ଚେନ୍ନାଇ, ୨ା୬: ଦିଲ୍ଲୀ ସରକାରଙ୍କ ପ୍ରଶାସନିକ ସେବାକୁ ନିୟନ୍ତ୍ରଣ କରିବା ପାଇଁ କେନ୍ଦ୍ର ସରକାର ଆଣିଥିବା ଅଧ୍ୟାଦେଶକୁ ରାଜ୍ୟ ସଭାରେ ଗୃହୀତ କରାଇ ନ ଦେବା ପାଇଁ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଅଭିଯାନ ଚଳାଇଛନ୍ତି। ଏହି କ୍ରମରେ ସେ ଗୁରୁବାର ତାମିଲନାଡ଼ୁ ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ୍ଙ୍କୁ ଭେଟି ତାଙ୍କ ସମର୍ଥନ ଲୋଡ଼ିଥିଲେ। ଡିଏମ୍କେ ରାଜ୍ୟ ସଭାରେ ଏଏପିକୁ ସମର୍ଥନ କରିବ ବୋଲି ଷ୍ଟାଲିନ୍ ପ୍ରତିଶ୍ରୁତି ଦେବା ପରେ କେଜ୍ରିଓ୍ବାଲ ତାଙ୍କୁ କୃତଜ୍ଞତା ଜଣାଇଛନ୍ତି।
ଯଦି ନିର୍ବାଚିତ ସରକାରଙ୍କର ପ୍ରଶାସନ ଉପରେ ନିୟନ୍ତ୍ରଣ ନ ରହିବ, ତେବେ ନିର୍ବାଚିତ ସରକାରଙ୍କର କିଛି ମାନେ ନାହିଁ। ପ୍ରଥମ ଥର ପାଇଁ କେନ୍ଦ୍ର ସରକାର ସୁପ୍ରିମକୋର୍ଟଙ୍କ ରାୟକୁ ଅକାମୀ କରିଦେଇଛନ୍ତି। ଏହା ଅସାମ୍ବିଧାନିକ ଓ ଅଗଣତାନ୍ତ୍ରିକ ବୋଲି ଷ୍ଟାଲିନ୍ଙ୍କୁ ଭେଟିବା ପରେ କେଜ୍ରିଓ୍ବାଲ କହିଛନ୍ତି। କେଜ୍ରିଓ୍ବାଲଙ୍କ ସହ ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ ମଧ୍ୟ ଷ୍ଟାଲିନ୍ଙ୍କୁ ଭେଟିଥିଲେ। କେନ୍ଦ୍ର ଆଣିଥିବା ଅଧ୍ୟାଦେଶକୁ ପାର୍ଲାମେଣ୍ଟର ଆଗାମୀ ମୌସୁମୀ ଅଧିବେଶନରେ ଗୃହୀତ କରାଇବାକୁ ଉଦ୍ୟମ କରିବ। ରାଜ୍ୟ ସଭାରେ ଏନ୍ଡିଏର ୯୩ ସଦସ୍ୟ ରହିଛନ୍ତି। ଯଦି ଅଣଭାଜପା ଦଳଗୁଡ଼ିକ ଏକାଠି ହୁଅନ୍ତି, ତେବେ ସରକାରଙ୍କୁ ପରାସ୍ତ କରିପାରିବେ ବୋଲି କେଜ୍ରିଓ୍ବାଲ କହିଛନ୍ତି। କେନ୍ଦ୍ର ଅଧ୍ୟାଦେଶ ବିରୋଧରେ ସବୁ ବିରୋଧୀ ଦଳଙ୍କୁ ଏକାଠି କରିବାକୁ ଦିଲ୍ଲୀ ମୁଖ୍ୟମନ୍ତ୍ରୀ ବିଭିନ୍ନ ରାଜ୍ୟକୁ ଗସ୍ତ କରୁଛନ୍ତି।
