ରାଉରକେଲା, ୧୦।୩ (ସଂଗୀତା ଜେନା): ରାଉରକେଲା ଇସ୍ପାତ ଜେନେରାଲ ହସ୍ପିଟାଲ (IGH) ପରିସରରେ ଏକ ହୃଦୟ ବିଦାରକ ତଥା ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ହସ୍ପିଟାଲର ଜରୁରୀକାଳୀନ ବିଭାଗରେ ଥିବା ମହିଳା ଶୌଚାଳୟର ପ୍ୟାନ ଭିତରୁ ଏକ ନବଜାତ ଶିଶୁର ମୃତଦେହ ଉଦ୍ଧାର କରାଯାଇଛି।
ପୋଲିସଠାରୁ ମିଳିଥିବା ସୂଚନା ଅନୁଯାୟୀ, ଗତକାଲି (ସୋମବାର) ବିଳମ୍ବିତ ରାତି ପ୍ରାୟ ୧୧:୧୫ ସମୟରେ ବେଦବ୍ୟାସ ଅଞ୍ଚଳର ଜଣେ ଯୁବତୀ ପେଟରେ ଅତ୍ୟଧିକ ଯନ୍ତ୍ରଣା ଅନୁଭବ କରିବାରୁ IGHକୁ ଚିକିତ୍ସା ପାଇଁ ଆସିଥିଲେ। ଡାକ୍ତରଖାନାରେ ଥିବା ସମୟରେ ସେ ଶୌଚାଳୟକୁ ଯାଇଥିଲେ ଏବଂ ସେଠାରେ ହିଁ ସେ ଶିଶୁଟିକୁ ପ୍ରସବ କରିଥିଲେ। ଦୁର୍ଭାଗ୍ୟବଶତଃ ଜନ୍ମ ପରେ ନବଜାତକଟି ଶୌଚାଳୟ ପ୍ୟାନ ଭିତରେ ଖସି ପଡ଼ିଥିଲା, ଫଳରେ ତାର ମୃତ୍ୟୁ ଘଟିଥିବା ଅଭିଯୋଗ ହୋଇଛି।
ଘଟଣା ସମ୍ପର୍କରେ ଖବର ପାଇ ସେକ୍ଟର-୧୯ ଥାନା ପୋଲିସ ତୁରନ୍ତ ହସ୍ପିଟାଲରେ ପହଞ୍ଚି ତଦନ୍ତ ଆରମ୍ଭ କରିଛି। ପୋଲିସ ଏହି ମାମଲାକୁ ଏକ ଅପ୍ରାକୃତିକ ମୃତ୍ୟୁ ଭାବେ ରୁଜୁ କରିଛି। ଟଏଲେଟ ପ୍ୟାନ ଭିତରେ ଶିଶୁଟି ଫସି ରହିଥିବାରୁ, ପ୍ୟାନ୍କୁ ଭାଙ୍ଗି ମୃତଦେହକୁ ବାହାର କରାଯାଇଛି। ହସ୍ପିଟାଲ ପରିସରରେ ଥିବା ସିସିଟିଭି ଫୁଟେଜ୍କୁ ପୋଲିସ ଯାଞ୍ଚ କରୁଛି, ଯାହାଦ୍ୱାରା ଯୁବତୀଙ୍କ ଆସିବା ଏବଂ ଘଟଣା ସମୟର ସଠିକ ତଥ୍ୟ ମିଳିପାରିବ। ଆସନ୍ତାକାଲି (ବୁଧବାର) ଶିଶୁର ଶବ ବ୍ୟବଚ୍ଛେଦ କରାଯିବ ବୋଲି ପୋଲିସ ସୂଚନା ଦେଇଛି।
ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଯୁବତୀ ଜଣକ କେଉଁ ପରିସ୍ଥିତିରେ ଶୌଚାଳୟ ଭିତରେ ପ୍ରସବ କଲେ ଏବଂ ଏଥିରେ ହସ୍ପିଟାଲ କର୍ତ୍ତୃପକ୍ଷଙ୍କର କୌଣସି ଅବହେଳା ରହିଛି କି ନାହିଁ, ସେ ନେଇ ପୋଲିସ ଖୋଳତାଡ଼ କରୁଛି।
