ରାଞ୍ଚି,୭।୧୨: ଝାଡଖଣ୍ଡର ପୂର୍ବ ସିଂହବୁମ ଜଲାରେ ଏକ ଅଜବ ମାମଲା ସାମ୍ନାକୁ ଆସିଛି। ଏଠାରେ ବ୍ୟାଙ୍କ ଅଫିସର ସ୍ବାମୀ ଚତୁର୍ଥୀ ରାତିରେ ସ୍ତ୍ରୀଙ୍କ ଆଗରେ ଏପରି ସର୍ତ୍ତ ରଖିଥିଲେ ଯେ, ଏବେ ଛାଡପତ୍ର ପର୍ଯ୍ୟନ୍ତ କଥା ପହଞ୍ଚିଛି। ଫଳରେ ନବବିବାହିତା ଘର ସଜାଡିବା ପୂର୍ବରୁ ଉଜୁଡିବା ଭଳି ପରିସ୍ଥିତି ସୃଷ୍ଟି ହୋଇଛି। ବିବାହର ପ୍ରଥମ ରାତିରେ ମହିଳା ଜଣକ ତାଙ୍କ ସ୍ବାମୀଙ୍କ ଅଜବ ଅବସ୍ଥା ଶୁଣିବା ପରେ ପୋଲିସ ପାଖରେ ପହଞ୍ଚିଥିଲେ। ବିବାହ ପରେ ହନିମୁନ ଯିବା ପରିବର୍ତ୍ତେ ମହିଳା ଜଣକ କୋର୍ଟ ଏବଂ ପୋଲିସ ଷ୍ଟେଶନକୁ ଯିବାକୁ ବାଧ୍ୟ ହୋଇଛନ୍ତି।
ସୂଚନାନୁସାରେ, ଏହି ମାମଲା ପୂର୍ବ ସିଂହବୁମ ଜିଲାର ପୋଟକା ପୋଲିସ ଷ୍ଟେଶନ ଅଞ୍ଚଳର ଅଟେ। ଏଠାରେ ଥିବା ଏକ ଗାଁର ଜଣେ ଯୁବତୀ ୧୮ ଜୁନ ୨୦୧୮ ରେ ହିନ୍ଦୁ ରୀତିନୀତି ଅନୁଯାୟୀ ପାରସୁଦିର ଜଣେ ଯୁବକଙ୍କୁ ବିବାହ କରିଥିଲେ। ଯୁବକ ଜଣେ ଏମବିଏ ପଢିବା ପରେ ଲକ୍ଷ୍ନୌ ସ୍ଥିତ ଏକ ବ୍ୟାଙ୍କରେ ଆସିଷ୍ଟାଣ୍ଟ ମ୍ୟାନେଜର ଭାବରେ କାର୍ଯ୍ୟ କରୁଥିଲେ। ଯୁବତୀ ଜଣକ କହିଛନ୍ତି ଯେ, ବିବାହ ପରେ ପ୍ରଥମ ରାତିରେ ସ୍ବାମୀ ତାଙ୍କ ସାମ୍ନାରେ ୨ ବର୍ଷ ମଧ୍ୟରେ ଆଇଏସ ହେବା ପାଇଁ ଏକ ସର୍ତ୍ତ ରଖିଥିଲେ। ଯଦି ସେ ଏହା କରିବାକୁ ସକ୍ଷମ ନୁହଁନ୍ତି ତେବେ ସ୍ବାମୀ-ସ୍ତ୍ରୀଙ୍କ ମଧ୍ୟରେ ସମ୍ପର୍କ ଶେଷ ହେବ। ପ୍ରାରମ୍ଭରେ ମହିଳା ଜଣକ ଏହାକୁ ଥଟ୍ଟା ଭାବିଥିଲେ। କିନ୍ତୁ ପରଦିନ ସକାଳେ ତାଙ୍କ ସ୍ବାମୀ ଏକ ଇଣ୍ଟରଭ୍ୟୁ ଦେବାକୁ ଯାଉଛି କହି ଘରୁ ବାହାରିଥିଲେ ଏବଂ ଏହା ପରେ ଆଉ ଫେରି ନ ଥିଲେ। ଏହା ପରେ ତାଙ୍କ ସ୍ବାମୀ ଫୋନରେ ମଧ୍ୟ କଥା ହୋଇ ନ ଥିଲେ। ଯୁବତୀ ଜଣଙ୍କ କଥାବାର୍ତ୍ତା କରିବାକୁ ଚେଷ୍ଟା କଲେ, କିନ୍ତୁ ତାଙ୍କ ସ୍ବାମୀ କଥା ହେବାକୁ ମନା କରିଦେଇଥିଲେ। ଅନ୍ୟ ପଟେ ଶାଶୁଘର ଲୋକେ ମଧ୍ୟ ତାଙ୍କୁ ଥଟ୍ଟା କରିବା ଆରମ୍ଭ କରିଥିଲେ। ଏସବୁ ମଧ୍ୟରେ ଯୁବକ ଜଣକ କୋର୍ଟରେ ଛାଡପତ୍ର ପାଇଁ ଆବେଦନ କରିଥିଲେ। ଛାଡପତ୍ର ନୋଟିସ ପାଇବା ପରେ ମହିଳା ଜଣକ ବହୁତ ଚାପରେ ଅଛନ୍ତି।
