ଭୁବନେଶ୍ୱର, ୫।୪(କ୍ରୀଡ଼ା ପ୍ରତିନିଧି)- ଓଡ଼ିଶା ରାଜ୍ୟ ଚେସ୍ ଆସୋସିଏଶନ ଆନୁକୂଲ୍ୟରେ ଟଙ୍କପାଣି ରୋଡ୍ସ୍ଥିତ ସାଇ ବୀଣାପାଣି ଜ୍ଞାନମନ୍ଦିରରେ ରବିବାର ଅନୁଷ୍ଠିତ ନିଶିତ ମହାନ୍ତି ମେମୋରିଆଲ ରାଜ୍ୟ ସ୍କୁଲ୍ସ ଓପନ ଚେସ୍ରେ ହର୍ଷିତ ରଞ୍ଜନ ସାହୁ ଚାମ୍ପିୟନ ହୋଇଛନ୍ତି। ୬ ରାଉଣ୍ଡ ବିଶିଷ୍ଟ ପ୍ରତିଯୋଗିତାରେ କଟକର ହର୍ଷିତ ୬ ପଏଣ୍ଟ ସହ ପ୍ରଥମସ୍ଥାନ ଅଧିକାର କରିଛନ୍ତି। ୪.୫ ପଏଣ୍ଟ ଲେଖାଏ ପାଇ ଆଦିତ୍ୟ ରଞ୍ଜନ ଦାସ ଓ ନିଖିଲ ସାହୁ ଯଥାକ୍ରମେ ଦ୍ୱିତୀୟ ଓ ତୃତୀୟ ସ୍ଥାନ ଅଧିକାର କରିଛନ୍ତି। ଅନ୍ୟମାନଙ୍କ ମଧ୍ୟରେ ପ୍ରତୀକ କୁଶାଲ ରାଉତ, ପ୍ରଜ୍ଞାଶ୍ରୀ ଦେହୁରି, ମନସିଜ ସାମଲ, ତ୍ରିଦେବ ତୀର୍ଥଙ୍କର (ସମସ୍ତେ ୪ ପଏଣ୍ଟ), ଲଳିତ ରଞ୍ଜନ ସାହୁ, ଅର୍କ ମିଶ୍ର ଓ ଅଂଶୁମାନ ପଟ୍ଟନାୟକ (୩ ପଏଣ୍ଟ) ଟପ୍-୧୦ ଫିନିଶ୍ କରିଛନ୍ତି। ସାର୍ଥକ ମହାନ୍ତି, ତନିରିକା ସାହୁ, ହର୍ଷିତ ସିଂ, ଅମ୍ଳାନ ସେନାପତି, ଅଂଶୁମାନ ପତି, ଅର୍ନବ ମହାନ୍ତି, ସାହାନା ଲିମ୍କା, ବୈଭବ ଘୋଷ, ନମସ୍ୟ ନଳିନୀ ଓ ଅଦିତି ମହାରଣାଙ୍କୁ ସ୍ବତନ୍ତ୍ର ଏବଂ ଆୟୁଷ୍ମାନ ସାମନ୍ତରାୟ, ଦିବ୍ୟାଂଶୁ ମହାପାତ୍ରଙ୍କୁ ସାନ୍ତ୍ୱନାମୂଳକ ପୁରସ୍କାର ପ୍ରଦାନ କରାଯାଇଛି। ଅଜୟ ବିନୟ ଇନ୍ଷ୍ଟିଚ୍ୟୁଟ ଅଫ୍ ଟେକ୍ନୋଲୋଜିର ଏମ୍ସିଏ ବିଭାଗ ମୁଖ୍ୟ ଅମରେଶ ସାହୁ, ରାଜ୍ୟ ଗୋଇନ୍ଦା ବିଭାଗ ଇନ୍ସପେକ୍ଟର ଦୀପିକା ପ୍ରିୟଦର୍ଶିନୀ ସାହୁ ଅତିଥିଭାବେ ଯୋଗଦେଇ ପୁରସ୍କାର ପ୍ରଦାନ କରିଥିଲେ। ଓଡ଼ିଶା ରାଜ୍ୟ ଚେସ୍ ଆସୋସିଏଶନ ନିର୍ଦ୍ଦେଶକ ଦେବାଶିଷ ପାଣିଗ୍ରାହୀ, ଜ୍ଞାନମନ୍ଦିରର ସମ୍ପାଦକ ଭବାନୀ ଶଙ୍କର ମହାପାତ୍ର, ପ୍ରଧାନ ଶିକ୍ଷୟିତ୍ରୀ ମମତା ମହାପାତ୍ର ପ୍ରମୁଖ ଉପସ୍ଥିତ ଥିଲେ।
