ଗଞ୍ଜାମ,୧୫।୯ (ବିଦ୍ୟାଧର ସାହୁ ): ଗଞ୍ଜାମ ବ୍ଲକ ଅନ୍ତର୍ଗତ ସାନ ରାମଚନ୍ଦ୍ର ପୁର ପଞ୍ଚାୟତ ଅଇଁଠା ବଣ ଗ୍ରାମରେ ରୁହନ୍ତି ଏସ ସୁରେନ୍ଦ୍ର ଦାସ ଓ ତାଙ୍କ ପରିବାର । ପରିବାର କହିଲେ ସୁରେନ୍ଦ୍ରଙ୍କ ବାପା,ମା, ପୁଅ ଓ ଗୋଟିଏ ଝିଅ । ସୁରେନ୍ଦ୍ରଙ୍କର ୨୫ ରୁ ୩୦ ଘୁଷୁରୀ ଥିବା ବେଳେ ପରିଣତ ବୟସରେ ମଧ୍ୟ ତାଙ୍କ ବାପା ମା’ ଘୁଷୁରୀ ଚରେଇବାରେ ସହଯୋଗ କରୁଛନ୍ତି । ଅତ୍ୟନ୍ତ ଗରିବ ପରିବାର । ତଥାପି ପୁଅ ଝିଅଙ୍କୁ ପାଠ ପଢ଼ାଇ ମଣିଷ କରିବାକୁ ଜିଦ୍ରେ ଅଟଳ ସୁରେନ୍ଦ୍ର। ପୁଅ ସଞ୍ଜୟ ଦାସ ମାଟ୍ରିକରେ ଭଲ ମାର୍କ ରଖି ପାସ୍ କରିବା ପରେ ବର୍ତ୍ତମାନ ଯୁକ୍ତ ଦୁଇରେ ଅଧ୍ୟୟନ କରୁଛନ୍ତି । ଝିଅ ମୋନାଲିସା ଦାସଙ୍କର ଆଧାର କାର୍ଡ ନ ଥିବାରୁ ସେ ପାଠ ପଢ଼ାରୁ ବଞ୍ଚିତ ଥିବା ଘଟଣା ପଦାକୁ ଆସିଛି । ମୋନାଲିସାଙ୍କୁ ଦେଢ଼ ବର୍ଷ ହୋଇଥିବା ବେଳେ ତାଙ୍କ ମା’ଙ୍କ ଦେହାନ୍ତ ହୋଇଗଲା । ମା ’ଛେଉଣ୍ଡ ମୋନାଲିସାଙ୍କ ପାଠ ପଢିବାକୁ ପ୍ରବଳ ଇଛା ଥିଲେ ମଧ୍ୟ ଆଧାରକାର୍ଡ ସାଜିଛି ବାଧକ। ଅଷ୍ଟମ ପାସ୍ କରିବା ପରେ ନବମ ଶ୍ରେଣୀ ପଢିବାକୁ ଗାଁ ପାଖ ବୁରୁଡି ସ୍କୁଲକୁ ଗଲା ବେଳେ ଆଧାର କାର୍ଡ ନ ଥିବା ଯୋଗୁଁ ମୋନାଲିସାଙ୍କୁ ସ୍କୁଲ କର୍ତ୍ତୃପକ୍ଷ ଫେରାଇ ଦେଲେ। ଆଉ କହିଲେ ଆଧାର କାର୍ଡ ଧରିକି ଆସିଲେ ହିଁ ସ୍କୁଲରେ ଆଡମିଶନ ହୋଇପାରିବ। ଅନ୍ୟପଟେ ସୁରେନ୍ଦ୍ର ତାଙ୍କ ଝିଅ ମୋନାଲିସାଙ୍କର ଆଧାର କାର୍ଡ ନିମନ୍ତେ ଗତ ୧୯/୧୨/ ୨୦୨୧ରେ ଆବେଦନ କରିଥିଲେ। ଚାରିବର୍ଷ ହେବ ବାରମ୍ବାର ବ୍ଲକକୁ ଦୌଡ଼ି ଦୌଡ଼ି ନୟାନ୍ତ ହୋଇ ପଡିଲେଣି କିନ୍ତୁ ଆଧାର କାର୍ଡ ହେଉନଥିବା ଗଣମାଧ୍ୟମକୁ କହିଛନ୍ତି ସୁରେନ୍ଦ୍ର। ଏ ସମ୍ପର୍କରେ ତହସିଲଦାର ସୁକାନ୍ତ ମିଶ୍ରଙ୍କୁ ଅବଗତ କରିବା ପରେ ଖୁବଶୀଘ୍ର ତଦନ୍ତ କରି ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି ।
