ବଲିଉଡର ବରିଷ୍ଠ ଅଭିନେତା ଧର୍ମେନ୍ଦ୍ରଙ୍କ ପ୍ରଶଂସକମାନଙ୍କ ପାଇଁ କିଛି ଆଶ୍ୱସ୍ତି ଆସିଛି। ତାଙ୍କୁ ଆଜି ସକାଳ ପ୍ରାୟ ୭:୩୦ ସମୟରେ ବ୍ରିଚ କ୍ୟାଣ୍ଡି ହସ୍ପିଟାଲରୁ ଡିସଚାର୍ଜ କରାଯାଇଛି। ତାଙ୍କ ପରିବାର ତାଙ୍କୁ ଘରେ ଚିକିତ୍ସା କରିବାକୁ ନିଷ୍ପତ୍ତି ନେଇଥିଲେ ଏବଂ ତାଙ୍କୁ ସକାଳେ ସମ୍ପୂର୍ଣ୍ଣ ଆବଦ୍ଧ ଆମ୍ବୁଲାନ୍ସରେ ଘରକୁ ଅଣାଯାଇଥିଲା। ତାଙ୍କ ପୁଅ ବବି ଦେଓଲ ଡିସଚାର୍ଜ ହେବା ପୂର୍ବରୁ ହସ୍ପିଟାଲରେ ପହଞ୍ଚିଥିଲେ। ବର୍ତ୍ତମାନ ‘ହି-ମ୍ୟାନ’ ଘରେ ଅଛନ୍ତି ଏବଂ ତାଙ୍କ ସ୍ବାସ୍ଥ୍ୟାବସ୍ଥାରେ କ୍ରମାଗତ ଉନ୍ନତି ହେଉଛି।
ସନି ଦେଓଲଙ୍କ ଟିମ୍ ଧର୍ମେନ୍ଦ୍ରଙ୍କ ସଦ୍ୟତମ ସ୍ବାସ୍ଥ୍ୟ ଅପଡେଟ ଶେୟାର କରିଛନ୍ତି। ଟିମ୍ ଏହାର ବିବୃତ୍ତିରେ କହିଛି, ‘ସାର୍ ଭଲ ହେଉଛନ୍ତି ଏବଂ ଚିକିତ୍ସା ତାଙ୍କ ଉପରେ ପ୍ରଭାବ ପକାଉଛି। ଆସନ୍ତୁ ଆମେ ସମସ୍ତେ ତାଙ୍କ ସୁସ୍ଥତା ଏବଂ ଦୀର୍ଘ ଜୀବନ ପାଇଁ ପ୍ରାର୍ଥନା କରିବା।
ସେହପରି ଧର୍ମେନ୍ଦ୍ରଙ୍କ ପରିବାର ପକ୍ଷରୁ ଏବେ ସରକାରୀ ସୂଚନା ଜାରି କରାଯାଇଛି, ଏଥିରେ କୁହାଯାଇଛି ଯେ, ଆମେ ଗଣମାଧ୍ୟମ ଏବଂ ଜନସାଧାରଣଙ୍କୁ ଅଧିକ ଅନୁମାନରୁ ନିବୃତ୍ତ ରହିବାକୁ ଅନୁରୋଧ କରୁଛୁ। ଦୟାକରି ତାଙ୍କର ଏବଂ ତାଙ୍କ ପରିବାରର ଗୋପନୀୟତାକୁ ସମ୍ମାନ କରନ୍ତୁ। ତାଙ୍କ ଶୀଘ୍ର ଆରୋଗ୍ୟ, ସୁସ୍ଥତା ଏବଂ ଦୀର୍ଘ ଜୀବନ ପାଇଁ ଆମେ ସମସ୍ତଙ୍କର ପ୍ରେମ, ପ୍ରାର୍ଥନା ଏବଂ ଶୁଭକାମନା ପାଇଁ କୃତଜ୍ଞ। ଦୟାକରି ତାଙ୍କୁ ସମ୍ମାନ କରନ୍ତୁ, କାରଣ ସେ ଆପଣଙ୍କୁ ଭଲ ପାଆନ୍ତି।
ଚଳିତବର୍ଷ ଏପ୍ରିଲରେ ଧର୍ମେନ୍ଦ୍ରଙ୍କ ଆଖି ଅସ୍ତ୍ରୋପଚାର କରାଯାଇଥିଲା। ଗୋଟିଏ ଆଖିରେ ଝାପ୍ସା ଦୃଷ୍ଟି ଯୋଗୁ ତାଙ୍କର କର୍ଣ୍ଣିଆ ପ୍ରତିରୋପଣ ଅସ୍ତ୍ରୋପଚାର କରାଯାଇଥିଲା। ତାଙ୍କର ମୋତିଆବିନ୍ଦୁ ଅସ୍ତ୍ରୋପଚାର ମଧ୍ୟ କରାଯାଇଥିଲା।
ଧର୍ମେନ୍ଦ୍ର ଶେଷ ଥର ପାଇଁ କ୍ରିତି ସାନନ ଏବଂ ଶାହିଦ କପୁରଙ୍କ ଚଳଚ୍ଚିତ୍ର ‘ତେରି ବାତେଁ ମେ ଐସା ଉଲଜା ଜିୟା’ରେ ନଜର ଆସିଥିଲେ। ସେ ପରବର୍ତ୍ତୀ ଚଳଚ୍ଚିତ୍ର ‘21’ରେ ଦେଖାଯିବେ। ଶ୍ରୀରାମ ରାଘବନଙ୍କ ନିର୍ଦ୍ଦେଶିତ ଏହି ଫିଲ୍ମରେ ଅମିତାଭ ବଚ୍ଚନଙ୍କ ନାତି ଅଗସ୍ତ୍ୟ ନନ୍ଦାଙ୍କ ପିତା ଭୂମିକାରେ ଅଭିନୟ କରିବେ। ଏହି ଚଳଚ୍ଚିତ୍ରଟି ୨୫ ଡିସେମ୍ବର, ୨୦୨୫ରେ ସିନେମା ହଲରେ ଆସିବ।
Dharitri – Odisha’s No.1 Odia Daily
