ଭୁବନେଶ୍ୱର,୩।୮ (ବ୍ୟୁରୋ): ନୟାପଲ୍ଲୀ ଥାନା ଅଞ୍ଚଳରେ ମଙ୍ଗଳବାର ଜଣେ ବ୍ୟକ୍ତି ଆତ୍ମହତ୍ୟା କରିଛନ୍ତି। ସେ ହେଲେ ସିବିଆଇ କାର୍ଯ୍ୟାଳୟ ନିକଟ ନୀଳପାଣିଟାଙ୍କି ବସ୍ତିର ଗଙ୍ଗାଧର ସ୍ବାଇଁ (୫୯)। କ୍ୟାପିଟାଲ ହସ୍ପିଟାଲରେ ମୃତଦେହ ବ୍ୟବଚ୍ଛେଦ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଏନେଇ ପୋଲିସ ଏକ ଅପମୃତ୍ୟୁ ମାମଲା (୬୨/୨୦୨୨) ରୁଜୁ କରି ତଦନ୍ତ ଚଳାଇଛି। ଆର୍ଥିକ ଅନଟନରୁ ସୃଷ୍ଟି ହୋଇଥିବା ପାରିବାରିକ ବିବାଦକୁ ନେଇ ଗଙ୍ଗାଧର ଆତ୍ମହତ୍ୟା କରିଥାଇପାରନ୍ତି ବୋଲି ଥାନାଧିକାରୀ ବିଶ୍ୱରଞ୍ଜନ ସେନାପତି କହିଛନ୍ତି।
ସୂଚନା ଅନୁଯାୟୀ, ଗଙ୍ଗାଧର ଏକ ଘରୋଇ କମ୍ପାନୀରେ ଚାକିରି କରିବା ସହ ସ୍ତ୍ରୀ, ଦୁଇ ପୁଅ ଓ ଝିଅଙ୍କ ସହ ସେଠରେ ରହୁଥିଲେ। ଗତ କିଛିମାସ ହେବ ଅର୍ଥ ପାଇଁ ପରିବାର ମଧ୍ୟରେ ଅଶାନ୍ତି ଲାଗି ରହୁଥିଲା। ମଙ୍ଗଳବାର ସକାଳେ ଗଙ୍ଗାଧର କମ୍ପାନୀ ନ ଯାଇ ଘରେ ଥିଲେ। ପିଲାମାନେ କଲେଜକୁ ଯାଇଥିଲେ। ମଧ୍ୟାହ୍ନରେ ସ୍ତ୍ରୀ ଘର ବାରଣ୍ଡାରେ ବସିଥିବାବେଳେ ଗଙ୍ଗାଧର ହଠାତ ଏକ ରୁମ୍ର କବାଟ ବନ୍ଦ କରିଦେଇଥିଲେ। ସ୍ତ୍ରୀ ଡାକିଥିଲେ ମଧ୍ୟ ସେ କବାଟ ଖୋଲି ନ ଥିଲେ। ପଡୋଶୀମାନେ କବାଟ ଭାଙ୍ଗିବା ପରେ ଏକ ଜିଆଇ ତାରରେ ଘର ଓରାରେ ଗଙ୍ଗାଧର ଝୁଲି ପଡ଼ିଥିବା ଦେଖିଥିଲେ। ତାଙ୍କୁ ତୁରନ୍ତ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସ ହସ୍ପିଟାଲରେ ପହଞ୍ଚି ମୃତଦେହ ଜବତ କରିଥିଲା।
