ଓଡ଼ଗାଁ,୧୬ା୧୦(ଆଦର୍ଶ କୁମାର ପଟ୍ଟନାୟକ): ସାରା ରାଜ୍ୟରେ ଓଡ଼ଗାଁ ସମେତ ୧୪୪ ବ୍ଲକରେ ଗ୍ରାମ୍ୟ ଉନ୍ନୟନ ସହକାରୀ ଯନ୍ତ୍ରୀଙ୍କ କାର୍ଯ୍ୟାଳୟ ଖୋଲିବା ନିମନ୍ତେ ରାଜ୍ୟପାଳଙ୍କ ଅନୁମୋଦନ ମିଳିସାରିଛି। ଏନେଇ ଗ୍ରାମ୍ୟ ଉନ୍ନୟନ ବିଭାଗ ତରଫରୁ ୧୧ ତାରିଖରେ ଜାରି କରାଯାଇଥିବା ଏକ ବିଜ୍ଞପ୍ତିରେ ଉଲ୍ଲେଖ ରହିଛି। ଏଥିରେ ସମସ୍ତ ନୂତନ ୧୪୪ ଗ୍ରାମ୍ୟ ଉନ୍ନୟନ ବିଭାଗ ସବ୍ ଡିଭିଜନ ଖୋଲିବା ନିମନ୍ତେ ଆବଶ୍ୟକ ୧୪୪ ଜୁନିୟର କିରାଣୀ ପଦବୀ ପାଇଁ ଆର୍ଥିକ ଅନୁମୋଦନ ନିମନ୍ତେ ବିଭାଗ ତରଫରୁ ଆକାଉଣ୍ଟାଣ୍ଟ ଜେନେରାଲଙ୍କୁ ପ୍ରଦାନ କରାଯାଇଥିବା ଚିଠିରେ ଉଲ୍ଲେଖ ରହିଛି। ଏହି ତାଲିକାରେ ଓଡ଼ଗାଁ ସମେତ ଜିଲାର ଗଣିଆ ଓ ଭାପୁର ସ୍ଥାନ ପାଇଛି। ଅନ୍ୟପକ୍ଷେ ଓଡ଼ଗାଁରେ ଅବସ୍ଥିତ ସହକାରୀ ଯନ୍ତ୍ରୀଙ୍କ କାର୍ଯ୍ୟାଳୟ ଅତ୍ୟନ୍ତ ଅବହେଳିତ ଓ ଅବ୍ୟବହୃତ ଅବସ୍ଥାରେ ଦୀର୍ଘ ଦିନରୁ ରହିଛି। ସେଠାକୁ ବହୁ ବର୍ଷ ଧରି କେହି ଆସି ନାହାନ୍ତି। ଏହି କାର୍ଯ୍ୟାଳୟରେ ବିଦ୍ୟୁତ୍ ନ ଥିବା ଦର୍ଶାଇ ଉକ୍ତ ଅଫିସକୁ କେହି ଆସୁ ନ ଥିବା ବେଳେ ସବ୍ଡିଡ଼ିଜନ ମାନ୍ୟତା ପାଇବା ପରେ ଉକ୍ତ କାର୍ଯ୍ୟାଳୟର ଭାଗ୍ୟରେ ପରିବର୍ତ୍ତନ ଆସିବା ସମ୍ଭାବନା ଦେଖା ଦେଇଛି। ଅନ୍ୟପକ୍ଷେ ଓଡ଼ଗାଁରେ ସବ୍ଡିଭିଜନ ଖୋଲିବା ପରେ ଉକ୍ତ ବ୍ଲକ ଅଧୀନ ଶରଣକୁଳ ଓ ଓଡ଼ଗାଁରେ ରହିଥିବା ୨ ସହକାରୀ ଯନ୍ତ୍ରୀଙ୍କ କାର୍ଯ୍ୟାଳୟ ଦ୍ୱାରା ୩୬ ପଞ୍ଚାୟତର ଗ୍ରାମ୍ୟ ଉନ୍ନୟନ କାର୍ଯ୍ୟ ପରିଚାଳନାରେ ସ୍ବଚ୍ଛତା ଆସିବା ନେଇ ଲୋକେ ଆଶାବାଦୀ ଅଛନ୍ତି।
ହେଲେ ସରକାରୀ ଅନୁମୋଦନ ପାଇବା ପରେ ଏଠାରେ ସବ୍ଡିଭିଜନ ଅଫିସ ଖୋଲିବାକୁ ଘୋଷଣାକୁ ନେଇ ହେଉଥିବା ବିଳମ୍ବ ସମ୍ପର୍କରେ ନୟାଗଡ଼ରେ ଅବସ୍ଥାପିତ ବିଭାଗୀୟ ଉଚ୍ଚ ଅଧିକାରୀଙ୍କ ମତାମତ ମିଳିପାରି ନାହିଁ। ତେବେ ସହକାରୀ ଯନ୍ତ୍ରୀ ସଞ୍ଜୀବ ରଥ ଆପ୍ରୁଭାଲ ଷ୍ଟେଜରେ ଥିବା କଥା କହିଥିଲେ। ନିଜ ଦପ୍ତର ଖୋଲିବା ନେଇ ପଚାରିବାରେ ଖୁବ୍ଶୀଘ୍ର ଏହାକୁ କାର୍ଯ୍ୟକ୍ଷମ କରାଯିବ ବୋଲି କହିଛନ୍ତି।
