କାମାକ୍ଷାନଗର,୮।୧୧(ଡି.ଏନ.ଏ.): ଢେଙ୍କାନାଳ ଜିଲାର ଆଦିବାସୀ ଅଧ୍ୟୁଷିତ କଙ୍କଡାହାଡ଼ ବ୍ଲକ କାର୍ଯ୍ୟାଳୟକୁ ଠିକ୍ ସମୟରେ ଅଧିକାରୀ, କର୍ମଚାରୀମାନେ ଆସୁ ନ ଥିବା ଅଭିଯୋଗ ହେଉଛି। ଅଧିକାରୀ ଓ କର୍ମଚାରୀମାନଙ୍କ ଏପରି ମନମୁଖୀ କାର୍ଯ୍ୟ ପାଇଁ ଦୂରଦୂରାନ୍ତରୁ ବିଭିନ୍ନ ସମସ୍ୟା ନେଇ ଆସୁଥିବା ଲୋକେ ନାହିଁ ସମସ୍ୟାର ସମ୍ମୁଖୀନ ହେଉଛନ୍ତି। ବ୍ଲକ କାର୍ଯ୍ୟାଳୟ ପୂର୍ବାହ୍ନ ୧୦ଟା ସୁଦ୍ଧା ଖୋଲିବା ନିୟମ ଥିଲାବେଳେ ସୋମବାର ପୂର୍ବାହ୍ନ ପ୍ରାୟ ୧୧.୩୦ରେ କାର୍ଯ୍ୟାଳୟରେ ବହୁ ଅଧିକାରୀ ଓ କର୍ମଚାରୀଙ୍କ ଚୌକି ଖାଲି ପଡିଥିବା ଦେଖିବାକୁ ମିଳିଥିଲା। ଏପରିକି ବିଡିଓଙ୍କ କାର୍ଯ୍ୟାଳୟରେ ଚୌକି ମଧ୍ୟ ଫାଙ୍କା ପଡ଼ିଥିଲା। ଏଥିସହ ବ୍ଲକର ମୋ ସରକାର କକ୍ଷ, ସହକାରୀ ନିର୍ବାହୀ ଯନ୍ତ୍ରୀ କାର୍ଯ୍ୟାଳୟ, ଗ୍ରାମୀଣ ଆବାସ ଯୋଜନା ବିଭାଗ ବିଭିନ୍ନ ବିଭାଗରେ ଅଧିକାରୀ ଓ କର୍ମଚାରୀଙ୍କ ଚୌକିରେ କେହି ନ ଥିବା ଚର୍ଚ୍ଚାର ବିଷୟ ହୋଇଛି।
କଙ୍କଡାହାଡ଼ ବ୍ଲକ ୨୧ ପଞ୍ଚାୟତକୁ ନେଇ ଗଠିତ। ଏହାର ସଦର ମହକୁମା କଙ୍କଡାହାଡ଼ଠାରୁ ୫୦ କି.ମି. ଦୂରରେ ଥିବା ଘାଗରାମୁଣ୍ଡା ପଞ୍ଚାୟତ ପଡ଼ୋଶୀ ପାଲଲହଡା ବ୍ଲକ ସୀମାନ୍ତକୁ ଲାଗିକରି ଥିବାବେଳେ ପରଜଙ୍ଗ ବ୍ଲକ ସୀମାନ୍ତକୁ ଲାଗିଛି କଟୁରିଆ ପଞ୍ଚାୟତ। ସେହିପରି ୩୫ କି.ମି. ଦୂରରେ ଥିବା ମରୁଆବିଲ ପଞ୍ଚାୟତ ଯାଜପୁର ଜିଲା ସୁକିନ୍ଦା ବ୍ଲକ ସୀମାନ୍ତକୁ ଲାଗି ରହିିଛି। ଏତେ ଦୂରରୁ କଙ୍କଡ଼ାହାଡ଼ ବ୍ଲକ କାର୍ଯ୍ୟାଳୟକୁ ସାଧାରଣ ଲୋକମାନେ ଭତ୍ତା, ରାଶନକାର୍ଡ, ପ୍ରଧାନମନ୍ତ୍ରୀ ଆବାସ ଭଳି ଅନେକ ସମସ୍ୟା ନେଇ ଆସୁଥିବାବେଳେ ଅଧିକାରୀ ଓ କର୍ମଚାରୀଙ୍କୁ ନ ପାଇ ନିରାଶ ହେଇ ଫେରୁଥିବା ଅଭିଯୋଗ ହେଉଛି। ଏ ନେଇ ବିଡିଓ ଦୁର୍ଗାଚରଣ ମୁର୍ମୁ କହିଛନ୍ତି, ଏକୁଲ ସେକୁଲ ଯାଉଛି। ପ୍ରତିଦିନ ଅପରାହ୍ନ ୩ରେ କାର୍ଯ୍ୟାଳୟକୁ ଯାଏ। ସକାଳ ସମୟରେ ଫିଲ୍ଡରେ ରୁହେ। ବ୍ଲକ ଅଧ୍ୟକ୍ଷା ଚାରୁଲତା ମିଶ୍ର ଘଟଣାକୁ ସ୍ବୀକାର କରିବା ସହ ଅବହେଳା କରୁଥିବା କର୍ମଚାରୀଙ୍କୁ ତାଗିତ କରାଯିବ। ଦରକାର ପଡ଼ିଲେ ଜିଲାପାଳଙ୍କୁ ଜଣାଇବି ବୋଲି କହିଛନ୍ତି। ଉପଜିଲାପାଳ ଜ୍ୟୋତିଶଙ୍କର ସାହୁ କହିଛନ୍ତି, ବିଡିଓଙ୍କୁ ଏହାର ତଦନ୍ତ ପାଇଁ ନିର୍ଦ୍ଦେଶ ଦିଆଯିବ।
