ମହାକାଳପଡ଼ା, ୯ା୧(ପ୍ରତାପ ଚନ୍ଦ୍ର ସ୍ବାଇଁ):ଭିନ୍ନକ୍ଷମମାନଙ୍କ ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ଯୋଜନା ପରେ ଯୋଜନା କାର୍ଯ୍ୟକାରୀ କରୁଛନ୍ତି। ହେଲେ ଗ୍ରାମାଞ୍ଚଳର ତୃଣମୂଳସ୍ତରରେ ଏହି ଯୋଜନା ଅପହଞ୍ଚ ହୋଇଛି। ଜନଜାତିଙ୍କ ବିକାଶ ଓ ସମାଜର ମୁଖ୍ୟସ୍ରୋତରେ ଏମାନଙ୍କୁ ସାମିଲ କରିବାକୁ ସରକାର ବ୍ୟବସ୍ଥା କରୁଥିଲେ ମଧ୍ୟ ପ୍ରଶାସନିକ ଆନ୍ତରିକତାର ଅଭାବ ଯୋଗୁ ଜନ କଲ୍ୟାଣ ଯୋଜନାରୁ ଜନଜାତି ବର୍ଗର ଭିନ୍ନକ୍ଷମଙ୍କୁ ହଇରାଣ ହେବାକୁ ପଡ଼ିଛି। ଏହାର ଏକ ଉଦାହରଣ ଦେଖିବାକୁ ମିଳୁଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ପେଟ୍ଛେଲା ପଞ୍ଚାୟତ ଆଖୁଗଡ଼ା ଆଦିବାସୀ ପଡ଼ାର ୪୮ ବର୍ଷୀୟ ଅବିବାହିତ ଜଗନ୍ନାଥ ମାଝୀଙ୍କ କ୍ଷେତ୍ରରେ। ଶିଶୁବେଳରୁ ମା’ବାପା ଭିନ୍ନକ୍ଷମ ଜଗନ୍ନାଥଙ୍କୁ କୋଳେଇ କାଖେଇ ସ୍ନେହ ଶ୍ରଦ୍ଧା ଯତ୍ନ କରିଥିଲେ। ମା’ବାପାଙ୍କ ପରେ ସେ ବେସାହାରା ହୋଇପଡ଼ିଛନ୍ତି। ଏବେ ସେ ବାଉଁଶ ବାଡ଼ି ସାହାରାରେ ଯାତାୟାତ କରୁଛନ୍ତି। ସରକାରୀ ଯୋଜନା ଭାବେ ମାସକୁ ୫ କିଲୋ ଚାଉଳକୁ ଛାଡ଼ିଦେଲେ ଆଉ କିଛି ସମ୍ବଳ ଜଗନ୍ନାଥଙ୍କ ପାଖରେ ନାହିଁ। ଆବାସ ଗୃହ ପାଇବାକୁ ବାରମ୍ବାର ଦୌଡ଼ି ଶେଷରେ ନିରାଶ ହେବାକୁ ପଡ଼ିଛି। ସରକାରଙ୍କ ପକ୍ଷରୁ ଏକ ଟ୍ରାଇ ସାଇକେଲ, ଆବାସ ଯୋଜନାରେ ପକ୍କାଘର ଓ ଭିନ୍ନକ୍ଷମ ଯୋଜନାରେ କିଛି ଆର୍ଥିକ ସହାୟତା ଯୋଗାଇଦେଲେ ନିଜେ ଆତ୍ମ ନିର୍ଭରଶୀଳ ହେବେ। ଯଦି ଜିଲା ପ୍ରଶାସନ ମୋ ଦୁଃଖ ନ ବୁଝିବେ, ମୁଖ୍ୟମନ୍ତ୍ରୀ ପାଖକୁ ଚିଠି ଲେଖିବି ବୋଲି ସେ କହିଛନ୍ତି।
