ଆଜିର ଯୁବପିଢ଼ିଙ୍କ ପସନ୍ଦ ସତରେ ଅଜବ। ଆଉ ସେମାନଙ୍କ ରୁଚିକୁ ଆଖି ଆଗରେ ରଖି ନାମୀଦାମୀ କମ୍ପାନିଗୁଡ଼ିକ ମଧ୍ୟ ବିଭିନ୍ନ ସାମଗ୍ରୀ ପ୍ରସ୍ତୁତ କରୁଛନ୍ତି । ଜାଣିବା କେତୋଟି ଅଜବ ଜୋତା ସମ୍ପର୍କରେ…
ଦି ରାଟ୍ ଶୁ: ଏହି ଜୋତା ଦେଖିବା ପାଇଁ ଦୁଇଟି ବଡ଼ ମୂଷା ଭଳି। ହଠାତ୍ ଏହାକୁ ଦେଖିଲେ ଯେକେହି ଡରିଯିବ। ଦୁର୍ବଳମନା ଏହାକୁ ନ ପିନ୍ଧିବା ଲାଗି ସେଥିରେ ମଧ୍ୟ ଲେଖା ରହିଛି। ତେବେ ଏହି ଜୋତାକୁ ହାଲୋଓ୍ବିନ୍ ଥିମ୍ ପାର୍ଟିରେ ପିନ୍ଧିବାକୁ ଯୁବପିଢ଼ି ଅଧିକ ପସନ୍ଦ କରୁଥିବା ଦେଖିବାକୁ ମିଳୁଛି।
ଏ ଓ୍ବାକିଂ ପିସ୍ ଅଫ୍ ଆର୍ଟ: ଲେଦରରେ ପ୍ରସ୍ତୁତ ହୋଇଥିବା ଏହି ଜୋତାଟି ଦେଖିବାକୁ ଖୁବ୍ ଆକର୍ଷଣୀୟ। କାରଣ ଏହା ଉପରେ ରହିଛି ସବୁଜ ଘାସ, ଏକ ଗଛ, ପଥର, କାଠ ଏବଂ ଘୋଡ଼ା; ଯାହାକୁ ଦେଖିଲେ ଏକ ମନୋରମ ସବୁଜ ପ୍ରାକୃତିକ ପରିବେଶର ଭ୍ରମ ସୃଷ୍ଟି କରିଥାଏ। ପ୍ରକୃତିପ୍ରେମୀ ଯୁବପିଢ଼ିଙ୍କୁ ଏହି ଜୋତା ଅଧିକ ଆକୃଷ୍ଟ କରୁଛି। ତେବେ ଏହାକୁ ପାଦରେ ପିନ୍ଧିବା ଅପେକ୍ଷା ଶୋ’ କେସ୍ରେ ସଜାଇବା ପାଇଁ ଅନେକେ କିଣୁଥିବା ଦେଖିବାକୁ ମିଳୁଛି।
ସ୍ୟାଣ୍ଡଓ୍ବିଚ୍ ଥଙ୍ଗ୍ସ: ଏହି ଫୁଟ୍ଓ୍ବେର୍କୁ ସ୍ୟାଣ୍ଡଓ୍ବିଚ୍ ଫ୍ଲିପ୍ ଫ୍ଲପ୍ ବି କୁହାଯାଏ। ଏହି ଜୋତାଟି ଦେଖିବାକୁ ମ୍ୟାକ୍ଡୋନାଲ୍ଡ ହାମ୍ବର୍ଗର ଭଳି। ଏଥିରେ ଦୁଇଟି ବ୍ରେଡ୍ ପିସ୍ ଆକୃତିର ସ୍ପଞ୍ଜ ମଧ୍ୟରେ ମିଟ୍, ସାଲାଡ୍ ଏବଂ ଚିଜ୍ ଆକାରର ନରମ ଫୋମ୍ ଦିଆଯାଇଛି, ଯାହାକି ପାଦ ପାଇଁ ଖୁବ୍ ଆରାମଦାୟକ। ଏହା ଦେଖିବାକୁ ସମ୍ପୂର୍ଣ୍ଣ ଭିନ୍ନ ଏବଂ ଆଇକ୍ୟାଚି। ଯୁବପିଢ଼ି ପିକ୍ନିକ୍ କିମ୍ବା କୌଣସି ଥିମ୍ ପାର୍ଟିରେ ଏହାକୁ ପିନ୍ଧିବାକୁ ବେଶୀ ପସନ୍ଦ କରୁଛନ୍ତି।
