ଅମରପାଲି,୧୦ା୯(ପୀତାମ୍ବର ସାହୁ):ଜାତୀୟସ୍ତରୀୟ ଆଥଲେଟିକରେ ଅଂଶଗ୍ରହଣ କରିବେ ସୁମନ୍ତି ରାଜହଂସ। ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ସଂଗ୍ରାମପୁର ପଞ୍ଚାୟତ ସେରଗେଡା ସରକାରୀ ୟୁପିର ଅଷ୍ଟମ ଶ୍ରେଣୀର ଛାତ୍ରୀ ସୁମନ୍ତି ୩୬ତମ ପୂର୍ବାଞ୍ଚଳ ଜୁନିୟର ଆଥଲେଟିକ ଚାମ୍ପିୟନଶିପ-୨୦୨୫ରେ ସଫଳତା ପାଇ ଜାତୀୟସ୍ତରରେ ଅଂଶଗ୍ରହଣ କରିବାକୁ ଯୋଗ୍ୟ ବିବେଚିତ ହୋଇଛନ୍ତି। ଚଳିତ ସେପ୍ଟେମ୍ବର ୬ ଓ ୭ରେ କଟକ ବାରବାଟୀ ଷ୍ଟାଡିୟମରେ ହୋଇଥିବା ୩୬ତମ ପୂର୍ବାଞ୍ଚଳ ଜୁନିୟର ଆଥଲେଟିକ ଚାମ୍ପିୟନଶିପରେ ଟ୍ରାଇଥଲନ-ସିର ୧୪ବର୍ଷରୁ କମ୍ ବାଳିକା ବର୍ଗରେ ସେ ଅଂଶଗ୍ରହଣ କରି ଏହି ସଫଳତା ପାଇଛନ୍ତି। ଏଥିରେ ହୋଇଥିବା ୬୦ମିଟର ଦୌଡ ଓ ୬ଶହ ଦୌଡ଼ ପ୍ରତିଯୋଗିତାରେ ପ୍ରଥମ ସ୍ଥାନ ଏବଂ ଲମ୍ବଡ଼ିଆଁ ପ୍ରତିଯୋଗିତାରେ ଦ୍ୱିତୀୟ ସ୍ଥାନ ହାସଲ କରି ଜାତୀୟ ଖେଳିବାକୁ ଯୋଗ୍ୟ ହୋଇଛନ୍ତି। ସେ ଆସନ୍ତା ୨୨ରୁ ୨୪ତାରିଖ ପର୍ଯ୍ୟନ୍ତ ଝାଡ଼ଖଣ୍ଡର ରାଞ୍ଚିରେ ହେବାକୁ ଥିବା ଜାତୀୟସ୍ତରୀୟ ଆଥଲେଟିକରେ ୧୪ବର୍ଷରୁ କମ ବାଳିକା ବର୍ଗର ଟ୍ରାଇଥଲନ-ସି ରେ ୬୦ମିଟର ଦୌଡ, ୬ଶହ ମିଟର ଦୌଡ ଓ ଲମ୍ବଡ଼ିଆଁରେ ଅଂଶଗ୍ରହଣ କରିବେ। ସେ ଗତବର୍ଷ ମଧ୍ୟ ସ୍କୁଲସ୍ତରୀୟ ଜାତୀୟ ଖେଳକୁଦରେ ୬ଶହ ମିଟର ଦୌଡ ପ୍ରତିଯୋଗିତାରେ ଅଂଶଗ୍ରହଣ କରିଥିଲେ। ତାଙ୍କର ଏହି ସଫଳତାରେ ବୀରମହାରାଜପୁର ବିଧାୟକ ଇଂ. ରଘୁନାଥ ଜଗଦଲା, ପଞ୍ଚାୟତ ସମିତି ଅଧ୍ୟକ୍ଷା ଶାନ୍ତି ଲୁହା, ଉପାଧ୍ୟକ୍ଷ ନାରାୟଣ ଲୁହା, ପ୍ରଶିକ୍ଷକ ମହମ୍ମଦ କଲିମ, ସେରଗେଡ଼ା ସ୍କୁଲ ପ୍ରଧାନ ଶିକ୍ଷକ ବିଜୟ କୁମାର ମହାପାତ୍ର, ଶିକ୍ଷକ ସୁନୀଲ କୁମାର ମହାପାତ୍ର, ସଞ୍ଜୀବ କୁମାର ବାରିକ, କରୁଣାକର ମହାନନ୍ଦ, ମଧୁସୂଦନ ସାହୁ ଏବଂ ଅଞ୍ଚଳର କ୍ରୀଡାବିତ ଶୁଭେଚ୍ଛା ଜଣାଇଛନ୍ତି। ତାଙ୍କ ବାପା ମାନଭଞ୍ଜନ ରାଜହଂସ ଓ ମା’ କେତକୀ ରାଜହଂସ ଶ୍ରମିକ ଶ୍ରେଣୀର ହୋଇଥିବା ବେଳେ ଝିଅର ଏହି ସଫଳତା ପାଇଁ ସେମାନେ ଖୁସିବ୍ୟକ୍ତ କରିଛନ୍ତି।
