ନୂଆଦିଲ୍ଲୀ,୧୪।୭: ଭାରତର ମୋଷ୍ଟ ଓ୍ବାଣ୍ଟେଡ ଡନ୍ ଦାଉଦ୍ ଇବ୍ରାହିମ୍। ଆତଙ୍କବାଦୀ ଲିଙ୍କ୍ ଠାରୁ ଆରମ୍ଭ କରି ମୁମ୍ବାଇର ତାଜ୍ ଆଟାକ୍ ଯାଏଁ ସବୁଠି ରହିଛି ଦାଉଦଙ୍କର ହାତ। ଗୁରୁତର ଆପରାଧିକ ମାମଲାର ଅଭିଯୁକ୍ତ ଦାଉଦ କେବଳ ଭାରତ ପାଇଁ ନୁହେଁ ସାରା ବିଶ୍ୱ ପାଇଁ ମୋଷ୍ଟ ଓ୍ବାଣ୍ଟେଡ କ୍ରିମିନାଲ।ତେବେ ଦାଉଦଙ୍କ କଥା ଆମେ ଏଠି କାହିଁକି ଉଠାଇଲେ ଆପଣ ନିଶ୍ଚେ ଭାବୁଥିବେ। ଏଠାରେ କହି ରଖୁଛୁ ଦାଉଦଙ୍କ ସହ ଜଣେ ମହିଳାଙ୍କ ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି। ଫଟୋଟି ଦେଖି ୟୁଜର୍ସ ମହିଳାଙ୍କୁ କଂଗ୍ରେସର ମୁଖପାତ୍ର ସୁପ୍ରିୟା ଶ୍ରୀନେତ ବୋଲି କହିଛନ୍ତି। ଏନେଇ ଜାତୀୟ ରାଜନୀତି ସରଗରମ ରହିଥିବାବେଳେ ଫଟୋରେ ଥିବା ପ୍ରକୃତ ମହିଳା ମୁହଁ ଖୋଲିଛନ୍ତି।
ସେ ହେଉଛନ୍ତି ଭେଟେରାନ ସାମ୍ବାଦିକା ଶିଲା ଭଟ୍ଟ। ଆଇନକୁ ଧରାଛୁଆଁ ଦେଇ ନ ଥିବା ଦାଉଦ ଜଣେ ସାମ୍ବାଦିକାଙ୍କୁ ସାକ୍ଷାତକାର ଦେଇଥିଲେ। ଥରେ ନୁହେଁ ସାମ୍ବାଦିକାଙ୍କୁ ସେ ବହୁଥର ସାକ୍ଷାତକାର ଦେଇଛନ୍ତି।
ଦାଉଦଙ୍କ ସହ ସାକ୍ଷାତକାର ନେଉଥିବାର ଏକ ପୁରୁଣା ଫୋଟକୁ ଶିଲା ତାଙ୍କ ସୋସିଆଲ ମିଡିଆରେ ପୋଷ୍ଟ କରିଛନ୍ତି। କେବଳ ଦାଉଦ ନୁହେଁ ଏହି ସାହାସୀ ସାମ୍ବାଦିକା ଜଣକ ଅଣ୍ଡରଗ୍ରାଉଣ୍ଡ ଡନ୍ ଜର୍ଣ୍ଣେଲ ସିଂ ଭୀନ୍ଦ୍ରନୱାଲେ, ଛୋଟା ରାଜନ, ଭରାଦରାଜନ ମୁଦାରଲିୟାର, ୟୁସୁଫ ପଟେଲ ହାଜି ମସ୍ତାନ, ଅରୁଣ ଗାୱଲିଙ୍କୁ ଭେଟିଛନ୍ତି। ତେବେ ଏକ ଜାତୀୟ ଗଣମାଧ୍ୟମକୁ ସାକ୍ଷାତକାର ଦେଇ ଶିଲା କହିଛନ୍ତି, ଦାଉଦଙ୍କୁ ଭେଟିବା ସମୟରେ ସେ ଜଣେ ଛୋଟ ଅପରାଧୀ ଥିଲେ। ଦାଉଦ ତାଙ୍କୁ ଭାରତ ଏବଂ ଦୁବାଇରେ ସାକ୍ଷାତକାର ଦେଇଛନ୍ତି।
୧୯୮୮ରେ ତାଙ୍କର ଦାଉଦଙ୍କ ସହ ପ୍ରଥମ ସାକ୍ଷାତକାର ହୋଇଥିଲା। ଦାଉଦଙ୍କୁ ଭେଟିବାକୁ ସେ ଦୁବାଇ ଯାତ୍ରା କରିଥିଲେ। ମୁମ୍ବାଇ ସିରିଏଲ ବିସ୍ଫୋରଣ ସମେତ ଭାରତରେ ହୋଇଥିବା ଅନେକ ଆତଙ୍କବାଦୀ କାର୍ଯ୍ୟକଳାପ ବିଷୟରେ ସେ ପଚାରି ବୁଝିଥିଲେ।
ଶିଲା କହିଛନ୍ତି, ୧୯୭୦ମସିହାରେ ସେ ମାଫିଆ ଡନ କରିମ ଲାଲାଙ୍କୁ ଭେଟିଥିଲେ। ଯାହାର ଫଟୋ ଚିତ୍ରଲେଖା ପତ୍ରିକାରେ ପ୍ରକାଶ ପାଇଥିଲା। ଫଟୋ ଦେଖି ଦାଉଦଙ୍କ ନଜର ଶିଲାଙ୍କ ଉପରେ ପଡିଥିଲା। ଯେଉଁଥିପାଇଁ ତାଙ୍କୁ ସେ ସାକ୍ଷାତ କରିଥିଲେ।ମୁମ୍ବାଇର ମହମ୍ମଦ ଅଲି ରୋଡରେ ଥିବା ଏକ ସରକାରୀ ରିମାଣ୍ଡ ଘରେ କରିମ ଲାଲା ଏବଂ ତାଙ୍କ ସହଯୋଗୀଙ୍କ ଦ୍ୱାରା ବହୁ ଯୁବତୀ ଉତ୍ପୀଡନର ଶିକାର ହୋଇଥିଲେ। ତେବେ ତାଙ୍କ ବିରୋଧରେ ଦାଉଦ ସାମ୍ବାଦିକା ଶିଲାଙ୍କୁ ରିପୋର୍ଟ ପ୍ରସ୍ତୁତ କରିବାରେ ସାହାଯ୍ୟ କରିଥିଲେ।
ଏହି ସାକ୍ଷାତକାର ପରେ ଶିଲା ତାଙ୍କ ସ୍ବାମୀଙ୍କ ସହ ଦାଉଦଙ୍କ ଭେଟିବାକୁ ଯାଇଥିଲେ।
ଶିଲା କହିଛନ୍ତି, ପ୍ରଥମେ ମୋତେ ଓ ମୋ ସ୍ବାମୀଙ୍କୁ ମୁମ୍ବାଇର ଜେଲ ରୋଡ ସ୍ଥିତ ଟ୍ୟାଙ୍କର୍ ଷ୍ଟ୍ରିଟକୁ ଡକାଯାଇଥିଲା। ତାପରେ ଆମକୁ ଏକ କଳା ରଙ୍ଗର କାର୍ରେ ପାକ୍ମୋଡିଆ ଷ୍ଟ୍ରିଟ୍କୁ ନିଆଯାଇଥିଲା। ସେଠାରେ ଦୁହେଁ ଦାଉଦଙ୍କୁ ଭେଟିଥିଲୁ।
ଏହାର କିଛି ବର୍ଷ ପରେ ଶିଲା ବାରୋଡା ଜେଲରେ ପୁନର୍ବାର ଡନ୍ ଦାଉଦ୍ଙ୍କୁ ଭେଟିଥିଲେ। ଦାଉଦଙ୍କୁ ଭେଟିବା ପାଇଁ ସେ ବରୋଦା ଜେଲକୁ ଯାଇଥିଲେ। ଜେଲ୍ରେ ଦାଉଦ ଫୁଟବଲ ଖେଳୁଥିବା ଦେଖି ସେ ଆଶ୍ଚର୍ଯ୍ୟ ହୋଇଥିଲେ ବୋଲି କହିଛନ୍ତି।
ଶିଲା କହିଛନ୍ତି, ସାକ୍ଷାତାରରେ ଦାଉଦ ମୁମ୍ବାଇର ମାଫିଆ ଡନ୍ କରିଲ ଲାଲାଙ୍କ ସହଯୋଗୀ ତଥା ତାଙ୍କ ବ୍ୟବସାୟକୁ ଦେଖାଶୁଣା କରୁଥିବା ଆଲାମଜେବଙ୍କୁ ଟାର୍ଗେଟ କରିଛନ୍ତି ବୋଲି କହିଥିଲେ। ଯାହାକୁ ନେଇ ଶିଲା ଏକ ରିପୋର୍ଟ ପ୍ରକାଶ କରିଥିବା କହିଛନ୍ତି। ଖବର ପ୍ରକାଶ ହେବାର କିଛି ସମୟ ପରେ ଆଲାମଜେବଙ୍କ ମୃତ୍ୟୁ ହୋଇଥିଲା ବୋଲି ଶିଲା ପ୍ରକାଶ କରିଛନ୍ତି।
ଏହି ସାକ୍ଷାତକାରର ୨ରୁ ୩ବର୍ଷ ଯାଏଁ ଦାଉଦଙ୍କ ସହ କୌଣସି ସମ୍ପର୍କ ନ ଥିଲା। ତେବେ ୧୯୮୭ମସିହାରେ ଦାଉଦ ଶିଲାଙ୍କୁ ଭେଟିବା ପାଇଁ ଦୁବାଇ ଡକାଇଲେ। ଦାଉଦଙ୍କୁ ଭେଟି ସେ ଡ୍ରଗ୍ସ କାରବାର ବିଷୟରେ ପଚାରିଥିଲେ।
ଦାଉଦଙ୍କୁ ଭେଟିବା ପାଇଁ ତାଙ୍କୁ ବହୁ ଖର୍ଚ୍ଚାନ୍ତ ହେବାକୁ ପଡୁଥିଲା। ଦୁବାଇରେ ଦାଉଦଙ୍କୁ ଭେଟିବା ପାଇଁ ସେତେବେଳେ ସମୟରେ ସେ ୩୫୦୦ଟଙ୍କା ଖର୍ଚ୍ଚ କରିଥିଲେ।
ତେବେ ଏହି ସାକ୍ଷାତକାର ପାଇଁ ଶିଲାଙ୍କୁ ବହୁ ସମସ୍ୟା ହୋଇଥିଲା। ତିନଦିନ ପରେ ସେ ଦାଉଦଙ୍କ ସାକ୍ଷାତକାର ନେଇଥିଲେ। ଏହି ସାକ୍ଷାତକାରକୁ ଟେପ୍ ରେକର୍ଡିଂ ନ କରିବାକୁ ଦାଉଦ ମନା କରି ଦେଇଥିଲେ।
ସାକ୍ଷାତକାରରେ ଦାଉଦ ଆଲାମଜେବଙ୍କୁ ହତ୍ୟା କରିଥିବା ସ୍ବୀକାର କରଥିଲେ। ଶିଲା କହିଛନ୍ତି, ଦାଉଦ ହତ୍ୟ ପାଇଁ ଅନୁତାପ କରିଥିଲେ। କିନ୍ତୁ ଆଲାମଜେବଙ୍କୁ ନ ମାରିଥିଲେ ସେ ଦାଉଦଙ୍କୁ ହତ୍ୟା କରିଥା’ନ୍ତେ ବୋଲି ଶିଲାଙ୍କୁ କହିଥିଲେ।
ଶିଲା କହିଛନ୍ତି, ଦାଉଦ ତାଙ୍କୁ ବହୁତ ବିଶ୍ୱାସ କରୁଥିଲା। କାରଣ ସେ ଦାଉଦର ପ୍ରତିଟି ଅପରାଧକୁ ନିରପେକ୍ଷ ଭାବେ ପ୍ରକାଶ କରିଥିଲେ।
