ନୂଆଦିଲ୍ଲୀ,୨୧।୧: ଭାରତ ଏବଂ ଇଂଲଣ୍ଡ ମଧ୍ୟରେ ୫ ମ୍ୟାଚ ବିଶିଷ୍ଟ ଟି-୨୦ ସିରିଜ ଜାନୁଆରୀ ୨୨ ରୁ ଆରମ୍ଭ ହେବାକୁ ଯାଉଛି। ଏହି ସିରିଜରେ, ଟିମ ଇଣ୍ଡିଆର ନେତୃତ୍ୱ ସୂର୍ଯ୍ୟକୁମାର ଯାଦବ ନେବେ। ସେହିଭଳି ଅକ୍ଷର ପଟେଲଙ୍କୁ ଉପ-ଅଧିନାୟକ କରାଯାଇଛି। ସିରିଜ ଲାଗି ହାର୍ଦ୍ଦିକ ପାଣ୍ଡ୍ୟାଙ୍କୁ ଦଳରେ ସାମିଲ କରାଯାଇଥିଲେ ହେଁ ତାଙ୍କୁ କୌଣସି ଦାୟିତ୍ୱ ଦିଆଯାଇ ନାହିଁ। ଏକଦା ସେ ଟି-୨୦ ଫର୍ମାଟର ଅଧିନାୟକ ହେବାର ଏକ ଦୃଢ଼ ଦାବିଦାର ଥିଲେ। କିନ୍ତୁ ତାଙ୍କୁ ଉପ-ଅଧିନାୟକ ମଧ୍ୟ କରାଯାଇନାହିଁ, ଯାହାକୁ ନେଇ ଅନେକ ଅଭିଜ୍ଞ ଖେଳାଳି ପ୍ରଶ୍ନ ଉଠାଇଛନ୍ତି। ଏବେ ସୂର୍ଯ୍ୟକୁମାର ଯାଦବ ମଧ୍ୟ ଏହି ପ୍ରସଙ୍ଗରେ ଏକ ବଡ଼ ବୟାନ ଦେଇଛନ୍ତି।
ପୂର୍ବରୁ ହାର୍ଦ୍ଦିକ ପାଣ୍ଡ୍ୟା ଟି-୨୦ରେ ଅଧିନାୟକ ଏବଂ ଦିନିକିଆରେ ଉପ-ଅଧିନାୟକ ଦାୟିତ୍ୱ ତୁଲାଉଥିଲେ। ସେ ୨୦୨୩ ODI ବିଶ୍ୱକପରେ ମଧ୍ୟ ଭାରତୀୟ ଦଳର ଉପ-ଅଧିନାୟକ ଥିଲେ। କିନ୍ତୁ ଚାମ୍ପିଅନ୍ସ ଟ୍ରଫି ପାଇଁ ଶୁଭମନ ଗିଲଙ୍କୁ ରୋହିତ ଶର୍ମାଙ୍କ ଡେପୁଟି କରାଯାଇଛି। ସୂର୍ଯ୍ୟକୁମାର ଯାଦବ ସ୍ପଷ୍ଟ କରିଛନ୍ତି ଯେ ହାର୍ଦ୍ଦିକ ପାଣ୍ଡ୍ୟା ଏବେ ବି ଭାରତୀୟ ଦଳର ନେତୃତ୍ୱ ଗୋଷ୍ଠୀର ଏକ ଅଂଶ ଅଛନ୍ତି।
ଇଂଲଣ୍ଡ ବିପକ୍ଷ ଟି-୨୦ ସିରିଜ ଆରମ୍ଭ ହେବା ପୂର୍ବରୁ ଖବରଦାତା ସମ୍ମିଳନୀରେ ସୂର୍ଯ୍ୟକୁମାର କହିଛନ୍ତି, ‘ହାର୍ଦ୍ଦିକଙ୍କ ସହ ମୋର ସମ୍ପର୍କ ପ୍ରକୃତରେ ବହୁତ ଭଲ। ଏହା କେବଳ ଏକ ଅତିରିକ୍ତ ଦାୟିତ୍ୱ ଯାହା ମୋତେ ମିଳିଛି। ହାର୍ଦ୍ଦିକ ନେତୃତ୍ୱ ଗୋଷ୍ଠୀର ଅଂଶ ଏବଂ ଆମେ ଭଲ ବନ୍ଧୁ ବୋଲି ସେ କହିଛନ୍ତି।
ହାର୍ଦ୍ଦିକ ପାଣ୍ଡ୍ୟା ଏପର୍ଯ୍ୟନ୍ତ ୧୬ ଟି ଟି-୨୦ ମ୍ୟାଚ୍ରେ ଭାରତୀୟ ଦଳର ଅଧିନାୟକତ୍ୱ କରିଛନ୍ତି। ଏହି ସମୟ ମଧ୍ୟରେ ଭାରତ ୧୧ଟି ମ୍ୟାଚ୍ ଜିତିଛି ଏବଂ ୫ଟି ହାରିଛି। କିନ୍ତୁ ୨୦୨୪ ଟି-୨୦ ବିଶ୍ୱକପ୍ ପୂର୍ବରୁ ରୋହିତ ଭାରତୀୟ ଟି-୨୦ ଦଳକୁ ଫେରିଥିଲେ। ତା’ପରେ ହାର୍ଦ୍ଦିକଙ୍କୁ ଏହି ଦାୟିତ୍ୱରୁ ମୁକ୍ତ କରାଯାଇଥିଲା। ସେବେଠାରୁ ହାର୍ଦ୍ଦିକ ପାଣ୍ଡ୍ୟାଙ୍କୁ ଅଧିନାୟକତ୍ୱର ଦାୟିତ୍ୱ ମିଳିନାହିଁ।
