ନୂଆଦିଲ୍ଲୀ,୨୯ା୮: ଭାରତରେ ଛାତ୍ରୀଛାତ୍ରଙ୍କ ଆତ୍ମହତ୍ୟା ଅତି ଚିନ୍ତାଜନକ ଭାବେ ବଢ଼ିବାରେ ଲାଗିଛି। ଏପରି କି ଦେଶରେ ଯେଉଁ ହାରରେ ଜନସଂଖ୍ୟା ବୃଦ୍ଧି ଘଟିଛି, ତା’ଠୁ ଅଧିକ ହୋଇଛି ଛାତ୍ରୀଛାତ୍ରଙ୍କ ଆତ୍ମହତ୍ୟା। ୨୦୨୧ରୁ ୨୦୨୨ ମଧ୍ୟରେ ଛାତ୍ରଙ୍କ ଆତ୍ମହତ୍ୟା ୬% ହ୍ରାସ ପାଇଥିବାବେଳେ ଛାତ୍ରୀଙ୍କ ଆତ୍ମହତ୍ୟା ୭% ବୃଦ୍ଧି ପାଇଥିବା ଏକ ନୂଆ ରିପୋର୍ଟରୁ ଜଣାପଡ଼ିଛି। ମହାରାଷ୍ଟ୍ର, ତାମିଲନାଡୁ ଓ ମଧ୍ୟପ୍ରଦେଶରେ ଛାତ୍ରୀଛାତ୍ରଙ୍କ ଆତ୍ମହତ୍ୟା ମାମଲା ସର୍ବାଧିକ ଦେଖିବାକୁ ମିଳିଛି। ଶିକ୍ଷା ବ୍ୟବସ୍ଥାରେ ମାନସିକ ସ୍ବାସ୍ଥ୍ୟ ପ୍ରତି ଅଧିକ ଦୃଷ୍ଟି ଦିଆଯିବା ଆବଶ୍ୟକ ବୋଲି ଏଥିରୁ ସ୍ପଷ୍ଟ ହୋଇଛି।
ଜାତୀୟ ଅପରାଧ ରେକର୍ଡ ବ୍ୟୁରୋ (ଏନ୍ସିଆର୍ବି) ତଥ୍ୟକୁ ଭିତ୍ତିକରି ‘ଷ୍ଟୁଡେଣ୍ଟ ସୁଇସାଇଡ୍: ଆନ୍ ଏପିଡେମିକ୍ ସ୍ବିପିଙ୍ଗ୍ ଇଣ୍ଡିଆ’ ଶୀର୍ଷକ ଏକ ରିପୋର୍ଟ ପ୍ରସ୍ତୁତ କରାଯାଇଛି। ଆନୁଆଲ ଆଇସି୩ କନ୍ଫରେନ୍ସ ଆଣ୍ଡ୍ ଏକ୍ସପୋ ୨୦୨୪ରେ ବୁଧବାର ଏହି ରିପୋର୍ଟ ପ୍ରକାଶ କରାଯାଇଛି। ଏଥିରେ ଦର୍ଶାଯାଇଛି ଯେ, ସବୁ ପ୍ରକାର ଆତ୍ମହତ୍ୟା ହାର ବାର୍ଷିକ ୨% ବଢ଼ୁଥିବାବେଳେ ଛାତ୍ରୀଛାତ୍ରୀଙ୍କ ଆତ୍ମହତ୍ୟାରେ ୪% ବୃଦ୍ଧି ପରିଲକ୍ଷିତ ହୋଇଛି। ଗତ ୨ ଦଶନ୍ଧି ମଧ୍ୟରେ ଛାତ୍ରୀଛାତ୍ରଙ୍କ ଆତ୍ମହତ୍ୟା ଜାତୀୟ ସ୍ତରର ଆତ୍ମହତ୍ୟାର ଦୁଇଗୁଣ ଅଧିକ। ୨୦୨୨ରେ ମୋଟ ଆତ୍ମହତ୍ୟାର ୫୩% ଛାତ୍ର ଆତ୍ମହତ୍ୟା ରହିଥିଲା। ୨୦୨୧ରୁ ୨୦୨୨ ମଧ୍ୟରେ ଛାତ୍ରଙ୍କ ଆତ୍ମହତ୍ୟା ୫% ହ୍ରାସ ପାଇଥିବାବେଳେ ଛାତ୍ରୀଙ୍କ ଆତ୍ମହତ୍ୟା ୭% ବୃଦ୍ଧି ପାଇଥିବା ନେଇ ଆଇସି୩ ଇନ୍ଷ୍ଟିଚ୍ୟୁଟ୍ ପକ୍ଷରୁ ପ୍ରସ୍ତୁତ ଉକ୍ତ ରିପୋର୍ଟରେ ଦର୍ଶାଯାଇଛି। ଛାତ୍ରୀଛାତ୍ରଙ୍କ କ୍ଷେତ୍ରରେ ଜନସଂଖ୍ୟା ବୃଦ୍ଧିି ହାରକୁ
ଆତ୍ମହତ୍ୟା ହାର ଦେଶର ଜନସଂଖ୍ୟା ବୃଦ୍ଧି ଓ ମୋଟ ଆତ୍ମହତ୍ୟା ଧାରାଠାରୁ ଅଧିକ ରହିଛି। ଗତ ଦଶନ୍ଧିରେ ୦ରୁ ୨୪ ବର୍ଷୀୟଙ୍କ ଜନସଂଖ୍ୟା ୫୮୨ ନିୟୁତରୁ ୫୮୧ ନିୟୁତକୁ ହ୍ରାସ ପାଇଥିଲା। କିନ୍ତୁ ସମାନ ଅବଧି ମଧ୍ୟରେ ଛାତ୍ରୀଛାତ୍ରଙ୍କ ଆତ୍ମହତ୍ୟା ୬,୬୫୪ରୁ ୧୩,୦୪୪କୁ ବୃଦ୍ଧି ପାଇଥିଲା। ରିପୋର୍ଟ ଅନୁଯାୟୀ ମହାରାଷ୍ଟ୍ର, ତାମିଲନାଡୁ ଓ ମଧ୍ୟପ୍ରଦେଶରେ ସର୍ବାଧିକ ଅର୍ଥାତ୍ ଜାତୀୟ ହାରର ଏକ-ତୃତୀୟାଂଶ ଛାତ୍ରୀଛାତ୍ର ଆତ୍ମହତ୍ୟା କରୁଛନ୍ତି। ଦକ୍ଷିଣ ଭାରତୀୟ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଜାତୀୟ ହାରର ୨୯% ଛାତ୍ରୀଛାତ୍ରଙ୍କ ଆତ୍ମହତ୍ୟା ମାମଲା ନଜରକୁ ଆସିଛି। ଅନ୍ୟପକ୍ଷେ କୋଟା ଭଳି ସହରରେ କୋଚିଂ ସେଣ୍ଟରଗୁଡ଼ିକରେ ପଢ଼ୁଥିବା ପିଲାଙ୍କ ଆତ୍ମହତ୍ୟା ସଂଖ୍ୟା ବଢ଼ିଚାଲିଛି। ଏଥିଯୋଗୁ ଛାତ୍ରୀଛାତ୍ରଙ୍କ ଆତ୍ମହତ୍ୟା କ୍ଷେତ୍ରରେ ରାଜସ୍ଥାନ ଦେଶରେ ୧୦ମ ରାଜ୍ୟ ପାଲଟିଛି।
ପୋଲିସ ପଞ୍ଜୀକୃତ ଫାଷ୍ଟ ଇନ୍ଫର୍ମେଶନ ରିପୋର୍ଟ (ଏଫ୍ଆଇଆର୍) ଆଧାରରେ ଏନ୍ସିଆର୍ବି ରିପୋର୍ଟ ପ୍ରସ୍ତୁତ କରାଯାଇଛି। ତେବେ ଛାତ୍ରୀଛାତ୍ରଙ୍କ ଆତ୍ମହତ୍ୟାର ପ୍ରକୃତ ସଂଖ୍ୟା ଆହୁରି ଅଧିକ ହୋଇପାରେ ବୋଲି ଅନୁମାନ କରାଯାଉଛି। ସାମାଜିକ ଅପବାଦ, ଆତ୍ମହତ୍ୟା ଉଦ୍ୟମର ଅପରାଧୀକରଣ ଯୋଗୁ ପ୍ରକୃତ ଆତ୍ମହତ୍ୟା ସଂଖ୍ୟା ସାମ୍ନାକୁ ଆସିପାରୁ ନାହିଁ ବୋଲି ରିପୋର୍ଟରେ ଉଲ୍ଲେଖ କରାଯାଇଛି।
୨୦୧୭ର ମେଣ୍ଟାଲ ହେଲ୍ଥକେୟାର ଆକ୍ଟ ମାନସିକ ରୋଗୀଙ୍କ ଆତ୍ମହତ୍ୟା ଉଦ୍ୟମକୁ ଅପରାଧମୁକ୍ତ କରିଥିଲେ ହେଁ ଉପଯୁକ୍ତ ରିପୋର୍ଟିଂ କରାଯାଉ ନାହିଁ। ସେହିପରି ଗ୍ରାମାଞ୍ଚଳରେ ଆତ୍ମହତ୍ୟା ସମ୍ପର୍କିତ ତଥ୍ୟ ସଂଗ୍ରହ ଠିକ୍ ଭାବେ ହୋଇପାରୁ ନ ଥିବାରୁ ଡେଟାରେ ମଧ୍ୟ ତାଳମେଳ ରହୁନାହିଁ। ଆଇସି୩ ମୁଭ୍ମେଣ୍ଟ ପ୍ରତିଷ୍ଠାତା ଗଣେଶ କୋହଲି କହିଛନ୍ତି, ଆମ ଶିକ୍ଷାନୁଷ୍ଠାନଗୁଡ଼ିକରେ ମାନସିକ ସ୍ବାସ୍ଥ୍ୟ ସମ୍ପର୍କିତ ଚ୍ୟାଲେଞ୍ଜ ବଢ଼ିଚାଲିଥିବା ଏହି ରିପୋର୍ଟରୁ ଜଣାପଡ଼ୁଛି। ତେଣୁ ଶିକ୍ଷା ବ୍ୟବସ୍ଥାରେ ଏପରି ପାଠ୍ୟକ୍ରମକୁ ସାମିଲ କରାଯିବା ଉଚିତ, ଯାହାକି ପିଲାଙ୍କୁ ପରସ୍ପର ସହ ପ୍ରତିଯୋଗିତା ପରିବର୍ତ୍ତେ ନିଜ ନିଜ ସର୍ବାଙ୍ଗୀନ ଉନ୍ନତି ପାଇଁ ପ୍ରେରିତ କରିବ। ଏଥିସକାଶେ ପ୍ରତ୍ୟେକ ଶିକ୍ଷାନୁଷ୍ଠାନରେ ଏକ ବ୍ୟବସ୍ଥିତ, ବ୍ୟାପକ ଓ ପ୍ରଭାବଶାଳୀ କଲେଜ କାଉନ୍ସେଲିଂ ସିଷ୍ଟମ୍ ରହିବା ଉଚିତ ବୋଲି କୋହଲି ମତବ୍ୟକ୍ତ କରିଛନ୍ତି।
