ଭୋଗରାଇ,୨୮।୨(ପ୍ରଦୀପ ଦାସ): ୧୪ ଦଫା ଦାବି ନେଇ ବାଲେଶ୍ୱର ଜିଲା ଭୋଗରାଇ ନିର୍ବାଚନ ମଣ୍ଡଳୀର ଏସ୍ୟୁସିଆଇ(କମ୍ୟୁନିଷ୍ଟ) ଶାଖା ପକ୍ଷରୁ ଶୁକ୍ରବାର ଏକ ବଡ଼ ଧରଣର ବିକ୍ଷୋଭ ପ୍ରଦର୍ଶନ କରାଯାଇଛି। ଏସ୍ୟୁସିଆଇ କର୍ମକର୍ତ୍ତା ଏକାଠି ହୋଇ ଭୋଗରାଇ ଥାନା ଛକ ବସ୍ଷ୍ଟାଣ୍ଡରୁ ଏକ ଶୋଭାଯାତ୍ରାରେ ବାହାରି ଭୋଗରାଇ ବ୍ଲକ ସମ୍ମୁଖରେ ପହଞ୍ଚି ବିକ୍ଷୋଭ ପ୍ରଦର୍ଶନ କରିଛନ୍ତି।
ବିକ୍ଷୋଭ ବେଳେ ଆନ୍ଦୋଳନକାରୀ ବିଭିନ୍ନ ଦାବି ଉପସ୍ଥାପନ କରିଥିଲେ। ସୁବର୍ଣ୍ଣରେଖା ସଂସ୍କାର ଯୋଜନା, ଦକ୍ଷିଣ ଭୋଗରାଇର ପାଣି ନିଷ୍କାସନ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟକାରୀ କରିବା, ବିଦ୍ୟୁତ୍ ପ୍ରିପେ ସ୍ମାର୍ଟ ମିଟର ଯୋଜନା ପ୍ରତ୍ୟାହାର କରିବା, ଘରୋଇ ଗ୍ରାହକଙ୍କୁ ୩ଶହ ୟୁନିଟ ବିଦ୍ୟୁତ୍ ନିଃଶୁଳ୍କ ଯୋଗାଇଦେବା, ଅଗଣତାନ୍ତ୍ରିକ ଜାତୀୟ ଶିକ୍ଷାନୀତି ୨୦୨୦କୁ ବାତିଲ କରି ସାର୍ବଜନୀନ ଗଣତାନ୍ତ୍ରିକ ଧର୍ମନିରପେକ୍ଷ ବିଜ୍ଞାନ ସମ୍ମତ ଶିକ୍ଷା ପଦ୍ଧତି ପ୍ରଚଳନ କରିବା, ଡାକ୍ତରଖାନାଗୁଡିକରେ ଡାକ୍ତର, ନର୍ସ ଏବଂ କର୍ମଚାରୀଙ୍କୁ ନିଯୁକ୍ତି ଦେଇ ଆବଶ୍ୟକୀୟ ଉଚ୍ଚମାନର ସ୍ବାସ୍ଥ୍ୟ ସେବା ଯୋଗାଇଦେବା, ସରକାର ସିଧାସଳଖ କୃଷକଙ୍କ ଠାରୁ କୃଷିଜାତ ସାମଗ୍ରୀ କିଣି ଶୀତଳଭଣ୍ଡାର ପ୍ରତିଷ୍ଠା କରିବା, ମାଙ୍କଡ଼ ଉପଦ୍ରବରେ ଚାଷୀଙ୍କୁ ସୁରକ୍ଷା ଯୋଗାଇ ଦେବାମୁ ଦାବି କରାଯାଇଥିଲା।
ଏପରିକି ବିକ୍ଷୋଭକାରୀମାନେ ହାତରେ ବିଭିନ୍ନ ପ୍ଲାକକାର୍ଡ ଧରି ସରକାରଙ୍କ ବିରୋଧରେ ବିଭିନ୍ନ ସ୍ଲୋଗାନ ଦେଇଥିଲେ l ଦୀର୍ଘ ସମୟ ବିକ୍ଷୋଭ ପରେ ଏସ୍ୟୁସିଆଇର ସଦସ୍ୟ କ୍ରିଷ୍ନା ରାଣୀ ସାହୁ, ଜିଲା ସମ୍ପାଦକ ନିରାକାର ପାଣ୍ଡ, ଉମାକାନ୍ତ ଦାସ, ସସ୍ମିତା ମାହାନ୍ତି, ହରେକୃଷ୍ଣ ଦାସ କଳ୍ପନା ଦାସ ପ୍ରମୁଖ ସରାକର ଦାବି ନ ମାନିଲେ ଆନ୍ଦୋଳନକୁ ଜୋରଦାର କରାଯିବ ବୋଲି ଚେତାବନୀ ଦେଇଥିଲେ l ପରେ ଏକ ପ୍ରତିନିଧି ଦଳ ଭୋଗରାଇ ବିଡ଼ିଓ ପ୍ରଶାନ୍ତ ମହାରଣାଙ୍କୁ ଭେଟି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ସ୍ମାରକ ପତ୍ର ପ୍ରଦାନ କରିଥିଲେ l
