ଇସଲାମାବାଦ,୧୬।୧୨: ଫେବୃୟାରୀ ୮ରେ ପାକିସ୍ତାନରେ ନିର୍ବାଚନ ଅନୁଷ୍ଠିତ ହେବ। ଯାହାକୁ ନେଇ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ନିର୍ବାଚନ କମିଶନ ନିର୍ବାଚନ କାର୍ଯ୍ୟସୂଚୀ ପ୍ରକାଶ କରିଛନ୍ତି। କାର୍ଯ୍ୟସୂଚୀ ଅନୁଯାୟୀ, ପ୍ରାର୍ଥୀମାନେ ୨୦ରୁ ୨୨ ଡିସେମ୍ବର ପର୍ଯ୍ୟନ୍ତ ସେମାନଙ୍କର ନାମାଙ୍କନପତ୍ର ଦାଖଲ କରିପାରିବେ।
ନିର୍ବାଚନ ଆୟୋଗଙ୍କ ଦ୍ୱାରା ପ୍ରକାଶିତ କାର୍ଯ୍ୟସୂଚୀ ଅନୁଯାୟୀ, ଡିସେମ୍ବର ୨୩ରେ ପ୍ରାର୍ଥୀଙ୍କ ତାଲିକା ପ୍ରକାଶ ପାଇବ, ଏହା ପରେ ଡିସେମ୍ବର ୨୪ ରୁ ୩୦ପର୍ଯ୍ୟନ୍ତ ନାମାଙ୍କନପତ୍ର ଯାଞ୍ଚ କରାଯିବ। ଯଦି ରିଟର୍ଣ୍ଣିଂ ଅଧିକାରୀଙ୍କ ଦ୍ୱାରା କାଗଜପତ୍ର ପ୍ରତ୍ୟାଖ୍ୟାନ କରାଯାଏ, ତେବେ ଆବେଦନ କରିବାକୁ ଜାନୁୟାରୀ ୩ ପର୍ଯ୍ୟନ୍ତ ସମୟ ଦିଆଯିବ, ଏହି ଆବେଦନଗୁଡିକ ଉପରେ ଚୂଡ଼ାନ୍ତ ନିଷ୍ପତ୍ତି ଜାନୁୟାରୀ ୧୦ସୁଦ୍ଧା ନିଆଯିବ ଏବଂ ଚୂଡ଼ାନ୍ତ ତାଲିକା ଜାନୁୟାରୀ ୧୧ରେ ପ୍ରକାଶ ପାଇବ।
ଜାନୁୟାରୀ ୧୩ରେ ନିର୍ବାଚନ ଚିହ୍ନ ପ୍ରତୀକ ବଣ୍ଟନ ହେବ। ସମସ୍ତ ଦଳକୁ ନିର୍ବାଚନ ଚିହ୍ନ ଦିଆଯିବ। ଏହା ପରେ ନିର୍ବାଚନ ଆୟୋଗ କିଛି ଦିନ ପାଇଁ ଭୋଟ ସହ ଜଡିତ ସମସ୍ତ ପ୍ରସ୍ତୁତି କରିବେ। ଏହି ସମୟରେ ନିର୍ବାଚନ ଆୟୋଗ ପ୍ରତ୍ୟେକ ଅଭାବକୁ ସୁଧାରିବାକୁ ଚେଷ୍ଟା କରିବେ ଏବଂ ତା’ପରେ ଫେବୃୟାରୀ ୮ରେ ନିର୍ବାଚନ ଅନୁଷ୍ଠିତ ହେବ।
