ରାଜକୋଟ,୧୬।୯ : ପୂର୍ବରୁ ପାଠଚାପରେ କେତେକ ଶିକ୍ଷାର୍ଥୀ ସ୍କୁଲ ଅବା କଲେଜ ଯିବାକୁ ବନ୍ଦ କରୁଥିଲେ। ଅବା ମିଛ କହୁଥିଲେ। ମାତ୍ର ଏବେ ପାଠଚାପରୁ ମୁକ୍ତି ପାଇଁ ଶିକ୍ଷାର୍ଥୀ ନୂଆ ନୂଆ କୌଶଳ ଆପଣେଉଛନ୍ତି। ସମ୍ପ୍ରତି ଗୁଜୁରାଟରେ, ଜଣେ ୧୦ ବର୍ଷର ଛାତ୍ରୀ ତାଙ୍କ ହୋମୱାର୍କ ନ କରିବାର ବାହାନା କରି ନିଜକୁ ଅପହରଣ କରିଥିବା ନାଟକ ରଚିଛନ୍ତି। ଏହା ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି।
ଏହି ମାମଲା ଗୁଜରାଟର ପପାଟପାରା ଅଞ୍ଚଳର। ଶୁକ୍ରବାର ସକାଳେ ନାବାଳିକା ଜଣକ ତାଙ୍କ ପିତାଙ୍କ ସହ ପ୍ରଦ୍ୟୁମାନ ନଗର ପୋଲିସ ଷ୍ଟେଶନରେ ପହଞ୍ଚି ଅଭିଯୋଗ ଆଣିଥିଲେ। ଏହି ଘଟଣାର ତଦନ୍ତ ପାଇଁ ଶୁକ୍ରବାର ଆଇପିଏସ ଅଧିକାରୀଙ୍କ ସମେତ ୮୦ପୋଲିସ କର୍ମଚାରୀଙ୍କ ସମ୍ପୂର୍ଣ୍ଣ ଟିମ ନିୟୋଜିତ କରାଯାଇଥିଲା। ନାବାଳିକା ଜଣକ ପୋଲିସକୁ କହିଥିଲେ ସକାଳେ ଟ୍ୟୁସନ କ୍ଲାସକୁ ଯାଉଥିବା ବେଳେ ତାଙ୍କୁ ଏକ ଏସୟୁଭିରେ ଅପହରଣ କରାଯାଇଥିଲା।
ତାଙ୍କ ଅଭିଯୋଗ ଅନୁଯାୟୀ ଅପହରଣକାରୀମାନେ ତାଙ୍କୁ କାରରେ ବସିବା ସହ ରାସ୍ତାରେ ଅନ୍ୟ ଜଣେ ଝିଅକୁ ମଧ୍ୟ ଉଠାଇ ନେଇଥିଲେ। ତେବେ ପରେ ସେମାନେ ଅନ୍ୟ ଝିଅକୁ ରେଳ ବ୍ରିଜ ତଳେ ଛାଡି ଦେଇଥିବା ବେଳେ ତାଙ୍କୁ ରେଳ ଷ୍ଟେଶନ ଆଡକୁ ନେଇ ଯାଇଥିଲା। ଏହି କାହାଣୀ ପୋଲିସକୁ ଅସୁବିଧାରେ ପକାଇଥିଲା, ତା’ପରେ ଅପହରଣକାରୀଙ୍କୁ ଖୋଜିବା ପାଇଁ ପୋଲିସ ସର୍ଚ୍ଚ ଅପରେଶନ ଆରମ୍ଭ କରିଥିଲା, ସମସ୍ତ ପୋଲିସ ଷ୍ଟେଶନକୁ ସତର୍କ କରାଇଥିଲା ଏବଂ ଅନେକ ରାସ୍ତାରେ ଯାନବାହନ ଚଳାଚଳ ଉପରେ ମଧ୍ୟ ପ୍ରତିବନ୍ଧକ ଲଗାଇଥିଲା।
କେବଳ ଏତିକି ନୁହେଁ, କ୍ରାଇମ ବ୍ରାଞ୍ଚର ବରିଷ୍ଠ କର୍ମଚାରୀମାନେ ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ। ସ୍ପେଶାଲ ଅପରେଶନ ଗ୍ରୁପ (ଏସଓଜି) ଅପରାଧୀଙ୍କ ବିଷୟରେ ସୂଚନା ପାଇବା ପାଇଁ ଅନେକଙ୍କୁ ସକ୍ରିୟ କରିଥିଲା। ପୋଲିସ ଘଟଣାସ୍ଥଳରେ ପହଞ୍ଚି ଏସବୁ ଜାଣିବା ପାଇଁ ଅଞ୍ଚଳର ସମସ୍ତ ସିସିଟିଭି ଫୁଟେଜ ସ୍କାନ କରିଥିଲେ। ଫୁଟେଜରେ ଝିଅଟି ଚାଲୁଥିବାର ଦେଖାଯାଇଥିଲା କିନ୍ତୁ ତାଙ୍କ ଚାରିପାଖରେ କୌଣସି ସନ୍ଦେହଜନକ ଗାଡି ଦେଖାଯାଇ ନ ଥିଲା। ଡେପୁଟି କମିଶନର ସୁଧୀରକୁମାର ଦେଶାଇ ଏହି ସୂଚନା ଦେଇଛନ୍ତି।
ସୁଧୀରକୁମାର ଦେଶାଇ କହିଛନ୍ତି ଅନୁସନ୍ଧାନ ପରେ ପୋଲିସ ଟିମ ଫେରି ତାଙ୍କ ବାପାମାଆ ଏବଂ ମହିଳା ପୋଲିସଙ୍କ ଉପସ୍ଥିତିରେ ଝିଅ ସହିତ କଥା ହେବା ଆରମ୍ଭ କରିଥିଲେ। ତା’ପରେ ଝିଅଟି କ୍ରୋଧିତ ହୋଇ କାହାଣୀର ସତ୍ୟାସତ୍ୟ ବିଷୟରେ ସ୍ବୀକାର କରିଥିଲେ। ତାଙ୍କୁ କାହିଁକି ଏହି କାହାଣୀ ତିଆରି କରିବାକୁ ପଡିଲା ତାହା ମଧ୍ୟ କହିଥିଲେ। ଝିଅ ଜଣଙ୍କ କହିଥିଲେ ସେ ଟ୍ୟୁସନ କ୍ଲାସକୁ ଯିବାକୁ ଚାହୁଁନାହାଁନ୍ତି, କିନ୍ତୁ ତାଙ୍କ ମା ତାଙ୍କୁ ସବୁବେଳେ ପାଠପଢ଼ିବାକୁ ବାଧ୍ୟ କରୁଛନ୍ତି। ସମସ୍ତଙ୍କୁ ଏଭଳି କାହାଣୀ କହିବା ପୂର୍ବରୁ ସେ ତାଙ୍କର ଜଣେ ବନ୍ଧୁଙ୍କ ସାହାଯ୍ୟରେ ଅପହରଣର ଏକ ନାଟକ ରଚନା କରିଥିଲେ ।
