ଚେନ୍ନାଇ,୧୧।୨ : ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ଶନିବାର କେନ୍ଦ୍ରକୁ ଚିଠି ଲେଖିଛନ୍ତି। କେନ୍ଦ୍ର ମନ୍ତ୍ରୀ ନୀତିନ ଗଡକରୀଙ୍କ ଉତ୍ତର ସଂସଦରେ ଏକ ଭାବନା ସୃଷ୍ଟି କରିଛି ଯେ ତାମିଲନାଡୁ ସରକାର ଜାତୀୟ ରାଜପଥ ପ୍ରାଧିକରଣ (ଏନଏଚଏଆଇ) ସହିତ ସହଯୋଗ କରୁନାହାଁନ୍ତି। ଷ୍ଟାଲିନ କହିଛନ୍ତି ଯେ ଏହି ଧାରଣା ସତ୍ୟ ନୁହେଁ।
କେନ୍ଦ୍ର ସଡକ ପରିବହନ ଏବଂ ରାଜପଥ ମନ୍ତ୍ରୀ ଗଡକରୀଙ୍କୁ ଲେଖିଥିବା ଚିଠିରେ ଷ୍ଟାଲିନ ଚେନ୍ନାଇରୁ ରାନିପେଟ ଏନଏଚ-୪ ରାସ୍ତାର ସ୍ଥିତିରେ ଉନ୍ନତି ଆଣିବାକୁ ଧ୍ୟାନ ଦେବାକୁ କହିଛନ୍ତି।
ସେ କହିଛନ୍ତି ଯେ ଚେନ୍ନାଇ ସହର ଏବଂ ଏହାର ବନ୍ଦରଗୁଡିକ କାଞ୍ଚିପୁରମ, ଭେଲୋର, ରାନିପେଟ, ହୋସୁର ଏବଂ କୃଷ୍ଣଗିରିରେ ଥିବା ଶିଳ୍ପ କ୍ଲଷ୍ଟରକୁ ଗୁରୁତ୍ୱପୂର୍ଣ୍ଣ ସଂଯୋଗ ପ୍ରଦାନ କରିଥାଏ। ରାସ୍ତାର ଅବସ୍ଥା ଏତେ ଖରାପ ଯେ ମୋତେ ଟ୍ରେନ ଯୋଗେ କିଛି ଜିଲା ଗସ୍ତ ପାଇଁ ଯୋଜନା କରିବାକୁ ପଡୁଛି।
ତାମିଲନାଡୁ ସରକାର ବିଭିନ୍ନ ପ୍ରକଳ୍ପ ସମ୍ପର୍କରେ ନେଇଥିବା ପଦକ୍ଷେପ ବିଷୟରେ ବିସ୍ତୃତ ବିବରଣୀ ଦେଇ ଷ୍ଟାଲିନ ଉଲ୍ଲେଖ କରିଛନ୍ତି ସରକାରଙ୍କ ତରଫରୁ ସମସ୍ତ ଆନ୍ତରିକ ଉଦ୍ୟମ କରାଯାଇଛି। ଏହା ଦୁର୍ଭାଗ୍ୟଜନକ ଯେ ସଂସଦରେ ଆପଣଙ୍କ ଉତ୍ତରରେ କୁହାଯାଇଛି ରାଜ୍ୟ ସରକାର ଏନଏଚଏଆଇ ସହିତ ସହଯୋଗ କରୁନାହାଁନ୍ତି।
