ଜାମଟିକ୍ରା,୧ା୫(ଡି.ଏନ୍.ଏ.): ବରଗଡ ଜିଲା ଅତାବିରା ବ୍ଲକ ମନାପଡା ପଞ୍ଚାୟତ ଲୁରୁପାଲି ଗ୍ରାମର ମଳୟ ପଧାନ(୪୧) ବର୍ତ୍ତମାନ ଅଜଣା ରୋଗରେ ପୀଡିତ ହୋଇଛନ୍ତି। ଅଭାବ ଅନଟନ ଯୋଗୁ ତାଙ୍କର ଉପଯୁକ୍ତ ଚିକିତ୍ସା ହୋଇପାରୁନାହିଁ। ଫଳରେ ସେ ଭାଗ୍ୟକୁ ଆଦରି ଘରେ ପଡିରହିଛନ୍ତି।
ମଳୟ ଜଣେ ଶିକ୍ଷିତ ଏବଂ ସେ ଗୋଟିଏ ସଂସ୍ଥାରେ ସିକ୍ୟୁରିଟି ଗାର୍ଡ ହିସାବରେ କାମ କରୁଥିଲେ। ୨୦୨୧ ନଭେମ୍ବର ୫ରେ ରେଙ୍ଗାଲି କ୍ୟାମ୍ପରେ ଏକ ସଡ଼କ ଦୁର୍ଘଟଣାରେ ତାଙ୍ଗ ଡାହାଣ ଗୋଡ ଭାଙ୍ଗିଯାଇଥିଲା। ସେ ଆୟୁର୍ବେଦ ଚିକିତ୍ସା କରି ଭଲ ହୋଇଗଲେ। କିନ୍ତୁ ପରବର୍ତ୍ତୀ ସମୟରେ ତାଙ୍କୁ ଆଉ ଗୋଟିଏ ଅଜଣା ରୋଗ ମାଡି ବସିଲା। ତାଙ୍କ ପେଟରେ ମଇଳା ପାଣି ଜମି ରହିବାରୁ ଗତ ଜାନୁୟାରୀ ମାସରେ ତାଙ୍କର ଅସ୍ତ୍ରୋପଚାର କରି ମଳନଳୀ ବାହାର କରାଯାଇଥିଲା। ଅଭାବ ଯୋଗୁ ସେ ଔଷଧ ମଧ୍ୟ ଖାଇ ପାରୁନାହାନ୍ତି। ଆଉ ତିନିମାସ ପରେ ପୁଣି ଗୋଟିଏ ଅସ୍ତ୍ରୋପଚାର କରାଯିବ । କିନ୍ତୁ ତାଙ୍କ ପାଖରେ ଟଙ୍କା ନାହିଁ । ସରକାରୀ ସହାୟତା କହିଲେ ତାଙ୍କ ମା’ ଜେମା ଦେଈ ପାଉଛନ୍ତି ମାସିକ ୫ଶହ ଟଙ୍କା ଓ ୧୦ କେଜି ଚାଉଳ। ଏହି ସହାୟତାରେ ମା’ ପୁଅଙ୍କୁ ଚଳିବା କଷ୍ଟକର ହୋଇପଡୁଛି। ଯେଉଁ ଅଳ୍ପ ଜମି ଅଛି ତାହା ବନ୍ଧକ ପଡିଛି। ବର୍ଷା ଦିନେ ଘରେ ପାଣି ଗଳୁଛି। ଅତି ଦୟନୀୟ ଅବସ୍ଥାରେ ମା’ ପୁଅ ଚଳୁଛନ୍ତି। ସରକାର କିମ୍ବା କୌଣସି ସହୃଦୟ ବ୍ୟକ୍ତି ସହଯୋଗ କଲେ ମଳୟଙ୍କ ଅସ୍ତ୍ରୋପଚାର ହୋଇ ସେ ପୂର୍ବ ଅବସ୍ଥାକୁ ଫେରିପାରିବେ ବୋଲି ଜେମା ଦେଈ ପ୍ରକାଶ କରିଛନ୍ତି।
