ଭୁବନେଶ୍ୱର,୧୧।୭(ବ୍ୟୁରୋ): କେନ୍ଦ୍ରୀୟ ଲୋକସେବା ଆୟୋଗ (ୟୁପିଏସ୍ସି)-୨୦୨୧ର ସିଭିଲ ସର୍ଭିସ ପରୀକ୍ଷାରେ ଶ୍ରୁତି ଶର୍ମା ସର୍ବଭାରତୀୟ ସ୍ତରରେ ଟପ୍ପର ହୋଇଥିଲେ। ୨୫ ବର୍ଷୀୟା ଶ୍ରୁତି ଦ୍ୱିତୀୟ ଥର ପ୍ରଚେଷ୍ଟାରେ ଏହି ସଫଳତା ପାଇଥିଲେ। ଉତ୍ତରପ୍ରଦେଶର ବିଜନୋର ଜିଲାରେ ଜନ୍ମଗ୍ରହଣ କରିଥିବା ଶ୍ରୁତି ଦିଲ୍ଲୀରେ ଶିକ୍ଷା ଗ୍ରହଣ କରିଥିଲେ। ଦିଲ୍ଲୀ ବିଶ୍ୱବିଦ୍ୟାଳୟରୁ ସ୍ନାତକ ଶିକ୍ଷା ଶେଷ କରିବା ପରେ ଇତିହାସରେ ପିଜି କରିବା ପାଇଁ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (ଜେଏନ୍ୟୁ)ରେ ନାମ ଲେଖାଇଥିଲେ। ହେଲେ ସେହି ସମୟରେ ସିଭିିଲ ସର୍ଭିସ ଲାଗି ପ୍ରସ୍ତୁତି ଆରମ୍ଭ କରିଦେଇଥିଲେ। କଠିନ ଅଧ୍ୟବସାୟ ଓ ଦୃଢ଼ ମନୋବଳ ତାଙ୍କୁ ଏହି ସଫଳତା ଦେଇପାରିଛି। ରବିବାର ଭୁବନେଶ୍ୱର ଆସିଥିବା ଅବସରରେ ଶ୍ରୁତିଙ୍କ ସହ ସାକ୍ଷାତ୍କାର।
ସମସ୍ତେ ବିଜ୍ଞାନ ବିଷୟ ନେଇଥିବା ବେଳେ ଆପଣ କଳା ବିଭାଗ କାହିଁକି ବାଛିଥିଲେ?
ଯଦିଓ ସମସ୍ତଙ୍କର ବିଜ୍ଞାନ ବିଷୟ ଥିଲା, କିନ୍ତୁ ମୋର ଇତିହାସ, ହ୍ୟୁମାନିଟିଜ୍ ପ୍ରତି ଦୁର୍ବଳତା ଥିଲା। ଏଥିସହିତ ଯଦି ମୁଁ ସିଭିଲ ସର୍ଭିସ ଦିଗରେ ଯିବି ତେବେ ଆଗକୁ ଯାଇ ଦେଶ ସେବା କରିପାରିବି ବୋଲି ଭାବିଲି। ତେଣୁ ଏସବୁ ଦିଗକୁ ଦେଖି ମୁଁ କଳା ବିଭାଗ ବାଛିଥିଲି।
ଅନୁଭୂତି ସମ୍ପର୍କରେ କ’ଣ କହିବେ?
ସାକ୍ଷାତକାର (ଇଣ୍ଟରଭ୍ୟୁ) ପାଇଁ ଗଲାବେଳେ ସମସ୍ତଙ୍କ ମନରେ ଭୟ ଥାଏ। ମୋର ବି ଥିଲା। କିଛି ପ୍ରଶ୍ନ ପଚରାଯାଇଥିଲା, ଯାହାର ଉତ୍ତର ମୁଁ ଜାଣି ନ ଥିଲି। ଯେମିତି କି ମୋତେ ଏନ୍ଆଇଏ, ୧୮୧୨ରେ ହୋଇଥିବା ଯୁଦ୍ଧ ସମ୍ପର୍କରେ ପଚରାଯାଇଥିଲା। କିନ୍ତୁ ମୁଁ ଜାଣି ନ ଥିଲି। ସେ ସମୟରେ ଶାନ୍ତ ରହିବା ଦରକାର ଏବଂ ମୋତେ ଉତ୍ତର ଆସୁନାହିଁ ବୋଲି ସିଧାସଳଖ କହିଦେବା ଉଚିତ। ମୁଁ ତାହା ହିଁ କରିଥିଲି।
ବିଭିନ୍ନ ପ୍ରକାର ଆହ୍ବାନ ରହିଛି। ଶ୍ରୁତି ଶର୍ମା କେଉଁ କ୍ଷେତ୍ରରେ ଯିବା ପାଇଁ ପସନ୍ଦ କରିବେ?
ଶିକ୍ଷା, ମହିଳା ସଶକ୍ତୀକରଣ, ସ୍ବାସ୍ଥ୍ୟ ବା ଯେଉଁ କ୍ଷେତ୍ର ବି ହେଉ, ମୋତେ ଯାହା ଦାୟିତ୍ୱ ଦିଆଯିବ ସେଥିରେ ମୁଁ ନିଷ୍ଠାପର ସହ କାର୍ଯ୍ୟ କରିବି।
ସିଭିଲ ସର୍ଭିସରେ ସଫଳତା ପାଉନାହାନ୍ତି, ସେମାନଙ୍କ ପାଇଁ କ’ଣ କହିବେ?
ସବୁ ଯାତ୍ରାର ସଫଳତା ଏବଂ ଅସଫଳତା ଏକ ଅଂଶ। ତେଣୁ ତଳୁ ଉଠି ଆମକୁ ପୁଣି ଆଗକୁ ଯିବାର ଅଛି। ଯଦି ଗୋଟିଏ ପ୍ରୟାସରେ ଅସଫଳତା ମିଳୁଛି, ଆଉଥରେ ଚେଷ୍ଟା କରିବା ଦରକାର। ସବୁବେଳେ ସକାରାତ୍ମକ ଦୃଷ୍ଟିକୋଣ ରହିବା ଉଚିତ। ସମାଜ ସେବା କରିବାକୁ ଆହୁରି ବିଭିନ୍ନ କ୍ଷେତ୍ର ରହିଛି। ସେଥିରେ ବି ସେମାନେ ଚେଷ୍ଟା କରିବା ଉଚିତ। ତେବେ ଯଦି ସିଭିଲ ସର୍ଭିସ କ୍ଷେତ୍ରରେ ହିଁ ଯିବା ପାଇଁ ନିଶ୍ଚିତ ଥିବ, ତେବେ ଆଉଥରେ ସୁଯୋଗ ନିଅ ଏବଂ ନିଜ ଭୁଲ୍କୁ ସୁଧାର। ଫଳରେ ନିଶ୍ଚିତ ଭାବେ ସଫଳତା ପାଇପାରିବ।
ଆଶାୟୀଙ୍କୁ କ’ଣ କହିବେ?
ଯାହା ବି ତୁମେ ଲକ୍ଷ୍ୟ ରଖୁଛ, ସେଥିରେ ଶତ ପ୍ରତିଶତ ଦେବା ପାଇଁ ଚେଷ୍ଟା କରିବା ଉଚିତ। କେବଳ ଅଧିକ ସମୟ ପାଠ ପଢ଼ିଲେ ହେବ ନାହିଁ। ଯେତିକି ସମୟ ବି ପଢ଼ିବ ତାହା ମୂଲ୍ୟବାନ ହୋଇଥିବା ଦରକାର। ଚେଷ୍ଟା ଜାରି ରହିଲେ ଏବଂ ମନୋବଳ ଦୃଢ଼ ଥିଲେ ନିଶ୍ଚିତ ଭାବେ ସଫଳତା ମିଳିବ।
ୟୁପିଏସ୍ସିରେ ବହୁତ କମ୍ ପିଲା ର଼୍ୟାଙ୍କ୍ ପାଉଛନ୍ତି। ଆପଣଙ୍କୁ ଲାଗୁଛି ଯେ କେବଳ ଦିଲ୍ଲୀ ଗଲେ ସଫଳତା ମିଳିବ?
ନା। ମୁଁ ସେମିତି ଭାବେ ନାହିଁ। କାରଣ ପ୍ରତିବର୍ଷ ସିଭିଲ ସର୍ଭିସ ପରୀକ୍ଷାରେ ଦେଶର ବିଭିନ୍ନ ପ୍ରାନ୍ତରୁ ପିଲା ସଫଳତା ପାଉଛନ୍ତି। ଓଡ଼ିଶାରୁ ମଧ୍ୟ ମନୋନୀତ ହେଉଛନ୍ତି। ଆଜିକାଲି ସବୁ ମାଟେରିଆଲ, ମେଣ୍ଟରଶିପ୍ ଭଳି ବିଭିନ୍ନ ସୁବିଧା ସବୁଠି ଉପଲବ୍ଧ। ଅନ୍ଲାଇନ୍ରେ ସବୁ କିଛି ମିଳିଯାଉଛି। ତେଣୁ ମୁଁ ଭାବୁଛି, ସବୁ ଜାଗାରେ ବସି ପାଠ ପଢ଼ାଯାଇପାରିବ। ପ୍ରତିଦ୍ୱନ୍ଦ୍ୱିତା ପାଇଁ ଏକ ସୁଚିନ୍ତିତ ରଣନୀତି ଏବଂ ଦୃଢ଼ ସଙ୍କଳ୍ପର ଆବଶ୍ୟକତା ରହିଛି।
-ସାକ୍ଷାତ୍କାର: ଅସମାପିକା ସାହୁ