ଭଞ୍ଜନଗର,୫।୩(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ସାମ୍ବାଦିକତା ଓ ଗଣ ଯୋଗାଯୋଗ ବିଭାଗର ଶେଷ ବର୍ଷ ଛାତ୍ରୀଛାତ୍ର ମାନେ ଇଣ୍ଟର୍ନସିପ ମାଧ୍ୟମରେ ରାଜ୍ୟର ବିଭିନ୍ନ ଗଣମାଧ୍ୟମ ସଂସ୍ଥାକୁ ତାଲିମ ନେବାକୁ ଯାଇଥିଲେ। ବୁଧବାର ଛାତ୍ରୀଛାତ୍ରମାନେ ଗଣମାଧ୍ୟମ ସଂସ୍ଥାରୁ ଫେରି ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକଙ୍କୁ ଭେଟି ଫୁଲତୋଡ଼ା ଦେଇ ସ୍ବାଗତ କରିଛନ୍ତି। ଏହି ସମୟରେ ଛାତ୍ରୀଛାତ୍ରମାନେ ତାଲିମ ସମୟର ଅନୁଭୂତି ବାଣ୍ଟିଛନ୍ତି। ଏଥିସହ ବିଧାୟକ ଛାତ୍ରୀଛାତ୍ରଙ୍କ ଉଜ୍ଜ୍ୱଳ ଭବିଷ୍ୟତ କାମନା କରିବା ସହ ସମସ୍ତେ ଭଲ ମଣିଷ ଟିଏ ହୋଇ ସମାଜର ସେବା କରିବାକୁ ଆହ୍ବାନ ଦେଇଛନ୍ତି। ଏହି ସମୟରେ ବିଧାୟକ କବି ସମ୍ରାଟ ଉପେନ୍ଦ୍ର ଭଞ୍ଜ ଏବଂ ଚକରା ବିଷୋୟୀଙ୍କ ସମେତ ଘୁମୁସର ଇତିହାସ ସମ୍ପର୍କରେ ଛାତ୍ରୀଛାତ୍ରଙ୍କୁ ବୁଝାଇବା ସହ ଘୁମୁସର ଇତିହାସ ଉପରେ ଅଧିକ ଜାଣିବା ପାଇଁ ସେମାନକୁ ପରାମର୍ଶ ଦେଇଛନ୍ତି।
ବିଧାୟକ ଆହୁରି କହିଛନ୍ତି, ଗଞ୍ଜାମ ଜିଲାରେ ବେକାର ସମସ୍ୟା ଏବଂ ଦାଦନ ସମସ୍ୟା ଦୂର ପାଇଁ ବ୍ୟାପକ ନିଯୁକ୍ତି ସୃଷ୍ଟି କରାଯାଉଛି । ଏଥିପାଇଁ ଆବଶ୍ୟକ ଭିତ୍ତିଭୂମୀ ପ୍ରସ୍ତୁତ ଚାଲିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ,କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଗଞ୍ଜାମ ଜିଲାର ବିକାଶ ପାଇଁ ସତନ୍ତ୍ର ଦୃଷ୍ଟି ଦେଉଛନ୍ତି। ଗୁଜରାଟର ଏକ ସୂତାକଳ ସଂସ୍ଥା ଗଞ୍ଜାମ ଜିଲାରେ ୭୦୦୦ କୋଟି ଟଙ୍କା ନିବେଶ କରିବ। ଏଥିପାଇଁ ଜିଲାର କେତେକ ସ୍ଥାନରେ ଜମି ଚୟନ ଚାଲିଛି। ସେଥିମଧ୍ୟରୁ ଭଞ୍ଜନଗର ନିର୍ବାଚନମଣ୍ଡଳୀର ଗେରେଡା ନିକଟରେ ୧୦୦ ଏକର ଜମି ଦେଖା ହୋଇଛି। ଆଗାମୀ ଦିନରେ କାରଖାନା ନିର୍ମାଣ ହେଲେ ଜିଲାରେ ଆଉ ଦାଦନ ଶ୍ରମିକ ସମସ୍ୟା ରହିବ ନାହିଁ। ଏଥିସହ ଅନ୍ୟାନ୍ୟ କ୍ଷେତ୍ରରେ ମଧ୍ୟ ନିଯୁକ୍ତି ପାଇଁ ମଧ୍ୟ ବ୍ୟାପକ ପଦକ୍ଷେପ ନିଆଯାଉଛି। ଏପରିକି ଭଞ୍ଜନଗର ଅଞ୍ଚଳର ସମସ୍ତ ଶିକ୍ଷାନୁଷ୍ଠାନର ବିକାଶ ପାଇଁ ପଦକ୍ଷେପ ନିଆଯାଉଛି। ସେଥିମଧ୍ୟରୁ କେବଳ କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟର ବିକାଶ ପାଇଁ ୧୦୭ କୋଟି ଟଙ୍କା ଖର୍ଚ୍ଚ କରିବା ଯୋଜନା ରହିଛି। ଏଥିପାଇଁ ଏଷ୍ଟିମେଟ ଚାଲିଛି। ଏତେବଡ କଲେଜର ଚାରିପଟେ ପାଚେରୀ ନାହିଁ। ତେଣୁ ସମ୍ପୂର୍ଣ୍ଣ ପାଚେରୀ ହେବ। ହଷ୍ଟେଲ, ଷ୍ଟାଫ ଘର, ନୂତନ କ୍ଲାସ ରୁମ ନିର୍ମାଣ ହେବ। ଏଥିସହ ଛାତ୍ରୀଛାତ୍ରଙ୍କ ଆବଶ୍ୟକତାକୁ ଦେଖି ଅନ୍ୟାନ୍ୟ କାର୍ଯ୍ୟ ମଧ୍ୟ କରାଯିବ ବୋଲି ବିଧାୟକ ପ୍ରଦ୍ୟୁମ୍ନ କୁମାର ନାୟକ ଛାତ୍ରୀଛାତ୍ରଙ୍କୁ କହିଛନ୍ତି।
