ଦୁନିଆରେ ଅନେକ ଆଶ୍ଚର୍ଯ୍ୟଜନକ ସ୍ଥାନ ରହିଛି। ପ୍ରତ୍ୟେକ ସ୍ଥାନ ନିଜ ନିଜର ସ୍ବତନ୍ତ୍ରତା ପାଇଁ ବେଶ୍ ପରିଚିତ। ସେମିତି ଏକ ଆଶ୍ଚର୍ଯ୍ୟଜନକ ମନ୍ଦିର ରହିଛି ଇଣ୍ଡୋନେସିଆର ବାଲି ପ୍ରଦେଶର ଉବୁଦ ଅଞ୍ଚଳରେ। ଏଠାକାର ଛୋଟ ବେଡୁଲୁ ଗାଁରେ ଅବସ୍ଥିତ ଗୋଆ ଗଜ ମନ୍ଦିର ଅତ୍ୟନ୍ତ ରହସ୍ୟମୟ ଅଟେ। ଏହା ବାଲି ଦ୍ୱୀପର ସମୃଦ୍ଧ ସାଂସ୍କୃତିକ ଐତିହ୍ୟର ସାକ୍ଷୀ ଭାବରେ ଛିଡ଼ା ହୋଇଛି। ଏହି ମନ୍ଦିରକୁ ହାତୀ ଗୁମ୍ଫା ମନ୍ଦିର ମଧ୍ୟ କୁହାଯାଏ। ଏହା ଏକ ପ୍ରାଚୀନ ସ୍ଥାନ। ମନ୍ଦିରର ଖୋଦେଇ ଏବଂ ଶାନ୍ତ ପରିବେଶ ଏହାକୁ ଏକ ଉତ୍ତମ ଗନ୍ତବ୍ୟସ୍ଥଳ କରି ଗଢ଼ିତୋଳିଛି। ଏହି ସୁନ୍ଦର ମନ୍ଦିରର ଅନେକ ରୋଚକ କାହାଣୀ ସମ୍ପର୍କରେ ଜାଣନ୍ତୁ…
ଗୋଆ ଗଜ ମନ୍ଦିରର ଉତ୍ପତ୍ତି ଇତିହାସ ଅତ୍ୟନ୍ତ ଆକର୍ଷଣୀୟ। ଏହି ମନ୍ଦିର ୯ମ ଶତାବ୍ଦୀରେ ଏହି ଅଞ୍ଚଳରେ ରହୁଥିବା ଭିକ୍ଷୁମାନଙ୍କ ପାଇଁ ଧ୍ୟାନ ଅଭୟାରଣ୍ୟ ଭାବରେ ନିର୍ମିତ ହୋଇଥିବା କୁହାଯାଉଛି। ପୌରାଣିକ ଚିତ୍ର ଏବଂ ପଶୁମାନଙ୍କୁ ଚିତ୍ରଣ କରୁଥିବା ଜଟିଳ ଖୋଦିତ ଚିତ୍ରଗୁଡ଼ିକ ଅଛି। ଏହି ମନ୍ଦିର ହିନ୍ଦୁ ଧର୍ମ ଏବଂ ବୌଦ୍ଧ ଧର୍ମ ଦ୍ୱାରା ଅଧିକ ପ୍ରଭାବିତ ହୋଇଛି।
ମନ୍ଦିରର ପ୍ରବେଶ ପଥରେ ଏକ ଖୋଦିତ ରାକ୍ଷସ ପରି ମୁଖ ଅଛି, ଯାହା ସକାରାତ୍ମକ ଆତ୍ମା ଭୋମାକୁ ପ୍ରତୀକ। ମନ୍ଦିରର କେନ୍ଦ୍ରୀୟ ହଲରେ ଏକ ଧ୍ୟାନ ଗୁମ୍ଫା ଅଛି, ଯେଉଁଠାରେ ହିନ୍ଦୁ ଦେବତା ଭଗବାନ ଗଣେଶଙ୍କର ଏକ ପ୍ରତିମା ଅଛି। ଏହି ଗୁମ୍ଫା କିପରି ଏବଂ କେବେ ଏହି ଅଞ୍ଚଳରେ ଦେଖାଗଲା କେହି ଜାଣନ୍ତି ନାହିଁ। ଗୁମ୍ଫାର ଉତ୍ପତ୍ତି ଏପର୍ଯ୍ୟନ୍ତ ରହସ୍ୟମୟ ରହିଛି। ତେବେି ଗୋଟିଏ କାହାଣୀ ଅନୁଯାୟୀ, ଏହା କେବୋ ଇଓ୍ବା ନାମକ ଏକ ରାକ୍ଷସର ନଖରୁ ସୃଷ୍ଟି ହୋଇଥିଲା। ଏହି କାହାଣୀ ଅନୁଯାୟୀ, ମନ୍ଦିର ପ୍ରାୟ ଏକାଦଶ ଶତାବ୍ଦୀରୁ ଆରମ୍ଭ ହୋଇଥିଲା।
ଏହି ମନ୍ଦିର ଉଭୟ ହିନ୍ଦୁ ଏବଂ ବୌଦ୍ଧ ଧର୍ମୀଙ୍କ ପାଇଁ ଅପାର ଆଧ୍ୟାତ୍ମିକ ମହତ୍ତ୍ୱ ରଖିଛି। ଏହି ମନ୍ଦିରର ନାମ ନିକଟସ୍ଥ ପେଟାନୁ ନଦୀରୁ ଉତ୍ପନ୍ନ ହୋଇଛି, ଯାହାର ଜଳ ମନ୍ଦିର ପରିସର ଦେଇ ପ୍ରବାହିତ ହେଉଥିଲା, ଯାହା ହାତୀର ଆକୃତି ସଦୃଶ ଥିଲା। ସେଥିପାଇଁ ଏହା ହାତୀ ଗୁମ୍ଫା ମନ୍ଦିର ଭାବରେ ମଧ୍ୟ ପରିଚିତ। ମନ୍ଦିର ପରିସରରେ ମଧ୍ୟ ସୁନ୍ଦର ବଗିଚା ଅଛି। ରାସ୍ତାରେ ଦେବଦେବୀଙ୍କ ମୂର୍ତ୍ତି ଅଛି। ଯାହା ଅବିଶ୍ୱସନୀୟ ଦେଖାଯାଏ। ଏହାର ଆଖପାଖ ପ୍ରାକୃତିକ ପରିବେଶ ମନକୁ ଶାନ୍ତି ପ୍ରଦାନ କରିଥାଏ।
