ପୁରୀ ଅଫିସ,୨୯ା୭: ଉଗ୍ରରୂପ ଧାରଣ କରିଛି ମହାମାରୀ କରୋନା। ପ୍ରତିଦିନ ହଜାର ହଜାର ଲୋକ ଏହି ପ୍ରାଣଘାତୀ ଭୂତାଣୁର ଶିକାର ହେଉଛନ୍ତି। ମୃତ୍ୟୁ ସଂଖ୍ୟା ବି ହୁ ହୁ ହୋଇ ବଢୁଛି। ଏ ପର୍ଯ୍ୟନ୍ତ କରୋନାଠୁ ରକ୍ଷା ପାଇବା ପାଇଁ କୌଣସି ଔଷଧ ବାହାରି ନ ଥିବାରୁ ସତର୍କତା ଏବଂ ସଚେତନତା ଉପରେ ଗୁରୁତ୍ୱ ଦିଆଯାଉଛି। ମାସ୍କ ପିନ୍ଧିବା, ସାମାଜିକ ଦୂରତ୍ୱ ରକ୍ଷା ସହ ହାତକୁ ସାନିଟାଇଜ କରିବା ଦରକାର। ଏହାକୁ ଉପଲବ୍ଧି କରି ଜଣେ ଦଶମ ଶ୍ରେଣୀ ଛାତ୍ର ସାନିଟାଇଜର ପେଡାଲ ଷ୍ଟାଣ୍ଡ ତିଆରି କରିଛନ୍ତି। ସେ ହେଲେ ପୁରୀର ଘନଶ୍ୟାମ ହେମଲତା ବିଦ୍ୟାମନ୍ଦିର ଆବାସିକ ବିଦ୍ୟାଳୟରେ ପଢୁଥିବା ଶୁଭ୍ରଜ୍ୟୋତି ମହାନ୍ତି। ସେ ଏହି ସାନିଟାଇଜର ଷ୍ଟାଣ୍ଡ ନିର୍ମାଣ ପରେ ବିଦ୍ୟାଳୟର ନିର୍ଦ୍ଦେଶକ ତନ୍ମୟ କୁମାର ଜେନାଙ୍କୁ ପ୍ରଦାନ କରିଛନ୍ତି।
ଶୁଭ୍ରଜ୍ୟୋତି କହିଛନ୍ତି, ବର୍ତ୍ତମାନ କରୋନା ପାଇଁ ସ୍କୁଲ ବନ୍ଦ ରହିଛି। ସ୍କୁଲ ଖୋଲିବା ପରେ ଛାତ୍ରୀଛାତ୍ରମାନେ କିପରି ଜୀବାଣୁମୁକ୍ତ ହୋଇ ଶ୍ରେଣୀରେ ବସିବେ ସେଥିପାଇଁ ସେ ଚିନ୍ତା କରି ପାଦରେ ଚାଳନା କରାଯାଇପାରୁଥିବା ସାନିଟାଇଜର ପେଡାଲ ଷ୍ଟାଣ୍ଡ ତିଆରି କରିଛନ୍ତି। ବିଦ୍ୟାଳୟରେ ମଧ୍ୟାହ୍ନଭୋଜନ ସମୟରେ ଛାତ୍ରୀଛାତ୍ରମାନେ ହାତ ଧୋଇବାକୁ ତରଳ ସାବୁନ (ଲିକ୍ୟୁଇଡ୍ ସୋପ୍)କୁ ମଧ୍ୟ ଏହି ଷ୍ଟାଣ୍ଡ ମାଧ୍ୟମରେ ବ୍ୟବହାର କରିପାରିବେ। ଏଥିସହ ୫ ଲିଟର ଡବାରେ ଏକ ଅଟୋମେଟିକ ହ୍ୟାଣ୍ଡ ସାନିଟାଇଜର ମେଶିନ ତିଆରି କରିଥିଲେ। ମାତ୍ର କାନ୍ଥରେ ଟାଙ୍ଗିବାକୁ ଅସୁବିଧା ହେବାରୁ ୧ ଲିଟର ଡବା ଓ ୪ ଇଞ୍ଚର ପାଣି ପାଇପ କନେକ୍ଟର ବ୍ୟବହାର କରିଛନ୍ତି। ଏଥିରେ ରିଚାର୍ଜ ହୋଇ ପାରୁଥିବା ବ୍ୟାଟେରି ବ୍ୟବହାର କରାଯାଇଛି, ଯାହାକି ମୋବାଇଲ ଚାର୍ଜରରେ ଚାର୍ଜ ହୋଇପାରିବ। ଏହାବ୍ୟତୀତ ସେ ମୋଟା ଜରି, ଫିତା ଓ ଅଠାରେ ମାସ୍କ ପ୍ରସ୍ତୁତ କରିଛନ୍ତି।
