ନୂଆଦିଲ୍ଲୀ, ୬।୬ : ମହାପୁରୁଷ ମହମ୍ମଦଙ୍କ ଉପରେ ଆପତ୍ତିଜନକ ମନ୍ତବ୍ୟ ଦେଇଥିବା ଅଭିଯୋଗରେ ନୁପୁର ଶର୍ମା ଏବଂ ନବୀନ ଜିନ୍ଦଲଙ୍କୁ ଭାଜପାରୁ ନିଲମ୍ବନ କରିବା ପ୍ରସଙ୍ଗରେ ପୂର୍ବତନ କେନ୍ଦ୍ର ମନ୍ତ୍ରୀ ତଥା ଭାଜପା ନେତା ସୁବ୍ରମଣ୍ୟମ ସ୍ବାମୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରକୁ ଘେରିବା ଆରମ୍ଭ କରିଛନ୍ତି। ସ୍ବାମୀ ଟୁଇଟ କରି ଅଭିଯୋଗ କରିଛନ୍ତି ଯେ କାତାର ଭଳି ଛୋଟ ଦେଶ ସମ୍ମୁଖରେ କେନ୍ଦ୍ର ସରକାର ସାଷ୍ଟାଙ୍ଗ ପ୍ରଣାମ କରିବାକୁ ବାଧ୍ୟ ହୋଇଛନ୍ତି।
ଦୁଇ ଭାଜପା ନେତାଙ୍କ ନିଲମ୍ବନକୁ ନେଇ କ୍ରୋଧିତ ସୁବ୍ରମଣ୍ୟମ ଭାଜପା ସରକାରଙ୍କ ଆଠ ବର୍ଷ କାର୍ଯ୍ୟକାଳ ର ବୈଦେଶିକ ନୀତି ଉପରେ ପ୍ରଶ୍ନ ଉଠାଇଛନ୍ତି। ସେ ଅଭିଯୋଗ କରିଛନ୍ତି ଯେ ମୋଦି ସରକାରଙ୍କ କାର୍ଯ୍ୟକାଳ ସମୟରେ ଭାରତ ମାତାଙ୍କୁ ଲଜ୍ଜାରେ ମୁଣ୍ଡ ନୁଆଁଇବାକୁ ପଡିଛି। ଲଦାଖରେ ଚାଇନାର ସମ୍ମୁଖରେ ମୋଦି ସରକାର ନୀରବ ରହିଛନ୍ତି। ରୁଷିଆ ଆଗରେ ଆଣ୍ଠୁମାଡି ଏବଂ କ୍ୱାଡ୍ରେ ଆମେରିକା ନିକଟରେ ନିବେଦନ କରୁଥିବା ଦେଖିବାକୁ ମିଳିଛି। ସ୍ଥିତି ଏଭଳି ହେଲା ବର୍ତ୍ତମାନ ଭାରତ ସରକାର ଏକ ଛୋଟ ଦେଶ କାତାର ସମ୍ମୁଖରେ ପରାଜିତ ହୋଇଛନ୍ତି। ଏହା ହେଉଛି ମୋଦି ସରକାରଙ୍କ ସମୟରେ ଦେଶର ବୈଦେଶିକ ନୀତିର ଅବନତି।
କାତାରର ଚାପରେ ଭାଜପା ଏହାର ଦୁଇ ନେତାଙ୍କୁ ନିଲମ୍ବିତ କରିଛି ବୋଲି କୁହାଯାଉଛି। ନୁପୁର ଶର୍ମା ଏବଂ ନବୀନ ଜିନ୍ଦଲ ମହମ୍ମଦଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେଇଥିବା ଅଭିଯୋଗ ହୋଇଛି। ଏହାକୁ ଭାରତର ମୁସଲମାନ ସମେତ ଅନେକ ଆରବ ଦେଶ ବିରୋଧ କରୁଛନ୍ତି। ବିବାଦୀୟ ମନ୍ତବ୍ୟ ପାଇଁ ନୁପୁର ଶର୍ମା କ୍ଷମା ପ୍ରାର୍ଥନା କରିଛନ୍ତି।
ଏନେଇ କାତାର, କୁଏତ ଏବଂ ଇରାନରେ ଅବସ୍ଥାପିତ ଥିବା ଭାରତୀୟ ରାଷ୍ଟ୍ରଦୂତମାନଙ୍କୁ ଡକାଯାଇ ବିବାଦୀୟ ମନ୍ତବ୍ୟ ଉପରେ ଗଭୀର ଅସନ୍ତୋଷ ପ୍ରକାଶ କରିବା ସହ କଡା କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଭାରତ ଏହି ଦେଶମାନଙ୍କୁ କହିଛି ଯେ ଏଭଳି ମନ୍ତବ୍ୟ ସରକାରଙ୍କ ମତ ନୁହେଁ ଏବଂ ଏପରି ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ରାଷ୍ଟ୍ରଦୂତମାନେ କହିଛନ୍ତି ଯେ ଏହା ଭାରତ ସରକାରଙ୍କ ଭାବନା ନୁହେଁ। କେତେକ ଲୋକ ଏହା କହିଛନ୍ତି। ବିବିଧତା ମଧ୍ୟରେ ଏକତାର ସାଂସ୍କୃତିକ ଐତିହ୍ୟ ଆଧାରରେ ଭାରତ ସମସ୍ତ ଧର୍ମକୁ ସର୍ବୋଚ୍ଚ ସମ୍ମାନ ପ୍ରଦାନ କରେ। ଏପରି ମନ୍ତବ୍ୟ ଦେଉଥିବା ଲୋକଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ସମସ୍ତ ଧର୍ମକୁ ସମ୍ମାନ ଦେବାକୁ ଭାରତ ସରକାର ଗୁରୁତ୍ୱପ୍ରଦାନ କରିଥାନ୍ତି।
