ସୋନପୁର,୧୮।୩(ମୃତ୍ୟୁଞ୍ଜୟ ଶତପଥୀ): ସୁବର୍ଣ୍ଣପୁର ଜିଲା ରାଜନୀତିରେ ବହୁ ମହିଳା ସରପଞ୍ଚ, ପଞ୍ଚାୟତ ସମିତି ଅଧ୍ୟକ୍ଷ, ପୌରାଧ୍ୟକ୍ଷ ଓ ଜିଲା ପରିଷଦ ଅଧ୍ୟକ୍ଷ ଭାବେ ନିର୍ବାଚିତ ହୋଇଛନ୍ତି। ତେବେ ଏ ପର୍ଯ୍ୟନ୍ତ କୌଣସି ରାଜନୈତିକ ଦଳରୁ ଜଣେ ହେଲେ ମହିଳା ବିଧାୟକ ପଦ ମଣ୍ଡନ କରିପାରି ନାହାନ୍ତି। ଜାତୀୟ ଓ ଆଞ୍ଚଳିକ ଦଳଗୁଡ଼ିକର ନାରୀ ବିକାଶ ଓ ମହିଳା ସଶକ୍ତୀକରଣ ଅଭିଯାନ ଜିଲାର ମହିଳା ନେତ୍ରୀଙ୍କ ପାଇଁ କେବଳ ସ୍ଲୋଗାନରେ ସୀମିତ ରହିଛି।
ଜିଲା ରାଜନୀତିରେ ପୁରୁଷଙ୍କ ଆଧିପତ୍ୟ ଥିବାରୁ କୌଣସି ଦଳ ଏ ପର୍ଯ୍ୟନ୍ତ ମହିଳାଙ୍କୁ ସୁଯୋଗ ଦେଇନାହାନ୍ତି। ୨୦୦୯ରେ ଭାଜପା ପ୍ରାକ୍ତନ ପୌରାଧ୍ୟକ୍ଷା ଦମୟନ୍ତୀ ବାରିକ୍ଙ୍କୁ ବୀରମହାରାଜପୁର ବିଧାନସଭା ନିର୍ବାଚନମଣ୍ଡଳୀରେ ପ୍ରାର୍ଥୀ କରିଥିଲା। କିନ୍ତୁ ସେ ପରାଜିତ ହୋଇଥିଲେ। ବିଜେଡି ଓ କଂଗ୍ରେସ ମହିଳା ପ୍ରାର୍ଥୀଙ୍କୁ ସୁଯୋଗ ଦେଇନାହାନ୍ତି। ରାଜନୈତିକ ପର୍ଯ୍ୟବେକ୍ଷକଙ୍କ ମତରେ ଜିଲାରେ ସରପଞ୍ଚ, ସମିତି ସଭ୍ୟଙ୍କ ଠାରୁ ଆରମ୍ଭ କରି ଜିଲା ପରିଷଦ ସଭ୍ୟ, କାଉନସିଲର, ପଞ୍ଚାୟତ ସମିତି ଅଧ୍ୟକ୍ଷ, ପୌରାଧ୍ୟକ୍ଷ ଓ ଜିଲା ପରିଷଦ ଅଧ୍ୟକ୍ଷ ପଦରେ ମହିଳାମାନେ ରହିଛନ୍ତି। ଏହା ସହ ରାଜନୈତିକ ଦଳର ପଦାଧିକାରୀ ଭାବେ ମଧ୍ୟ ଏକାଧିକ ମହିଳା ଦାୟିତ୍ୱ ନିର୍ବାହ କରୁଛନ୍ତି। କିନ୍ତୁ ସେହି ସ୍ତରରୁ ଆଉ ମହିଳା ନେତ୍ରୀ ଆଗକୁ ଉଠି ପାରୁନାହାନ୍ତି। ଅର୍ଥାତ୍ ପ୍ରତିଦ୍ୱନ୍ଦିତା ପାଇଁ ସୁଯୋଗ ମିଳୁ ନ ଥିବାରୁ ନାରୀ ନେତ୍ରୀମାନେ ନୀତି ଓ ନିଷ୍ପତ୍ତି ନେବାର ବୃହତ୍ ମଞ୍ଚ ବିଧାନସଭାରେ ଦୃଶ୍ୟମାନ ହେଉନାହାନ୍ତି। ସୋନପୁର ଉପଖଣ୍ଡ ଜିଲା ହେବା ପୂର୍ବରୁ ବଲାଙ୍ଗୀର ଜିଲା ଅଧୀନରେ ଥିଲା। ପୂର୍ବରୁ ସୁବର୍ଣ୍ଣପୁର ଜିଲାରେ ସୋନପୁର, ବୀରମହାରାଜପୁର ଓ ବିନିକା ବିଧାନସଭା ଆସନ ଥିଲା। ୨୦୦୯ ସୀମା ପୁନନିର୍ଦ୍ଧାରଣ ପରେ ବିନିକା ଆସନ ବିଲୀନ ହୋଇ ଯାଇଥିଲା। ଏବେ ଜିଲାରେ ସୋନପୁର ଓ ବୀରମହାରାଜପୁର ୨ଟି ବିଧାନସଭା ନିର୍ବାଚନମଣ୍ଡଳୀ ରହିଛି। ଜିଲାରେ ୨ଲକ୍ଷ ୨୫ହଜାର ୮୦୯ଜଣ ମହିଳା ଓ ୨ଲକ୍ଷ ୪୨ହଜାର ୮୫୦ଜଣ ପୁରୁଷ ମତଦାତା ଅଛନ୍ତି।
