କୁନ୍ଦୁରା,୧୨ା୬ (ଡି.ଏନ.ଏ.): ବୟସ ୭୦ ଟପିଲାଣି। ନୂଆଁଣିଆ ଚାଳ ଘରେ ଜୀବନ ଜୀଇବା ପାଇଁ ସଂଘର୍ଷ କରୁଛନ୍ତି ନାଗବାଲ ଦୁରୁଆ। ଜୀବନର ଅପରାହ୍ନ ବୟସରେ ତାଙ୍କର ନିଜ ପାଇଁ ଯେତିକି ଚିନ୍ତା ନାହିଁ ତା’ଠାରୁ ଅଧିକ ଚିନ୍ତା ନାତୁଣୀ ଗୁରୁବାରୀ ପାଇଁ। ଆଖି ରୋଗରେ ପୀଡିତ ନାତୁଣୀର ଆଖି ଭଲ କରିଦେବାକୁ ସେ ଠାକୁରଙ୍କୁ କରୁଛନ୍ତି ଆକୁଳ ନିବେଦନ। କୋରାପୁଟ ଜିଲା କୁନ୍ଦୁରା ବ୍ଳକ କେରିମିଟି ପଞ୍ଚାୟତ କେନ୍ଦୁଗୁଡା ଗ୍ରାମରେ ଦେଖିବାକୁ ମିଳିଛି ଏପରି ଦୃଶ୍ୟ।
ଗୁରୁବାରୀଙ୍କ ଆଖି ସମସ୍ୟା ଯୋଗୁ ସେ ନବମ ଶ୍ରେଣୀରୁ ପାଠପଢା ଛାଡିଥିଲେ। ଆଖି ଭଲ କରିବା ଅଶାରେ ବୃଦ୍ଧା ନାଗବାଲ ନାତୁଣୀକୁ ଧରି ଜୟପୁର,କୋରାପୁଟ ଏବଂ ବିଶାଖାପାଟଣା ନେଇ ଚିକିତ୍ସା କରିଥିଲେ। ମାତ୍ର ଏଥିରୁ ତାଙ୍କୁ କିଛି ସୁଫଳ ମଳି ନ ଥିଲା। ଉଚ୍ଚତର ଚିକିତ୍ସା ପାଇଁ ନାତୁଣୀ ଗୁରୁବାରୀଙ୍କୁ କଟକ ବଡଡାକ୍ତରଖାନା ନେବାକୁ ଡାକ୍ତର ପରାମର୍ଶ ଦେଇଥିଲେ ମଧ୍ୟ ଅର୍ଥ ଅଭାବରୁ ନାତୁଣୀକୁ ସେଠାକୁ ନେଇ ପାରି ନ ଥିଲେ ବୃଦ୍ଧା ନାଗବାଲ୍। କୁଲିଭୂତି କରି ପରିବାର ଚଳାଉଥିବା ପୁଅ ଧବୁଲୁଙ୍କ ରୋଗରେ ମୃତ୍ୟୁ ପରେ ଗୁରୁବାରୀଙ୍କ ଦାୟିତ୍ୱ ପଡିଥିଲା ବୃଦ୍ଧା ନାଗବାଲଙ୍କ ଉପରେ। ନିଜ କୂଳ ରକ୍ଷା ଲାଗି ସେ ସେବେଠାରୁ ନାତୁଣୀ ଗୁରୁବାରୀର ଲାଳନପାଳନ କରିଆସୁଛନ୍ତି। ବିଦ୍ୟାଳୟରେ ପାଠ ପଢୁଥିବା ବେଳେ ଗୁରୁବାରୀଙ୍କ ବାମ ଆଖିରେ ପ୍ରଥମେ ସମସ୍ୟା ଦେଖାଦେଲା। ତାଙ୍କୁ ଭଲ କରିବାକୁ ବୃଦ୍ଧା ନାଗବାଲ୍ ମାଗିଯାଚି ନାତୁଣୀ ଗୁରୁବାରୀଙ୍କୁ କୋରାପୁଟ ଜିଲାରେ ଥିବା ସବୁ ଚିକିତ୍ସାଳୟକୁ ନେଇ ଚିକିତ୍ସା କରିଥିଲେ ମଧ୍ୟ କିଛି ସୁଫଳ ମିଳି ନ ଥିଲା। ଏବେ ସେ ଦୃଷ୍ଟିବାଧିତ ନାତୁଣୀକୁ ଧରି ଯେତିକି ହଇରାଣ ହେଉଛନ୍ତି ତାଙ୍କ ଚିନ୍ତାରେ ସେତିକି ଘାଣ୍ଟି ହେଉଛନ୍ତି। ମୁଣ୍ଡ ଗୁଞ୍ଜିବାକୁ ଘର ଟିକେ ନାହିଁ। ସରକାରୀ ଭାବେ ମିଳୁଥିବା ୫ କେଜି ଚାଉଳ ଉଭୟଙ୍କୁ ନିଅଣ୍ଟ ପଡୁଛି। ପେଟକୁ ଦି ମୁଠା ଖାଇବା ଯୋଗାଡ କରିବା କଷ୍ଟକର ହେଉଛି। ନାତୁଣୀପାଇଁ ସାହି ପଡିଶାଙ୍କଠାରୁ ମାଗିବାକୁ ପଡୁଛି ବୋଲି କହନ୍ତି ନାଗବାଲ୍। ଭଲ ଘର ଖଣ୍ଡେ ନ ଥିବାରୁ ଭଙ୍ଗାରୁଜା ଘରେ ମୁଣ୍ଡ ଗୁଞ୍ଜିଛନ୍ତି ଉଭୟେ। ଘରଟିଏ ପାଇଁ ସରପଞ୍ଚଠାରୁ ଆରମ୍ଭ କରି ବ୍ଳକ କାର୍ଯ୍ୟାଳୟ ପର୍ଯ୍ୟନ୍ତ ସମସ୍ତଙ୍କୁ କାକୁିମିନତି ହୋଇ କିଛି ସୁଫଳ ମିଳିନି ବୋଲି କହନ୍ତି ନାଗବାଲ୍ ଓ ତାଙ୍କ ନାତୁଣୀ ଗୁରୁବାରୀ। ବାରମ୍ବାର ଭତ୍ତା ପାଇଁ ଆବେଦନ କରି ଆମକୁ ମିଳିନି ବୋଲି କହନ୍ତି ଉଭୟେ।
