ମୁମ୍ବାଇ,୧୯।୫: ବକ୍ସିଂ ଜଗତ ଗୁରୁବାର ଆଉ ଜଣେ ଷ୍ଟାରଙ୍କୁ ହରାଇଛି। କ୍ୟାରିୟରରେ ଅପରାଜିତ ଥିବା ଜର୍ମାନ ଚାମ୍ପିୟନ ମୁସା ୟାମାକ ହୃଦ୍ଘାତରେ ପ୍ରାଣ ହରାଇଛନ୍ତି। ମ୍ୟୁନିକ୍ଠାରେ ଶନିବାର ଉଗାଣ୍ଡାର ହାମଜା ଓ୍ବାଣ୍ଡେରାଙ୍କ ବିପକ୍ଷ ମ୍ୟାଚ୍ ବେଳେ ୩୮ ବାର୍ଷୀୟ ବକ୍ସର ରିଙ୍ଗ୍ରେ ହୃଦ୍ଘାତର ସମ୍ମୁଖୀନ ହୋଇଥିଲେ। ଦର୍ଶକଙ୍କ ପାଇଁ ମ୍ୟାଚ୍ର ସିଧାପ୍ରସାରଣ କରାଯାଇଥିଲା। ଏହି ଫାଇଟର ତୃତୀୟ ରାଉଣ୍ଡ ମ୍ୟାଚ୍ ଆରମ୍ଭ ହେବାର କିଛି କ୍ଷଣ ପୂର୍ବରୁ ମୁସା ହଠାତ୍ ଚେତାଶୂନ୍ୟ ହୋଇ ରିଙ୍ଗରେ ପଡ଼ିଯାଇଥିଲେ। ଦ୍ୱିତୀୟ ରାଉଣ୍ଡରେ ପ୍ରତିପକ୍ଷ ବକ୍ସର ଓ୍ବାଣ୍ଡେରାଙ୍କ ଏକ ଶକ୍ତିଶାଳୀ ମୁଥା ଯୋଗୁ ମୁସା ତଳେ ପଡ଼ି ଯାଇଥିଲେ। ଏହାପରେ ସେ ତୃତୀୟ ରାଉଣ୍ଡରେ ଓ୍ବାଣ୍ଡେରାଙ୍କ ମୁକାବିଲା କରିବା ଲାଗ ରିଙ୍ଗ ମଧ୍ୟକୁ ଆସିଥିଲେ। ହେଲେ ଫାଇଟ୍ ଆରମ୍ଭ ହେବାର କ୍ଷଣିକ ପୂର୍ବରୁ ସେ ତଳେ ପଡ଼ିଯାଇଥିଲେ। ରିଙ୍ଗରେ ତାଙ୍କ ଚେତା ଫେରାଇ ଆଣିବାକୁ ଉଦ୍ୟମ କରାଯିବା ସହ ତାଙ୍କୁ ତୁରନ୍ତ ସ୍ଥାନୀୟ ହସ୍ପିଟାଲ ନିଆଯାଇଥିଲା, ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ତାଙ୍କ ବିୟୋଗରେ ଖେଳ ଜଗତରେ ଶୋକର ଛାୟା ଖେଳିଯାଇଛି। ଅନ୍ୟପଟେ ମୁସାଙ୍କ ମୃତ୍ୟୁରେ ତୁର୍କୀ ଅଧିକାରୀ ହାସନ ତୁରାନ ଶୋକପ୍ରକାଶ କରିବା ସହ ପରିବାରଲୋକଙ୍କୁ ସମବେଦନା ଜଣାଇଛନ୍ତି। ସେ କହିଛନ୍ତି, ଆମେ ଆମ ଦେଶର ମୁସା ଆସକାନ ୟାମାକଙ୍କୁ ହରାଇଛୁ। ୟୁରୋପିଆନ ଏବଂ ଏସିଆନ୍ ଚାମ୍ପିୟନ ଯୁବ ବୟସରେ ହୃଦ୍ଘାତରେ ପ୍ରାଣ ହରାଇବା ସମସ୍ତଙ୍କୁ ମର୍ମାହତ କରିଛି ବୋଲି ତୁର୍କୀ ଅଧିକାରୀ ହାସନ ତୁରାନ କହିଛନ୍ତି। ଜର୍ମାନ ବକ୍ସର କ୍ୟାରିୟରରେ ୮ ମ୍ୟାଚ୍ ଖେଳିଥିଲେ ଏବଂ ସମସ୍ତ ମ୍ୟାଚ୍ରେ ପ୍ରତିଦ୍ୱନ୍ଦ୍ୱୀଙ୍କୁ ନକ୍ଆଉଟ୍ କରି ମ୍ୟାଚ୍ ଜିତିଥିଲେ। ତୁର୍କୀରେ ଜନ୍ମିତ ୟାମାକ ୨୦୧୭ରେ ପେଶାଦାର ବକ୍ସିଂରେ ଯୋଗଦେଇଥିଲେ। କିନ୍ତୁ ୨୦୨୧ରେ ଡବ୍ଲୁବିଫେଡ୍ ଇଣ୍ଟରନ୍ୟାଶନାଲ ଟାଇଟଲ ଜିତିବା ପରେ ତାଙ୍କୁ ଲୋକପ୍ରିୟତା ମିଳିଥିଲା।
