ନୂଆଦିଲ୍ଲୀ, ୧୯।୮: ନେତାମାନଙ୍କ ବିରୋଧରେ ରହିଥିବା ଅପରାଧିକ ମାମଲାର ଶୀଘ୍ର ଶୁଣାଣି ଦାବିକୁ ନେଇ ସୁପ୍ରିମକୋର୍ଟରେ ଚାଲିଥିବା ଶୁଣାଣି ସମୟରେ ଚକିତ କରିଦେବା ଭଳି ତଥ୍ୟ ସାମ୍ନାକୁ ଆସିଛି। ବରିଷ୍ଠ ଆଇନଜୀବୀ ବିଜୟ ହଂସାରିଆ କହିଛନ୍ତି ଯେ, ୨୮ଟି ରାଜ୍ୟରୁ ୧୪ଟି ରାଜ୍ୟର ମୁଖ୍ୟମନ୍ତ୍ରୀ ନିଜ ବିରୋଧରେ ଥିବା ଅପରାଧିକ ମାମଲା ସମ୍ପର୍କରେ ତଥ୍ୟ ଦେଇଛନ୍ତି। ଏଥିରେ ତେଲଙ୍ଗାନାର ମୁଖ୍ୟମନ୍ତ୍ରୀ ଏ. ରେଭନ୍ତ ରେଡ୍ଡୀ ୮୯ଟି ମାମଲା ସହ ତାଲିକାର ଶୀର୍ଷରେ ଥିବାବେଳେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ବିରୋଧରେ ୨୯ଟି ମାମଲା ରହିଛି।
ରିପୋର୍ଟ ଅନୁସାରେ, ତେଲଙ୍ଗାନାର ମୁଖ୍ୟମନ୍ତ୍ରୀ ଏ. ରେଭନ୍ତ ରେଡ୍ଡୀଙ୍କ ବିରୋଧରେ ୮୯ଟି ମାମଲା ରହିଛି ଏବଂ ସେ ଏହି ତାଲିକାର ଶୀର୍ଷରେ ଅଛନ୍ତି। ଏହା ପରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ବିରୋଧରେ ୨୯ଟି ମାମଲା ରହିଛି। କର୍ନାଟକର ମୁଖ୍ୟମନ୍ତ୍ରୀ ଡି.କେ. ଶିବକୁମାର ଏବଂ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଏନ. ଚନ୍ଦ୍ରବାବୁ ନାଇଡୁଙ୍କ ବିରୋଧରେ ୧୯ଟି ଲେଖାଏ ମାମଲା ରହିଛି। ସେହିପରି କେରଳର ମୁଖ୍ୟମନ୍ତ୍ରୀ ଭି.ଡି. ସତୀଶନଙ୍କ ବିରୋଧରେ ୧୮ଟି ମାମଲା ରହିଛି।
ଝାଡ଼ଖଣ୍ଡର ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ବିରୋଧରେ ୫ଟି ମାମଲା ରହିଛି। ମହାରାଷ୍ଟ୍ରର ଦେବେନ୍ଦ୍ର ଫଡନଭିସ ଏବଂ ହିମାଚଳ ପ୍ରଦେଶର ସୁଖବିନ୍ଦର ସିଂହ ସୁଖୁଙ୍କ ବିରୋଧରେ ୪ଟି ଲେଖାଏ ମାମଲା ରହିଛି। ସେହିପରି ତାମିଲନାଡୁର ମୁଖ୍ୟମନ୍ତ୍ରୀ ସି. ଜୋସେଫ ବିଜୟ ଏବଂ ବିହାରର ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀଙ୍କ ବିରୋଧରେ ୨ଟି ଲେଖାଏ ମାମଲା ଥିବା ଦର୍ଶାଯାଇଛି।
ରିପୋର୍ଟରେ ସିକ୍କିମର ମୁଖ୍ୟମନ୍ତ୍ରୀ ପି.ଏସ. ତମାଙ୍ଗ, ପଞ୍ଜାବର ମୁଖ୍ୟମନ୍ତ୍ରୀ ଭଗବନ୍ତ ମାନ, ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ରାଜସ୍ଥାନର ମୁଖ୍ୟମନ୍ତ୍ରୀ ଭଜନଲାଲ ଶର୍ମାଙ୍କ ବିରୋଧରେ ଗୋଟିଏ ଲେଖାଏ ମାମଲା ଥିବା ଉଲ୍ଲେଖ ରହିଛି।
୯୬ ପୃଷ୍ଠାର ରିପୋର୍ଟ ଅନୁସାରେ, ଗୁରୁତର ଅପରାଧିକ ମାମଲା ଥିବା ବିଧାୟକଙ୍କ ପ୍ରତିଶତ ପଶ୍ଚିମବଙ୍ଗରେ ସର୍ବାଧିକ। ସେଠାରେ ୨୯୨ ଜଣଙ୍କ ମଧ୍ୟରୁ ୧୭୦ ଜଣ, ଅର୍ଥାତ୍ ୫୮% ବିଧାୟକଙ୍କ ବିରୋଧରେ ଗୁରୁତର ମାମଲା ରହିଛି।
ଏହା ପରେ କେରଳରେ ୫୭%, ଆନ୍ଧ୍ରପ୍ରଦେଶରେ ୫୬%, ତେଲଙ୍ଗାନାରେ ୪୯%, ଝାଡ଼ଖଣ୍ଡ ଓ ଓଡ଼ିଶାରେ ୪୫% ଲେଖାଏ, ବିହାରରେ ୪୨%, ମହାରାଷ୍ଟ୍ରରେ ୪୦% ଏବଂ ଉତ୍ତରପ୍ରଦେଶ ରହିଛି। ଲୋକସଭାରେ ୧୭୦ ଜଣ ସାଂସଦଙ୍କ ବିରୋଧରେ ଗୁରୁତର ଅପରାଧିକ ମାମଲା ବିଚାରାଧୀନ ରହିଛି। ଏହା ୫୪୩ ଜଣ ସାଂସଦଙ୍କ ମୋଟ ସଂଖ୍ୟାର ପ୍ରାୟ ୩୧%। ତେଲଙ୍ଗାନାର ୧୭ ଜଣ ସାଂସଦଙ୍କ ମଧ୍ୟରୁ ୧୧ ଜଣ, କେରଳର ୨୧ ଜଣଙ୍କ ମଧ୍ୟରୁ ୧୧ ଜଣ, ବିହାରର ୪୦ ଜଣଙ୍କ ମଧ୍ୟରୁ ୧୯ ଜଣ, ଉତ୍ତରପ୍ରଦେଶର ୮୦ ଜଣଙ୍କ ମଧ୍ୟରୁ ୩୪ ଜଣ, ମହାରାଷ୍ଟ୍ରର ୪୮ ଜଣଙ୍କ ମଧ୍ୟରୁ ୧୭ ଜଣ, ପଶ୍ଚିମବଙ୍ଗର ୪୨ ଜଣଙ୍କ ମଧ୍ୟରୁ ୧୬ ଜଣ ଏବଂ ଆନ୍ଧ୍ରପ୍ରଦେଶର ୨୫ ଜଣଙ୍କ ମଧ୍ୟରୁ ୯ ଜଣ ସାଂସଦଙ୍କ ବିରୋଧରେ ଗୁରୁତର ଅପରାଧିକ ମାମଲା ରହିଛି। ହଂସାରିଆ କହିଛନ୍ତି ଯେ, ଜୁଲାଇ ୨୦୨୬ ସୁଦ୍ଧା ବର୍ତ୍ତମାନର ଓ ପୂର୍ବତନ ସାଂସଦ ଏବଂ ବିଧାୟକଙ୍କ ବିରୋଧରେ ମୋଟ ୪,୧୯୨ଟି ଅପରାଧିକ ମାମଲା ଶୁଣାଣି ପାଇଁ ବିଚାରାଧୀନ ରହିଛି। ଏଥିରେ ଉତ୍ତରପ୍ରଦେଶରେ ସର୍ବାଧିକ ୧,୧୭୧ଟି ମାମଲା ରହିଛି। ଆଇନଜୀବୀ ସ୍ନେହା କାଲିତାଙ୍କ ପକ୍ଷରୁ ଦାଖଲ ‘ଆମିକସ’ ରିପୋର୍ଟ ଅନୁସାରେ, ରାଜ୍ୟ ସଭାର ୨୩୩ ଜଣ ସଦସ୍ୟଙ୍କ ମଧ୍ୟରୁ ୭୫ ଜଣ, ଅର୍ଥାତ୍ ୩୩% ସଦସ୍ୟଙ୍କ ବିରୋଧରେ ଅପରାଧିକ ମାମଲା ରହିଛି। ଏଥିରୁ ୪୦ ଜଣ, ଅର୍ଥାତ୍ ୧୮% ସଦସ୍ୟଙ୍କ ବିରୋଧରେ ଗୁରୁତର ଅପରାଧ ସମ୍ବନ୍ଧୀୟ ମାମଲା ରହିଛି, ଯେଉଁଥିରେ ୫ ବର୍ଷ କିମ୍ବା ତା’ଠାରୁ ଅଧିକ ଜେଲ ଦଣ୍ଡ ହୋଇପାରେ। ଆମିକସ ସୁପ୍ରିମକୋର୍ଟଙ୍କୁ ଅନୁରୋଧ କରିଛନ୍ତି ଯେ, ବର୍ତ୍ତମାନର ଓ ପୂର୍ବତନ ବିଧାୟକଙ୍କ ବିରୋଧରେ ଥିବା ମାମଲାର ଶୁଣାଣି ପାଇଁ ସ୍ବତନ୍ତ୍ର ଅଦାଲତ ନିର୍ଦ୍ଧାରଣ କରାଯାଉ। ଏହା ସହ ସମ୍ପୃକ୍ତ ହାଇକୋର୍ଟଗୁଡ଼ିକୁ ଏହି ମାମଲାଗୁଡ଼ିକର ପ୍ରଗତି ଉପରେ ସକ୍ରିୟ ଭାବେ ନଜର ରଖିବାକୁ ନିର୍ଦ୍ଦେଶ ଦିଆଯାଉ।
