ପ୍ୟାରିସ୍,୭ା୭:ଜୁନ୍ ୨୭ରେ ପ୍ୟାରିସ୍ର ନାନ୍ଟେରେଠାରେ ୧୭ ବର୍ଷୀୟ ଡେଲିଭରି ଡ୍ରାଇଭର ନହେଲ ଏମ୍.ଙ୍କୁ ଜଣେ ପୋଲିସ ଅଫିସର ଗୁଳିକରି ହତ୍ୟା କରିବା ପ୍ରତିବାଦରେ ସାରା ଫ୍ରାନ୍ସରେ ଆନ୍ଦୋଳନର ନିଅଁା ଜଳୁଥିବାବେଳେ ମାକ୍ରଁଙ୍କ ସରକାର ପୋଲିସକୁ ସୁହାଇଲା ଭଳି ଏକ ବିବାଦୀୟ ଆଇନ ଆଣିଛନ୍ତି। ସନ୍ଦିଗ୍ଧମାନଙ୍କ କ୍ୟାମେରା, ମାଇକ୍ରୋଫୋନ୍, ମୋବାଇଲ ଫୋନ୍ର ଗ୍ଲୋବାଲ ପୋଜିଶନିଂ ସିଷ୍ଟମ୍ (ଜିପିଏସ୍) ଏବଂ ଅନ୍ୟ ଉପକରଣଗୁଡ଼ିକ ଜରିଆରେ ପୋଲିସ ଗୁପ୍ତଚରଗିରି କରିପାରିବା ଉଚିତ ବୋଲି ଦେଶର ଆଇନପ୍ରଣେତାମାନେ ଜୁଲାଇ ୫ରେ ସହମତି ପ୍ରକାଶ କରିଛନ୍ତି। ଏକ ବିସ୍ତୃତ ନ୍ୟାୟ ସଂସ୍କାର ବିଲ୍ର ଅଂଶ ଭାବେ ପୋଲିସକୁ ଗୁପ୍ତଚରଗିରି କ୍ଷମତା ପ୍ରଦାନ ସମ୍ପର୍କିତ ଏହି ବିଲ୍ ନ୍ୟାଶନାଲ ଆସେମ୍ବ୍ଲିରେ ଗୃହୀତ ହୋଇଛି। ସରକାରଙ୍କ ଏହି ଉଦ୍ୟମକୁ ଉଭୟ ବାମ ଓ ଦକ୍ଷିଣପନ୍ଥୀ ଆଡ୍ଭୋକେସି ଗ୍ରୁପ୍ଗୁଡ଼ିକ ପକ୍ଷରୁ ଦୃଢ଼ ବିରୋଧ କରାଯାଇଛି।
ନୂଆ ଆଇନ ଅନୁସାରେ ଲାପ୍ଟପ୍, କାର୍ ଓ ଫୋନ୍ ଭଳି ଅନ୍ୟ ସଂଲଗ୍ନ ଉପକରଣଗୁଡ଼ିକ ଜରିଆରେ ଅନୂ୍ୟନ ୫ ବର୍ଷ ଜେଲ ଦଣ୍ଡନୀୟ କୌଣସି ଆପରାଧିକ ମାମଲାର ସନ୍ଦିଗ୍ଧଙ୍କ ଭୌଗୋଳିକ ଅବସ୍ଥିତି ଠାବ ପାଇଁ ପୋଲିସକୁ ଅନୁମତି ମିଳିବ। ଅପକର୍ମ, ଆତଙ୍କବାଦ ଓ ସଙ୍ଗଠିତ ଅପରାଧରେ ଜଡ଼ିତ ବ୍ୟକ୍ତିଙ୍କ ଫଟୋ ଏବଂ ସ୍ବର ରେକର୍ଡ କରିବା ପାଇଁ ଉପକରଣଗୁଡ଼ିକୁ ଦୂରବର୍ତ୍ତୀ ସ୍ଥାନରୁ ଆକ୍ଟିଭେଟ୍ କରାଯାଇପାରିବ। ଆଇନରେ ଏଭଳି ବ୍ୟବସ୍ଥା ଥିବାରୁ ବୁଧବାର ବିତର୍କ ବେଳେ ଅନେକ ଏମ୍ପି ଏହାକୁ ବିରୋଧ କରିଥିଲେ। କିନ୍ତୁ ଏହା ବାର୍ଷିକ କେବଳ କିଛି ଡଜନ୍ ମାମଲାକୁ ପ୍ରଭାବିତ କରିବ କହି ନ୍ୟାୟମନ୍ତ୍ରୀ ଏରିକ୍ ଡୁପୋଣ୍ଡ୍-ମୋରେଟ୍ଟି ବୁଝାଇବା ପରେ ସେମାନେ ସହମତି ପ୍ରକାଶ କରିଥିଲେ। ରାଷ୍ଟ୍ରପତି ଇମାନ୍ବେଲ ମାକ୍ରଁଙ୍କ ଶିବିରର ଏମ୍ପିମାନେ ଉକ୍ତ ବିଲ୍ରେ ଏକ ସଂଶୋଧନ ଯୋଡ଼ିଛନ୍ତି। ଏହାଦ୍ୱାରା ଅପରାଧର ପ୍ରକାର ଓ ଗମ୍ଭୀରତାକୁ ଦୃଷ୍ଟିରେ ରଖି ରିମୋଟ୍ ସ୍ପାଇଂର ବ୍ୟବହାରକୁ ସ୍ବଳ୍ପ ସମୟ ପାଇଁ ସୀମିତ କରାଯାଇପାରିବ। ତେବେ ଏଥିପାଇଁ ଜଣେ ବିଚାରପତିଙ୍କ ଅନୁମତି ନେବାକୁ ପଡ଼ିବ। ସର୍ଭିଲାନ୍ସର ମୋଟ ଅବଧି ୬ ମାସରୁ ଊର୍ଦ୍ଧ୍ୱ ହେବ ନାହିଁ। ଡାକ୍ତର, ଖବରଦାତା, ଆଇନଜୀବୀ, ବିଚାରପତି, ଏମ୍ପି ଭଳି ସମ୍ବେଦନଶୀଳ ପେସାଦାରମାନଙ୍କୁ ବୈଧ ଟାର୍ଗେଟ କରାଯାଇପାରିବ ନାହିଁ। ଟୋଟାଲ ସର୍ଭିଲାନ୍ସ ଅଧୀନ ସମାଜ ସମ୍ପର୍କିତ ଜର୍ଜ ଓରଓ୍ବେଲଙ୍କ ଉପନ୍ୟାସ ‘ଆମେ ୧୯୮୪ର ସର୍ବାଧିକାର ଏକଚ୍ଛତ୍ରବାଦଠାରୁ ବହୁ ଦୂରକୁ ଚାଲିଆସିଛେ’ର ଅବତାରଣା କରି ନ୍ୟାୟମନ୍ତ୍ରୀ ଏରିକ୍ କହିଛନ୍ତି, ଏହି ଆଇନ ଲୋକଙ୍କ ଜୀବନ ରକ୍ଷା କରିବ। ଭୋଟିଂ ପୂର୍ବରୁ ବିଲ୍ର ନାକାରାମତ୍କ ଦିଗଗୁଡ଼ିକ ଉପରେ ମଧ୍ୟ ଆଲୋଚନା ହୋଇଛି।
