ଶ୍ରୀନଗର/ନୂଆଦିଲ୍ଲୀ,୧୨ା୮:ଜମ୍ମୁ-କଶ୍ମୀରକୁ ସ୍ବତନ୍ତ୍ର ମାନ୍ୟତା ପ୍ରଦାନକାରୀ ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦର ତୃତୀୟ ବର୍ଷ ପୂର୍ତ୍ତିକୁ ୬ ଦିନ ବିତିଛି ଏବଂ ଦେଶ ସ୍ବାଧୀନତାର ୭୬ତମ ବର୍ଷ ପାଳନକୁ ୪ ଦିନ ବାକି ଅଛି। ଭାରତୀୟ ସେନାକୁ ପ୍ରତିହତ କରିବା ପାଇଁ ଏଭଳି ସମୟକୁ ବାଛିଛନ୍ତି ପାକିସ୍ତାନୀ ଆତଙ୍କବାଦୀ। ୨ ଜଣ ଜୈଶ୍ ଆମତ୍ଘାତୀ ଜମ୍ମୁରୁ ୧୮୫ କି.ମି. ଦୂର ପରଗଲ ସେନା ଶିବିରର ସୁରକ୍ଷା ବଳୟକୁ ଭେଦକରି ବୁଧବାର ରାତି ୨ଟାରେ ଅନୁପ୍ରବେଶ ଉଦ୍ୟମ କରିଥିଲେ। ସେତେବେଳେ ଗୁଳି ଫୁଟିବାର ପ୍ରଥମ ଶବ୍ଦ ଶୁଣିବାକୁ ମିଳିଥିଲା। ସକାଳ ୬ଟା ୧୦ ମିନିଟରେ ଶେଷ ଗୁଳି ଫୁଟିଥିବା ଜଣେ ପ୍ରତ୍ୟକ୍ଷଦର୍ଶୀ କହିଛନ୍ତି।
କେନ୍ଦ୍ରଶାସିତ ଅଞ୍ଚଳ ଜମ୍ମୁ-କଶ୍ମୀରର ରାଜୌରି ଜିଲା ସ୍ଥିତ ଏକ ସେନା ଶିବିରକୁ ଗୁରୁବାର ଭୋର ସମୟରେ ପାକିସ୍ତାନର ଜୈଶ୍-ଇ-ମହମ୍ମଦ (ଜେଇଏମ୍) ଆତଙ୍କବାଦୀମାନେ ଟାର୍ଗେଟ କରିଛନ୍ତି। ସେମାନଙ୍କ ଆମତ୍ଘାତୀ ଆକ୍ରମଣକୁ ପଣ୍ଡ କରିବାକୁ ଯାଇ ୪ ଯବାନ ଶହୀଦ ହୋଇଛନ୍ତି। ୪ ଘଣ୍ଟା ଧରି ଗୁଳି ବିନିମୟ ଚାଲିଥିବାବେଳେ ସେନାର ଜବାବୀ କାର୍ଯ୍ୟାନୁଷ୍ଠାନରେ ୨ ଆତଙ୍କବାଦୀ ନିହତ ହୋଇଛନ୍ତି।
ରାଜୌରିର ପରଗଲରେ ଥିବା ସେନାର ରାଜ ରାଇଫଲ୍ସ ଶିବିରରେ ଭୋର ସମୟରେ ୨ ଆତଙ୍କବାଦୀଙ୍କ ସନ୍ଦେହଜନକ ଗତିବିଧିକୁ ଲକ୍ଷ୍ୟକରି ସେଣ୍ଟ୍ରି ସତର୍କ କରାଇଥିଲେ। ଖରାପ ପାଗ ଓ ଘଞ୍ଚ ଜଙ୍ଗଲର ଫାଇଦା ନେଇ ସଶସ୍ତ୍ର ଆତଙ୍କବାଦୀ ଦ୍ୱୟ ଅନୁପ୍ରବେଶ କରିଥିଲେ। ଯବାନମାନେ ଗ୍ରେନେଡ୍ଧାରୀ ଆତଙ୍କବାଦୀଙ୍କୁ ଚ୍ୟାଲେଞ୍ଜ କରିଥିଲେ। ଉଭୟ ପକ୍ଷ ମଧ୍ୟରେ ଦୀର୍ଘ ୪ ଘଣ୍ଟା ଧରି ଗୁଳି ବିନିମୟ ଚାଲିଥିଲା। ଏଥିରେ ଦୁଇ ଆତଙ୍କବାଦୀ ନିହତ ହୋଇଥିଲେ। ଆତଙ୍କବାଦୀଙ୍କ ଗୁଳିମାଡ଼ରେ ୬ ଜଣ ଯବାନ ଆହତ ହୋଇଥିଲେ। ଆହତ ଯବାନଙ୍କ ମଧ୍ୟରୁ ୪ ଜଣ ଶହୀଦ ହୋଇଛନ୍ତି। ସେମାନେ ହେଲେ ରାଜସ୍ଥାନ ଝୁନ୍ଝୁନୁ ଜିଲା ମାଲିଗୋଭେନ୍ ଗ୍ରାମର ସୁବେଦାର ରାଜେନ୍ଦ୍ର ପ୍ରସାଦ, ତାମିଲନାଡୁର ମଦୁରାଇ ଜିଲା ଟି. ପୁଡୁପଟ୍ଟି ଗ୍ରାମର ରାଇଫଲମ୍ୟାନ୍ ଡି. ଲକ୍ଷ୍ମଣନ୍ ଏବଂ ହରିୟାଣାର ଦୁଇ ଜଣ ରାଇଫଲମ୍ୟାନ୍ ମନୋଜ କୁମାର ଓ ନିଶାନ୍ତ ମଲିକ। ମନୋଜ ଫରିଦାବାଦ ଅନ୍ତର୍ଗତ ଶାହଜାହାନପୁର ଗ୍ରାମ ବାସିନ୍ଦା ହୋଇଥିବାବେଳେ ନିଶାନ୍ତଙ୍କ ଘର ହିସାର ଜିଲା ଆଦର୍ଶନଗରରେ। ଶହୀଦ ହୋଇଥିବା କର୍ତ୍ତବ୍ୟରତ ବୀର ଯବାନଙ୍କ ସର୍ବୋଚ୍ଚ ବଳିଦାନ ବେକାର ଯିବନାହିଁ। ରାଷ୍ଟ୍ର ସେମାନଙ୍କୁ ସର୍ବଦା ମନେରଖିବ ବୋଲି ଜମ୍ମୁର ପ୍ରତିରକ୍ଷା ଲୋକସମ୍ପର୍କ ଅଧିକାରୀ ଲୁଟ୍ନାଣ୍ଟ କଲୋନେଲ ଦେବେନ୍ଦ୍ର ଆନନ୍ଦ କହିଛନ୍ତି। କୋମ୍ବିଂ ଓ ତଲାସି ଅଭିଯାନ ଜାରି ରହିଥିବା ଜମ୍ମୁ-କଶ୍ମୀର ପୋଲିସ ମହାନିର୍ଦ୍ଦେଶକ ଦଲବୀର ସିଂ ସୂଚନା ଦେଇଛନ୍ତି।
