ଢେଙ୍କାନାଳ ଅଫିସ, ୨୩।୭ ପାସେଞ୍ଜର ହଲ୍ଟରେ ଅଟକି ରହିଥିଲା ଟ୍ରେନ୍। ଜାତୀୟ ରାଜପଥ, ପୁରୁଣା କଟକ-ସମ୍ବଲପୁର ରାସ୍ତାରେ ଗନ୍ତବ୍ୟସ୍ଥଳକୁ ଯିବା ପାଇଁ ଅପେକ୍ଷା କରି ରହିଥିଲେ ସହସ୍ରାଧିକ ଯାନବାହନ। ବନ୍ଦ ରହିଥିଲା ବ୍ୟବସାୟିକ ପ୍ରତିଷ୍ଠାନଠାରୁ ଆରମ୍ଭ କରି ସରକାରୀ, ବେସରକାରୀ କାର୍ଯ୍ୟାଳୟ। ଶିକ୍ଷାନୁଷ୍ଠାନରେ ଝୁଲୁଥିଲା ତାଲା। ରାତି ପାହିଲେ ଚଳଚଞ୍ଚଳ ହୋଇଉଠୁଥିବା ସହର ଜନଶୂନ୍ୟ ହୋଇଯାଇଥିବାବେଳେ ଛାଇ ଯାଇଥିଲା ନୀରବତା। ୫୫ନଂ. ଜାତୀୟ ରାଜପଥ ସମ୍ପ୍ରସାରଣରେ ଅହେତୁକ ବିଳମ୍ବ ପ୍ରତିବାଦରେ ଶୁକ୍ରବାର ଜିଲା ଓକିଲ ସଂଘ ପକ୍ଷରୁ ଦିଆଯାଇଥିବା ୧୨ଘଣ୍ଟିଆ ଢେଙ୍କାନାଳ ବନ୍ଦ ଡାକରାକୁ ସବୁସ୍ତରରୁ ବିପୁଳ ସମର୍ଥନ ମିଳିଥିବାବେଳେ ଠପ୍ ହୋଇଯାଇଥିଲା ସାଧାରଣ ଜୀବନଯାତ୍ରା।
କଟକ ଜିଲା ମଙ୍ଗୁଳି ଛକଠାରୁ ଢେଙ୍କାନାଳ-ଅନୁଗୋଳ ଦେଇ ସମ୍ବଲପୁରକୁ ସଂଯୋଗ କରୁଥିବା ୫୫ନଂ. ଜାତୀୟ ରାଜପଥ ସମ୍ପ୍ରସାରଣ କାର୍ଯ୍ୟ ବିଳମ୍ବିତ ହେବାରେ ଲାଗିଛି। ଠିକାସଂସ୍ଥା ଓହରିଯିବା ପରେ ଦୀର୍ଘଦିନ ହେଲା କାମ ବନ୍ଦ ରହିଛି। ଏହି ବ୍ୟସ୍ତବହୁଳ ସଡ଼କ ମରଣଯନ୍ତା ପାଲଟିଛି। ବାରମ୍ବାର ଦାବି, ଆନ୍ଦୋଳନ ସତ୍ତ୍ୱେ ଜାତୀୟ ରାଜପଥ ପ୍ରାଧିକରଣ (ଏନ୍ଏଚ୍ଏଆଇ) କର୍ତ୍ତୃପକ୍ଷ ପ୍ରତିଶ୍ରୁତି ରକ୍ଷାରେ ବିଫଳ ହୋଇଛନ୍ତି। ଏହାର ପ୍ରତିବାଦରେ ଢେଙ୍କାନାଳ ବନ୍ଦ ପାଳିତ ହୋଇଥିଲା। ଓକିଲ ସଂଘ ଆହ୍ବାନ କ୍ରମେ ଏଥିରେ ସାମିଲ ହୋଇଥିଲେ ଜିଲା ଶିଳ୍ପ ଓ ବାଣିଜ୍ୟ ସଂଘ, ବସ୍ ଓ ଟ୍ରକ୍ ମାଲିକ ସଂଘ, ସଚେତନ ନାଗରିକ ଫୋରମ୍, ଆମ ପ୍ରତିଭା ଆମ ସମ୍ମାନ, ଜିଲା ସାମ୍ବାଦିକ ସଂଘ, ମିଳିତ ବଜାର ପୂଜା କମିଟି, ମିଳିତ କ୍ରିୟାନୁଷ୍ଠାନ କମିଟି, ବିଭିନ୍ନ ରାଜନୈତିକ ଦଳର ପ୍ରତିନିଧି, ବୁଦ୍ଧିଜୀବୀ।
ପୂର୍ବ ନିଷ୍ପତ୍ତି ଅନୁଯାୟୀ ସକାଳ ୭ଟାରେ ସହର ଉପକଣ୍ଠ ଶ୍ୟାମାଚରଣପୁର ପାସେଞ୍ଜର ହଲ୍ଟ ରେଳଷ୍ଟେଶନରେ ୨ଘଣ୍ଟା ଧରି ରେଳରୋକୋ କରାଯାଇଥିଲା। ଫଳରେ ଅନୁଗୋଳ-ପୁରୀ ମେମୁ ଟ୍ରେନ୍ ଅଟକି ରହିଥିଲା। ଏଥିସହ କଲେଜ ବାଇପାସ୍ ଓ କୋରିଅଁା ବାଇପାସ୍ ନିକଟ ୫୫ନଂ. ଜାତୀୟ ରାଜପଥ, ଭାପୁର ନିକଟ ପୁରୁଣା କଟକ-ସମ୍ବଲପୁର ରାସ୍ତା ଅବରୋଧ କରାଯାଇଥିଲା। ସହରରେ ଯାନବାହାନ ଚଳାଚଳ, ବ୍ୟବସାୟିକ ପ୍ରତିଷ୍ଠାନ, ବ୍ୟାଙ୍କ, କୋର୍ଟ, ଶିକ୍ଷାନୁଷ୍ଠାନ, ସରକାରୀ ବେସରକାରୀ କାର୍ଯ୍ୟାଳୟ ସମ୍ପୂର୍ଣ୍ଣ ବନ୍ଦ ରହିଥିଲା।
ସମ୍ପାଦକ ଟଙ୍କଧର ବେହେରା, ସଂଘ ସଦସ୍ୟ ଆଇନଜୀବୀ କୃଷ୍ଣଚନ୍ଦ୍ର ସାହୁ, ନବକିଶୋର ଗୁରୁ, ଦୀପକ ପ୍ରସାଦ ପଟ୍ଟନାୟକ, ଦେବାଶିଷ ମିଶ୍ର, ଗୋପାଳଚନ୍ଦ୍ର ପାତ୍ର, ଭାବଗ୍ରାହୀ ପଣ୍ଡା, ଜିତେନ୍ଦ୍ର ପଟ୍ଟନାୟକ, ବସ୍ ମାଲିକ ସଂଘ ସଭାପତି ପ୍ରଭାକର ବେହେରା, ଯୁଗ୍ମ ସମ୍ପାଦକ ରୁଦ୍ରନାରାୟଣ ତ୍ରିପାଠୀ, ସାମାଜିକ କର୍ମୀ ରାମଚନ୍ଦ୍ର ପାତ୍ର, ଜିଲା ସାମ୍ବାଦିକ ସଂଘ ସମ୍ପାଦକ ସତ୍ୟସ୍ବରୂପ ଦାସ, ବିନୋଦ ମହାନ୍ତି, ଅରବିନ୍ଦ ସାହୁ, ଅଥୟ ସାହୁ, ‘ଆମ ପ୍ରତିଭା ଆମ ସମ୍ମାନ’ ପକ୍ଷରୁ ରୁଦ୍ରାନ୍ତ ଦଳେଇ, ପ୍ରିୟରଞ୍ଜନ ମାହୁନ୍ତ, ଶ୍ୟାମସୁନ୍ଦର ସାହୁ, ସଦାଶିବ ମହାପାତ୍ର, ସଚେତନ ନାଗରିକ ଫୋରମ୍ ପକ୍ଷରୁ ଭରତ ଦାସ, ମିଳିତବଜାର ପୂଜା କମିଟି ସଭାପତି ବିଶ୍ୱନାଥ ବେହେରା, ଶିଳ୍ପ ଓ ବାଣିଜ୍ୟ ପ୍ରତିଷ୍ଠାନ ସଭାପତି ରାଜେନ୍ଦ୍ର ଦାସ, ବିନୋଦ ଅଗ୍ରୱାଲ, ରାଜକିଶୋର ବେହେରା, ପୌର ଉପାଧ୍ୟକ୍ଷ ପ୍ରକାଶ ଚନ୍ଦ୍ର କୁଅଁର, ଜିଲା କଂଗ୍ରେସ ମୁଖପାତ୍ର ପ୍ରେମ ଶଙ୍କର ମିଶ୍ରଙ୍କ ସହସ୍ରାଧିକ ବ୍ୟକ୍ତି ଏଥିରେ ସାମିଲ ହୋଇଥିଲେ।