆତତାୟୀ ଆଶ୍ରମରେ ସ୍ୱାମୀଜି ଓ ତାଙ୍କ କିଛି ଅନୁଗତଙ୍କୁ ହତ୍ୟା କରିଥିଲେ। ଏହି ହତ୍ୟାକାଣ୍ଡକୁ ନେଇ ସ୍ତାନୀୟ ଅଂଚଳରେ ସାମ୍ପ୍ରଦାୟିକ ଦଙ୍ଗା ହୋଇଥିଲା। ଏଥିରେ ବହୁ ଧନଜୀବନ ନଷ୍ଟ ହେବା ସହ ଅନେକ ଲୋକ ବିସ୍ଥାପିତ ହୋଇଥିଲେ ।
ସ୍ୱାମୀଜୀଙ୍କ ହତ୍ୟା ଓ ପର୍ବବର୍ତୀ ଦଙ୍ଗା ଘଟଣାର ତଦନ୍ତ ପାଇଁ ଜଷ୍ଟିସ ଶରତ ଚନ୍ଦ୍ର ମହାପାତ୍ର ନେତୃତ୍ୱରେ ତଦନ୍ତ କମିଶନ ଗଠନ ହୋଇଥିଲା। ୨୦୧୨ ମସିହାରେ ଜଷ୍ଟିସ ମହାପାତ୍ରଙ୍କ ଦେହାନ୍ତ ପରେ ଜଷ୍ଟିସ ନାଇଡୁଙ୍କୁ ତଦନ୍ତ ଦାଇତ୍ୱ ଦିଆଜାଥିଲା। ଏତେ ସବୁ ପରିଶ୍ରମ କରି ଗଛ ଲଗାଯାଇଥିଲା କିନ୍ତୁ ଫଳ ଖାଇ ହେଲା ନାହିଁ ବୋଲି ଅତ୍ୟନ୍ତ କ୍ଷୋଭ ପ୍ରକାଶ କରି କହିଛନ୍ତି ଜଷ୍ଟିସ ନାଇଡୁ।
