ନୂଆପଡ଼ା,୧୯ା୧୧ (ମକାରୁ ବେମାଲ): ନୂଆପଡ଼ା ଜିଲାରେ ଗ୍ରାମ୍ୟ ଜଳଯୋଗାଣ ବିଭାଗ ପକ୍ଷରୁ ସୁନ୍ଦର ଜଳସେଚନ ପ୍ରକଳ୍ପ ଜଡାମୁଣ୍ଡାଠାରେ ଗଭୀର କୂପ ଜରିଆରେ ପାଣି ଉଠାଇ ଗାଁ ଗାଁକୁ ପାଇପ୍ ବିଛାଯାଇ ବିଶୁଦ୍ଧ ପାନୀୟ ଜଳ ଯୋଗାଣ ହେଉଛି। ହେଲେ ସୋମବାର କୋମନା ବ୍ଲକ ଜଟଗଡ ପଞ୍ଚାୟତ ବାବେଘାଟି ଗାଁକୁ ଯୋଗାଣ ହେଉଥିବା ପାଣିରେ ଏକ ଲମ୍ବା ଜିଆ ଭାସୁଥିବା ଦେଖି ଲୋକେ ଏହାକୁ ବ୍ୟବହାର କରି ନ ଥିଲେ। ସୂଚନା ଅନୁଯାୟୀ ଜଟଗଡ ପଞ୍ଚାୟତ ବାବେଘାଟି ୨ ୱାର୍ଡ ବିଶିଷ୍ଟ ଗାଁରେ ୧୫୦ରୁ ଊର୍ଦ୍ଧ୍ୱ ପରିବାରରେ ୯ ଶହରୁ ଅଧିକ ଲୋକ ବାସ କରୁଛନ୍ତି। ଗାଁକୁ ପାଇପ୍ ବିଛାଯାଇ ପାନୀୟ ଜଳ ଯୋଗାଣ ହେଉଛି। ବିଘ୍ନ ଆଡବଙ୍ଗଙ୍କ ଘରକୁ ସଂଯୋଗ ହୋଇଥିବା ପାଇପ୍ ପାଣିରେ ସୋମବାର ୨ଟି ଜିଅନ୍ତା ଲମ୍ବା ଜିଆ ବାହାରିଥିଲା। ତାହାର ଲମ୍ବ ୧ ଫୁଟ ହେବ। ଗ୍ରାମର ଲୋକେ ଏହାକୁ ପାଣି ଜିଆ କହୁଥିବା ବେଳେ କିଛି ଲୋକ ଏହା ପାଣିରେ ରହୁଥିବା ସାପ ବୋଲି କହିଛନ୍ତି। ଏହା ବିଷଧର କି ନୁହେଁ ଜଣା ନାହିଁ। ହେଲେ ଏହି ଜିଅନ୍ତା ଜିଆ ପାଣିରେ ବାହାରିବାଠାରୁ ଗାଁ ଲୋକେ ପାଇପ୍ ପାଣି ନେବା ବନ୍ଦ କରି ଦେଇଛନ୍ତି। ଦୁଇଟି ଜିଆକୁ ପାଣିରେ ଏକ ଘମେଲା ଭିତରେ ରଖାଯାଇଛି। ବିଶେଷଜ୍ଞମାନେ ଏହାର ପରୀକ୍ଷା କରି ସନ୍ଦେହ ଦୂର କରିବା ପାଇଁ ସାଧାରଣରେ ଦାବି ହେଉଛି। ଏ ସଂକ୍ରାନ୍ତରେ କୋମନା ଗ୍ରାମ୍ୟ ଜଳ ଯୋଗାଣ କନିଷ୍ଠ ଯନ୍ତ୍ରୀ ନିରଞ୍ଜନ ମିଞ୍ଜଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସମ୍ଭବ ହୋଇ ନ ଥିଲା।
