ମୁମ୍ବାଇ,୭।୨: ଟି୨୦ ବିଶ୍ୱକପ୍ରେ ଐତିହାସିକ ଓ୍ବାଙ୍ଖଡ଼େ ଷ୍ଟାଡିୟମରେ ଆମେରିକା ବିପକ୍ଷରେ ପ୍ରଥମ ମ୍ୟାଚ୍ ସହ ଅଭିଯାନ ଆରମ୍ଭ କରିଛି ଟିମ୍ ଇଣ୍ଡିଆ। ମ୍ୟାଚ୍ରେ ଟସ୍ ହାରିବା ପରେ ପ୍ରଥମେ ବ୍ୟାଟିଂ କରିବାକୁ ଓହ୍ଲାଇଥିଲା ଟିମ ଇଣ୍ଡିଆ। ହେଲେ ପାୱାରପ୍ଲେ ଭିତରେ ହିଁ ୪ଟି ଉଇକେଟ ହରାଇ ଦଳ ନିରାଶାଜନକ ଆରମ୍ଭ କରିଥିଲା। ଓପନର ଯୋଡ଼ି ଏବଂ ମଧ୍ୟମ କ୍ରମର ବ୍ୟାଟ୍ସମ୍ୟାନମାନେ ଶୀଘ୍ର ପ୍ୟାଭିଲିୟନ ଫେରିଥିଲେ। ୭୭ ରନ ସ୍କୋରରେ ୬ ଉଇକେଟ ଯିବା ପରେ ଦଳ ଗଭୀର ସଙ୍କଟରେ ପଡ଼ିଥିଲା। ଆମେରିକାର ବୋଲରମାନେ ଅସାଧାରଣ ପ୍ରଦର୍ଶନ କରି ଚାପ ବଢ଼ାଇ ଚାଲିଥିଲେ। ଏହି ସମୟରେ ଏକାକି ଲଢ଼ିଥିଲେ ଅଧିନାୟକ ସୂର୍ଯ୍ୟକୁମାର ଯାଦବ।
ସୂର୍ଯ୍ୟକୁମାର ଧୀରେ ଧୀରେ ବ୍ୟାଟିଂ କରି ଇନିଂସକୁ ସ୍ଥିର କରି ଅର୍ଦ୍ଧଶତକ ପୂରଣ କରିଥିଲେ, ଯେଉଁଥିରେ ୭ଟି ଚୌକା ଏବଂ ୧ଟି ଛକା ଥିଲା। ଶେଷଯାଏ ସେ ଅପରାଜିତ ରହି ୪୯ ବଲରେ ୮୪ ରନ କରିଥିଲେ (୧୦ଟି ଚୌକା ଏବଂ ୪ଟି ଛକା)। ଏହାଦ୍ୱାରା ଭାରତ ୨୦ ଓଭରରେ ୯ ଉଇକେଟ ହରାଇ ୧୬୧ ରନ କରିବାରେ ସଫଳ ହୋଇଥିଲା। ତାଙ୍କ ବ୍ୟତୀତ ଅନ୍ୟ କୌଣସି ବ୍ୟାଟ୍ସମ୍ୟାନ ୩୦ ରନ ମଧ୍ୟ ପାରି ନ ଥିଲେ।
ଏହି ଇନିଂସ ସହିତ ସୂର୍ଯ୍ୟକୁମାର ଭାରତୀୟ ଟିମ ପାଇଁ T୨୦ ବିଶ୍ୱକପ୍ରେ ଅର୍ଦ୍ଧଶତକ ମାରିଥିବା ତୃତୀୟ ଅଧିନାୟକ ପାଲଟିଛନ୍ତି। ଏହାପୂର୍ବରୁ ରୋହିତ ଶର୍ମା (୪ ଥର) ଏବଂ ବିରାଟ କୋହଲି(ଥରେ) ହିଁ ଏହି କୀର୍ତ୍ତି ହାସଲ କରିଥିଲେ। ସୂର୍ଯ୍ୟକୁମାର ନିଜର ପ୍ରଥମ T୨୦ ବିଶ୍ୱକପ ମ୍ୟାଚ୍ରେ ଅଧିନାୟକ ଭାବେ ଏହି ଉପଲବ୍ଧି ହାସଲ କରି ଇତିହାସ ରଚିଛନ୍ତି। ଆମେରିକାକୁ ବିଜୟ ପାଇଁ ୧୬୨ ରନ୍ର ଟାର୍ଗେଟ ମିଳିଛି। ସୂର୍ଯ୍ୟକୁମାରଙ୍କ ଏହି ଇନିଂସ ଦଳକୁ ଏକ ସମ୍ମାନଜନକ ସ୍କୋର ଦେଇଛି। ଏବେ ବୋଲରମାନଙ୍କ ଉପରେ ଏହି ସ୍କୋରକୁ ଡିଫେଣ୍ଡ କରିବାର ଦାୟିତ୍ୱ ରହିଛି ।
