ଅମରପାଲି,୨୦।୧୦(ପୀତାମ୍ବର ସାହୁ):ସୁବର୍ଣ୍ଣପୁର ଜିଲା ବୀରମହାରାଜପୁର ଉପକଣ୍ଠ ଚମ୍ପାମାଳ ଗ୍ରାମର ସବ୍ନମଶ୍ରୀ ମେହେର ଓଡ଼ିଶା ପ୍ରଶସନିକ ପରୀକ୍ଷା(ଓଏଏସ୍)ରେ କୃତକାର୍ଯ୍ୟ ହୋଇଛନ୍ତି। ସେ ୪୪୯ ର଼୍ୟାଙ୍କରେ ରହିି ଏହି ସଫଳତା ପାଇଛନ୍ତି। ସେ ଚମ୍ପାମାଳ ଗ୍ରାମର ମା’ ନନକା ମେହେର ଓ ବାପା ପର୍ଶୁରାମ ମେହେରଙ୍କ ଝିଅ। ପର୍ଶୁରାମଙ୍କ ଦୁଇ ଝିଅ ଓ ଦୁଇ ପୁଅଙ୍କ ମଧ୍ୟରୁ ସାନ ଝିଅ ସବ୍ନମ। ସେ ତାଙ୍କର ଦିତୀୟ ପ୍ରଚେଷ୍ଟାରେ ଏହି ସଫଳତା ହାସଲ କରିଛନ୍ତି। ସେ ଏଥିପାଇଁ କୌଣସି କୋଚିଂ ନେଉ ନ ଥିବା ବେଳେ ନିଜେ ନିଜେ ପ୍ରସ୍ତୁତି କରୁଥିଲେ। ଏଥିପାଇଁ ସେ ଦୈନିକ ୧୨ ରୁ ୧୪ ଘଣ୍ଟା ପରିଶ୍ରମ କରୁଥିବା କହିଛନ୍ତି।
ସେ କହିଛନ୍ତି, ଲକ୍ଷ୍ୟ ହାସଲ ପାଇଁ ଧର୍ଯ୍ୟ, ଦୃଢ଼ ଆତ୍ମବିଶ୍ବାସ ଓ ମନୋବଳ, ଉତ୍ସର୍ଗୀକୃତ, ଏବଂ କଠିନ ପରିଶ୍ରମ ଆବଶ୍ୟକ। ଏହି ସଫଳତା ପାଇଁ ସେ ମା’, ବାପା, ପରିବାରର ଅନ୍ୟ ସମସ୍ତ ସଦସ୍ୟ, ଗୁରୁଜନ ଓ ସାଙ୍ଗ ସାଥିଙ୍କ ପ୍ରେରଣା ଶ୍ରେୟ ଦେଇଛନ୍ତି। ସେ ଜଣେ ଭଲ ପ୍ରଶାସନିକ ଅଧିକାରୀ ହୋଇ ନିଃସାର୍ଥପର ଭାବେ ଲୋକଙ୍କ ସେବା କରିବେ ବୋଲି ଧରିତ୍ରୀକୁ ଦେଇଥିବା ସାକ୍ଷାତକାରରେ କହିଛନ୍ତି।
ସବନମଶ୍ରୀଙ୍କ ପ୍ରାଥମିକ ଶିକ୍ଷା ବୀରମହାରାଜପୁର ଶିଶୁ ମନ୍ଦିର, ହାଇସ୍କୁଲ ଶିକ୍ଷା ସୋନପୁରସ୍ଥିତ ସାହାରା ହାଇସ୍କୁଲ, ଯୁକ୍ତ ଦୁଇ ବିଜ୍ଞାନ ଭୁବନେଶ୍ୱର କିଟ୍ କଲେଜରୁ ଏବଂ ଛିପିଲିମାସ୍ଥିତ ଓୟୁଏଟିରୁ ମଧ୍ୟ ଉତ୍ତିର୍ଣ୍ଣ ହୋଇଛନ୍ତି। ତାଙ୍କ ବାପା ଜଣେ ଅବସରପ୍ରାପ୍ତ କୃଷି ଅଧିକାରୀ ହୋଇଥିବା ବେଳେ ମା’ ଜଣେ ଗୃହିଣୀ ଅଟନ୍ତି। ତାଙ୍କର ଏହି ସଫଳତାରେ ଅଞ୍ଚଳର ବିଭିନ୍ନ ମହଲରୁ ଶୁଭେଚ୍ଛାର ଶଅ ଛୁଟିଛି।
