କେନ୍ଦୁଝର,୨୭ା୭(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ହରିଚନ୍ଦନପୁର ବ୍ଲକ୍ ବଣାପଳାସପାଳ ବାଳିକା ଉଚ୍ଚ ବିଦ୍ୟାଳୟରେ ଦୁଇ ଛାତ୍ରୀଙ୍କୁ ପ୍ରଧାନଶିକ୍ଷକ ଅସଦାଚରଣ ଘଟଣାରେ ସହକାରୀ ପରିଚାଳିକାଙ୍କୁ ବଦଳି କରାଯାଇଛି। ଏହି ମାମଲାରେ ପୂର୍ବରୁ ପ୍ରଧାନ ଶିକ୍ଷକ ଇଶ୍ୱର ଚନ୍ଦ୍ର ସାହୁଙ୍କୁ ୧୩ ତାରିଖରେ ନିଲମ୍ବିତ କରାଯାଇଥିଲା। ଗୁରୁବାର ଦାୟିତ୍ୱରେ ଅବହେଳା ପାଇଁ ବିଦ୍ୟାଳୟର ହଷ୍ଟେଲ ଦାୟିତ୍ୱରେ ଥିବା ସହକାରୀ ପରିଚାଳିକା ରାଇମଣୀ ମାଝୀ ଚମ୍ପୁଆ ବ୍ଲକ ସରକାରୀ ଉଚ୍ଚ ବିଦ୍ୟାଳୟ ବାସୁଦେବପୁରକୁ ବଦଳି ହୋଇଛି ।
ବାସୁଦେବପୁର ସରକାରୀ ଉଚ୍ଚ ବିଦ୍ୟାଳୟର ଶିକ୍ଷୟିତ୍ରୀ ଉର୍ମିଳା ବିଶ୍ୱାଳଙ୍କୁ ସରକାରୀ ଉଚ୍ଚ ବିଦ୍ୟାଳୟ ମାଟକାମବେଡ଼ାକୁ ବଦଳି କରାଯାଇଛି। ମାଟକାମବେଡ଼ା ସରକାରୀ ଉଚ୍ଚ ବିଦ୍ୟାଳୟର ଶିକ୍ଷକ ମୋହନ ଚରଣ ମାଝୀଙ୍କୁ ରେବଣାପଳାସପାଳ ବାଳିକା ଉଚ୍ଚ ବିଦ୍ୟାଳୟକୁ ବଦଳି ହୋଇଛି।
ଜିଲାପାଳଙ୍କ ଅନୁମୋଦନ କ୍ରମେ ଜିଲା ମଙ୍ଗଳ ଅଧିକାରୀଙ୍କ କାର୍ଯ୍ୟାଳୟ ପକ୍ଷରୁ ଚିଠି (ନଂ. ୨୧୮୦/୨୭ଜୁଲାଇ ୨୦୨୩ )ରେ ଏହି ଆଦେଶ କରାଯାଇଛି। ସେହିପରି ଚିଠି ନମ୍ବର ୨୧୭୬ ତା ୨୭/୦୭/୨୦୨୩ରେ ରେବଣାପଳାସପାଳ ବାଳିକା ଉଚ୍ଚ ବିଦ୍ୟାଳୟର ମାଟ୍ରନ ଶର୍ମିଳା ସାହୁଙ୍କୁ ଯୋଡା ବ୍ଲକ ଗୁଆଲି ଆଶ୍ରମ ସ୍କୁଲକୁ ବଦଳି କରାଯାଇଥିବା ବେଳେ ସେଠାରେ କାର୍ଯ୍ୟରତ ମାଟ୍ରନ ପ୍ରୀତିମୟୀ ଚକ୍ରଙ୍କୁ ରେବଣାପଳାସପାଳ ବାଳିକା ଉଚ୍ଚ ବିଦ୍ୟାଳୟକୁ ବଦଳି କରାଯାଇଛି ।
ସୂଚନାଯୋଗ୍ୟ, ଜୁଲାଇ ୬ ତାରିଖ ଦିନ ହଷ୍ଟେଲ ଭିତରେ ପ୍ରବେଶ କରି ପ୍ରଧାନ ଶିକ୍ଷକ ଦୁଇ ଜଣ ନବମ ଶ୍ରେଣୀ ଛାତ୍ରୀଙ୍କୁ ଅସଦାଚରଣ କରିଥିଲେ । ଏନେଇ ଛାତ୍ରୀ ଦ୍ୱୟ ଅଭିଭାବକଙ୍କୁ ଜଣାଇବା ସହ ୮ ତାରିଖ ଦିନ ସ୍କୁଲ ଛାଡି ପରିବାର ସଦସ୍ୟଙ୍କ ସହ ଘରକୁ ପଳାଇଥିଲେ। ଏ ନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଜିଲାପାଳ ଏହାର ତଦନ୍ତ ନିର୍ଦ୍ଦେଶ ଦେଇଥିଲେ । ତଦନ୍ତ ପରେ ଘଟଣାର ସତ୍ୟତା ଜଣାପଡିବା ପରେ ପ୍ରଧାନ ଶିକ୍ଷକଙ୍କୁ ଅନୁସୂଚିତ ଜନଜାତି ଓ ଜାତି ଉନ୍ନୟନ ବିଭାଗର ନିର୍ଦ୍ଦେଶକ ଶ୍ରୀକାନ୍ତ ତରେଇ ନିଲମ୍ବିତ କରିଥିଲେ।
