କାବୁଲ,୨୭।୧୦: ଆଫଗାନିସ୍ତାନ ଏବେ ଖାଦ୍ୟ ସଙ୍କଟର ସମ୍ମୁଖୀନ ହୋଇଛି। ଲୋକେ ଖାଦ୍ୟ କିଣିବା ପାଇଁ ନିଜର ସମ୍ପତ୍ତି ଏବଂ ପଶୁ ବିକ୍ରୟ କରୁଥିଲେ। ମାତ୍ର ଏବେ ସେମାନଙ୍କୁ ଭୋକ ବିକଳରେ ପିଲାମାନଙ୍କୁ ବିକ୍ରୟ କରିବାକୁ ବାଧ୍ୟ ହେଉଛନ୍ତି। ଅନ୍ତର୍ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ବହୁ ମାତାପିତା ନିଜ ନିଜର ସନ୍ତାନଙ୍କୁ ବିକ୍ରି କରୁଛନ୍ତି। ଇତିମଧ୍ୟରେ ଜାତିସଂଘ ପକ୍ଷରୁ ଆଫଗାନିସ୍ତାନରେ ଖାଦ୍ୟ ସଙ୍କଟ ଚେତବାଦୀ ଜାରି କରାଯାଇଛି।
ସମ୍ପ୍ରତି ଏଠାରେ ଲୋକେ କନ୍ୟାରତ୍ନ ବିକ୍ରି କରିବା ଆରମ୍ଭ କରିଥିବା ରିପୋର୍ଟ ନେଇ ଅନ୍ତର୍ଜାତୀୟସ୍ତରରେ ଚିନ୍ତା ପ୍ରକଟ କରାଯାଇଛି। ଦେଶର ପ୍ରାୟ ୨୫ ନିୟୁତ ଲୋକ ଆସନ୍ତା ନଭେମ୍ବରରୁ ଭୋକରେ ରହିବେ ବୋଲି ଜାତିସଂଘ କହିଛି।
ଭୋକରେ ପୀଡିତ ଲୋକମାନେ ବିବାହ ପାଇଁ ଆଠରୁ ଦଶ ବର୍ଷ ବୟସ୍କା କନ୍ୟାରତ୍ନଙ୍କୁ ବିକ୍ରି କରିବା ସାଧାରଣ ଘଟଣାରେ ପରିଣତ ହୋଇଛି। କନ୍ୟାରତ୍ନଙ୍କ ବିକ୍ରି ଯୋଗୂ ଦେଶରେ ଏବେ ବାଲ୍ୟ ବିବାହ ବୃଦ୍ଧି ପାଇବାର ଆଶଙ୍କା ସୃଷ୍ଟି ହୋଇଛି। ଦେଶରେ ମରୁଡ଼ି ସମୟରେ ବାଲ୍ୟ ବିବାହ ସଂଖ୍ୟା ବଢ଼ିଥାଏ ବୋଲି ରିପୋର୍ଟରେ ଉଲ୍ଲେଖ କରାଯାଇଛି। କିନ୍ତୁ ଏବେ ଖାଦ୍ୟ ସଙ୍କଟ ଯୋଗୁ ଏଭଳି ସ୍ଥିତି ସୃଷ୍ଟି ହୋଇଥିବା ଏଥିରେ ଦର୍ଶାଯାଇଛି।
ବଦଘିସ ପ୍ରଦେଶର ତାଲିବାନର ମଧ୍ୟବର୍ତ୍ତୀକାଳୀନ ରାଜ୍ୟପାଳ ମୌଲବି ଅବଦୁଲ ସତାର ଏକ ବିବୃତ୍ତିରେ କହିଛନ୍ତି ଯେ ଆର୍ଥିକ ସମସ୍ୟା ଯୋଗୁ ବାଲ୍ୟ ବିବାହ ଏବେ ବଢ଼ି ଚାଲିଛି। ଏଥି ସହିତ ମରୁଡ଼ି ପ୍ରଭାବିତ ଅଞ୍ଚଳରେ ବାଲ୍ୟ ବିବାହ ବୃଦ୍ଧି ହେବାର ଖବର ମିଳିଛି। ଦେଶର ତୃତୀୟ ବୃହତ୍ତମ ସହର ହେରାତ ଉପକଣ୍ଠ ଅଞ୍ଚଳରେ ମଧ୍ୟ ବାଲ୍ୟ ବିବାହ ବଢୁଥିବା ଗଣମାଧ୍ୟମ ରିପୋର୍ଟରେ ପ୍ରକାଶ ପାଇଛି।
ଗତ ୨୦ ବର୍ଷର ଗୃହଯୁଦ୍ଧରୁ ମୁକ୍ତି ପାଇବାକୁ ସଂଘର୍ଷ କରୁଥିବା ଲୋକଙ୍କ ପାଇଁ ମରୁଡ଼ି ଏବେ ନୂଆ ସଙ୍କଟ ସୃଷ୍ଟି କରିଛି।
ଚଳିତ ଶୀତରେ ଲକ୍ଷ ଲକ୍ଷ ଆଫଗାନୀ ଅନାହାର ଯୋଗୁ ଦେଶାନ୍ତର ହେବାକୁ ବାଧ୍ୟ ହେବେ ବୋଲି ଜାତିସଂଘ ପକ୍ଷରୁ କୁହାଯାଇଛି। ୟେମେନ, ସିରିଆ ଏବଂ କଙ୍ଗୋର ଖାଦ୍ୟ ଅଭାବ ସ୍ଥିତିଠାରୁ ଆଫଗାନିସ୍ତାନର ସଙ୍କଟ ଅଧିକ ଗୁରୁତର ରହିଛି ବୋଲି ଜାତିସଂଘ କହିଛି।
