ଭୁବନେଶ୍ୱର: ଦେଶର ଶିଳ୍ପ ଶ୍ରମିକଙ୍କ ଲାଗି ଉଦ୍ଦିଷ୍ଟ ହାରାହାରି ଖାଉଟି ମୂଲ୍ୟସୂଚୀ ସେପ୍ଟେମ୍ବରରେ ୧୧୮.୧ ପଏଣ୍ଟ ଥିଲା। ଏହା ଅକ୍ଟୋବରରେ ୧୧୯.୫ ପଏଣ୍ଟକୁ ବଢିଛି। ତାଳଚେର, ଅନୁଗୋଳରେ ଏହା ୧୨୭.୪ ଥିବାବେଳେ ଅକ୍ଟୋବରରେ ୦.୨ ପଏଣ୍ଟ ବଢି ୧୨୭.୬ ଛୁଇଁଛି। କଟକରେ ଏହା ୧୨୬.୯ ପଏଣ୍ଟରେ ଅପରିବର୍ତ୍ତିତ ରହିଛି। କେନ୍ଦୁଝରରେ ୧୨୫.୭ରୁ ୦.୧ ପଏଣ୍ଟ ବଢି ୧୨୫.୮ ପଏଣ୍ଟ ହୋଇଛି। ଚଳିତ ଥର ରାଉରକେଲାକୁ ଏଥିରୁ ବାଦ ଦିଆଯାଇଛି। ବର୍ତ୍ତମାନ ରାଷ୍ଟ୍ରାୟତ୍ତ ଉଦ୍ୟୋଗ କର୍ମଚାରୀମାନେ ୧୬୫.୪% ମହଙ୍ଗା ଭତ୍ତା ପାଉଛନ୍ତି। ସେମାନଙ୍କର ଭତ୍ତାରେ ୬% ବଢି ୧୭୧.୪% ହୋଇଛି। ଏହି ବର୍ଦ୍ଧିତ ଭତ୍ତାକୁ ସେମାନେ ୨୦୨୧ ଜୁଲାଇ ପହିଲାରୁ ପାଇବେ। ଅଧିକାଂଶ ସରକାରୀ କର୍ମଚାରୀ ବର୍ତ୍ତମାନ ୧୭% ମହଙ୍ଗା ଭତ୍ତା ପାଉଛନ୍ତି। ସେମାନଙ୍କର ୧୧% ଭତ୍ତା ବୃଦ୍ଧି ହୋଇ ୨୮% ହୋଇଛି। ବର୍ଦ୍ଧିତ ଡିଏ ମଧ୍ୟରୁ ୪% ପିଛିଲା ଭାବେ ଚଳିତ ବର୍ଷ ଜାନୁୟାରୀ ଏବଂ ଅବଶିଷ୍ଟ ୩% ଜୁଲାଇ ପହିଲାରୁ ଏବଂ ଆଉ ଅବଶିଷ୍ଟ ୪%, ୨୦୨୧ ଜାନୁୟାରୀ ପହିଲାରୁ କର୍ମଚାରୀମାନେ ପାଇବେ।
ବ୍ୟାଙ୍କ କର୍ମଚାରୀମାନେ ବର୍ତ୍ତମାନ ୮୧.୮% ମହଙ୍ଗା ଭତ୍ତା ପାଉଛନ୍ତି। ସେମାନଙ୍କର ଭତ୍ତାରେ ୩.୬% ବୃଦ୍ଧି ଘଟି ୮୫.୪% ହୋଇଛି। ସଂଶୋଧିତ ହାରରେ ୨୬.୩୨% ସେମାନେ ୨୦୨୧ ଫେବୃୟାରୀ ପହିଲାରୁ ପାଇବେ। ସେହିଭଳି ବୀମା କର୍ମଚାରୀମାନେ ବର୍ତ୍ତମାନ ୭୫.୧% ମହଙ୍ଗା ଭତ୍ତା ଲାଭ କରୁଛନ୍ତି। ସେମାନଙ୍କର ମଧ୍ୟ ଡିଏରେ ୩.୬% ବୃଦ୍ଧି ଘଟି ୭୮.୭% ହୋଇଛି। ଏହି ବର୍ଦ୍ଧିତ ଡିଏ ସେମାନେ ଫେବୃୟାରୀ ପହିଲାରୁ ପାଇବେ।
