ବ୍ରହ୍ମପୁର,୨୪।୯(ସୁବାସ ଚନ୍ଦ୍ର ପାଢ଼ୀ): ଦୀର୍ଘ ବର୍ଷ ପରେ ବ୍ରହ୍ମପୁର ସାଇବର ଥାନା ପୋଲିସକୁ ମିଳିଛି ସଫଳତା। ଜଣେ ଆନ୍ତଃରାଜ୍ୟ ସାଇବର ଠକଙ୍କ ମୋବାଇଲ ଟ୍ରାକିଂ କରି ଝାଡ଼ଖଣ୍ଡର ଦେଓଘରରୁ ଗିରଫ କରିଛି ବ୍ରହ୍ମପୁର ପୋଲିସ ଟିମ। ଗିରଫ ଠକ ହେଲେ ଦେଓଘର ଜିଲା କରୋନ ଥାନା ଅନ୍ତର୍ଗତ ନାଗାଡରି ଗ୍ରାମର ମହମ୍ମଦ ଅଫଜଲ ଅନ୍ସାରୀ। ତାଙ୍କୁ ଦେଓଘର ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟଙ୍କ ସମ୍ମୁଖରେ ହାଜର କରିବା ପରେ ୩ ଦିନିଆ ରିମାଣ୍ଡରେ ବ୍ରହ୍ମପୁର ଆଣିଛି ପୋଲିସ୍। ଶନିବାର ଅଭିଯୁକ୍ତଙ୍କୁ ବ୍ରହ୍ମପୁର ଏସଡ଼ିଜେଏମ କୋର୍ଟରେ ହାଜର କରାଯାଇଥିଲା। ପରେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ସାଇବର ଠକ ଗ୍ୟାଙ୍ଗର ଅନ୍ୟ ସଦସ୍ୟଙ୍କ ସମ୍ପର୍କରେ ଅଧିକ ତଥ୍ୟ ହାସଲ ପାଇଁ ଅଭିଯୁକ୍ତଙ୍କୁ ରିମାଣ୍ଡରେ ଅଣାଯିବ ବୋଲି ପୋଲିସ କହିଛି। ମହମ୍ମଦ ଅଫଜଲ ଅନ୍ସାରୀ ଦେଓଘର ପୋଲିସର ମୋଷ୍ଟ ୱାଣ୍ଟେଡ଼ ଥିଲେ। ତାଙ୍କ ବିରୋଧରେ ଅନେକ ମାମଲା ରହିଛି। ସାଇବର ଥାନା ଅତିରିକ୍ତ ଦାୟିତ୍ୱରେ ଥିବା ଇନ୍ସପେକ୍ଟର ପ୍ରଶାନ୍ତ ଭୂପତିଙ୍କ ସୂଚନା ଅନୁସାରେ ବୈଦ୍ୟନାଥପୁର ଥାନା ଅନ୍ତର୍ଗତ ଲାଞ୍ଜିପଲ୍ଲୀ ଉମାନଗର ୩ୟ ଲାଇନର ଅଜିତ କୁମାର ମିଶ୍ର(୩୯)ଙ୍କ ଠାରୁ ପ୍ରାୟ ୯୫ହଜାର ଟଙ୍କା ସାଇବର ଅପରାଧିମାନେ ଠକି ନେଇଥିଲେ। ଅଜିତ ଗତ ଅଗଷ୍ଟ ମାସରେ ଏକ କୋରିୟର କମ୍ପାନୀର କଷ୍ଟମର କେୟାର ନମ୍ବର ଅନଲାଇନରେ ସର୍ଚ୍ଚ କରୁଥିଲେ। ତାଙ୍କ ବ୍ୟାଙ୍କର ଡେବିଟ୍ କାର୍ଡ ପହଞ୍ଚିବାରେ ବିଳମ୍ବ ହେବାରୁ ସେ ଗୁଗୁଲ ଇଞ୍ଜିନ୍ ସର୍ଚ୍ଚ କରିଥିଲେ। ଏଥିରୁ ନମ୍ବର ପାଇ ଯୋଗାଯୋଗ କରିଥିଲେ। ଯେଉଁ ବ୍ୟକ୍ତି ଜଣକ ତାଙ୍କ ସହ କଥା ହୋଇଥିଲେ ସେ ମୋବାଇଲରେ କେତେକ ନିର୍ଦ୍ଦେଶ ଦେଇଥିଲେ। ଏହି ନିର୍ଦ୍ଦେଶ ପାଳନ କଲେ ତାଙ୍କ ସମସ୍ୟା ସମାଧାନ ହୋଇଯିବ ଓ ଘରକୁ ଡେବିଟ କାର୍ଡ ଆସି ପହଞ୍ଚିଯିବ ବୋଲି କହିଥିଲେ। ତାଙ୍କ ନିର୍ଦ୍ଦେଶ ମୁତାବକ ଅଜିତ ବ୍ୟାଙ୍କ ଆକାଉଣ୍ଟ ଅପଡେଟ କରିଥିଲେ। ଫଳରେ ତାଙ୍କ ଆକାଉଣ୍ଟରୁ ପର୍ଯ୍ୟାୟ କ୍ରମେ ପ୍ରାୟ ୯୫ ହଜାର ଟଙ୍କା କଟି ଯାଇଥିଲା। ଏହାପରେ ସେ ଗତ ଅଗଷ୍ଟ ୧୬ରେ ବ୍ରହ୍ମପୁର ସାଇବର ଥାନାର ଦ୍ୱାରସ୍ଥ ହୋଇଥିଲେ। ସାଇବର ଥାନା ପୋଲିସ ୨୧/୨୩ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ଠକ ଜଣଙ୍କ କଲ କରିଥିବା ମୋବାଇଲକୁ ଟ୍ରାକିଂ କରି ସାଇବର ଥାନା ପୋଲିସ ଜାଣିବାକୁ ପାଇଥିଲା ଯେ, ଏହି ଠକ ଜଣକ ଝାରଖଣ୍ଡରୁ ନିଜର ନେଟ୍ୱାର୍କ ଅପରେଟ୍ କରୁଛି। ତେଣୁ ବ୍ରହ୍ମପୁର ଏସ୍ପି ସର୍ବଣା ବିବେକ ଏମ୍ଙ୍କ ନିର୍ଦ୍ଦେଶରେ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଥିଲା। ଏକ ଜଣିଆ ଟିମ୍ ଝାରଖଣ୍ଡ ଯାଇ ଠକଙ୍କ ଗତିବିଧି ଅନୁଧ୍ୟାନ କରିଥିଲା। ସ୍ଥାନୀୟ ପୋଲିସ ସହାୟତାରେ ଗତ ୧୯ ତାରିଖ ରାତିରେ ମହମ୍ମଦ ଅଫଜଲ ଅନ୍ସାରୀଙ୍କୁ ସେଠାରୁ କାବୁ କରିବାରେ ସକ୍ଷମ ହୋଇଥିଲେ ବୋଲି ପ୍ରଶାନ୍ତ ଭୂପତି ସୂଚନା ଦେଇଛନ୍ତି।
