ବ୍ରହ୍ମପୁର ଅଫିସ,୨୪।୪: ଓଡ଼ିଶାରେ ଚାଲିଥିବା ଏକ ନକଲି ସାର୍ଟିଫକେଟ ରାକେଟର ପର୍ଦାଫାଶ କରିଛି ବ୍ରହ୍ମପୁର ପୁଲିସ । ଏହି ରାକେଟର ମୁଖ୍ୟ ତଥା ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକ ଲଙ୍ଗଳେଶ୍ବରର ସରକାରୀ ଶିକ୍ଷକ ଦଇତାରୀ ବେହେରାଙ୍କ ସମେତ ଢେଙ୍କାନାଳର ପ୍ରଶାନ୍ତ କୁମାର ସାହୁ, କଟକର କିଶୋର ବେହେରା ଓ ଦୈତାରୀଙ୍କ ପୁଅ ଅମୃତ ପ୍ରସାଦ ବେହେରାଙ୍କୁ ପୋଲିସ ଗିରଫ କରିଛି । ଅଭିଯୁକ୍ତଙ୍କ ନିକଟରୁ ଓଡ଼ିଶାର ବିଭିନ୍ନ କଲେଜ ଓ ବିଶବିଦ୍ୟାଳୟର ନକଲି ସାର୍ଟିଫିକେଟ ସହ ଆନ୍ଧ୍ରପ୍ରଦେଶ, ଛତିଶଗଡ ରାଜ୍ୟର ବିଭିନ୍ନ କଲେଜ ଓ ବୋର୍ଡର ନକଲି ସାର୍ଟିଫିକେଟ ଓ ସିଲ, ବିପିୟୁଟିର ନକଲି ସାର୍ଟିଫିକେଟ ଓ ସିଲ ଜବତ ହୋଇଛି । ସେହିପରି କମ୍ପ୍ୟୁଟର, ପ୍ରିଣ୍ଟର ଏବଂ ୧୦୦ ରୁ ଅଧିକ ସିଲ ଜବତ ହୋଇଛି । ଜଣେ ମହିଳାଙ୍କୁ ବିଏଡ କରିଦେବାକୁ କହି ଲକ୍ଷାଧିକ ଟଙ୍କା ନେବା ପରେ ପରବର୍ତ୍ତୀ ସମୟରେ ତାଙ୍କୁ ନକଲି ସାର୍ଟିଫିକେଟ ଦେଇଥିଲେ ଦଇତାରୀ ବେହେରା । ଏ ନେଇ ମହିଳା ଜଣଙ୍କ ଗୋସାଇଁ ନୂଆଗାଁ ଥାନାରେ ଅଭିଯୋଗ କରିଥିଲେ । ଅସଲି ଭଳି ଦେଖା ଯାଉଥିବା ଏହି ନକଲି ସାର୍ଟିଫିକେଟ ସବୁ ଢେଙ୍କାନାଳରେ ପ୍ରିଣ୍ଟ ହେବା ପରେ କଟକରେ ସିଲ ମରା ଯାଉଥିଲା ।
