କଲମ୍ବୋ,୧୨।୪: ଶ୍ରୀଲଙ୍କାରେ ଆର୍ଥିକ ସଙ୍କଟ ବେଳକୁ ବେଳ ଖରାପ୍ ହେବାରେ ଲାଗିଛି। ବର୍ତ୍ତମାନ ସଙ୍କଟରେ ଫସିରହିଥିବା ଶ୍ରୀଲଙ୍କା ମଙ୍ଗଳବାର ନିଜକୁ ଦେବାଳିଆ ଘୋଷଣା କରିଛି। ଅନ୍ୟ ଦେଶମାନଙ୍କର ୫୧୦୦କୋଟି ଡଲାରର ଋଣ କିଛି ସମୟ ପାଇଁ ପରିଶୋଧ କରିପାରିବ ନାହିଁ ବୋଲି ଶ୍ରୀଲଙ୍କା ସରକାର କହିଛନ୍ତି। କାରଣ ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍)ରୁ ବେଲ୍ଆଉଟ ପ୍ୟାକେଜ ମିଳିପାରିନାହିଁ। ଶ୍ରୀଲଙ୍କାର ଟ୍ରେଜେରୀ ସଚିବ ମହିନ୍ଦ୍ରା ସିରିଓ୍ବାର୍ଡେନେ ମଙ୍ଗଳବାର ଏନେଇ ସୂଚନା ଦେଇଛନ୍ତି। ଅନ୍ୟ ଦେଶର ସରକାର ଏବଂ ଅନ୍ୟ ଋଣଦାତାମାନଙ୍କୁ ଶ୍ରୀଲଙ୍କାର ଅର୍ଥ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ମଙ୍ଗଳବାର ପରେ ଯେକୌଣସି ସୁଧ ବକେୟା ରହିଛି ଏହାର ପରିଶୋଧ ପାଇଁ ଅପେକ୍ଷା କରିବାକୁ ପଡିବ। କିମ୍ବା ଶ୍ରୀଲଙ୍କା ଟଙ୍କାରେ ଦେୟ ଗ୍ରହଣ କରିବାକୁ ପଡିବ ବୋଲି ସରକାର କହିଛନ୍ତି। ଅନ୍ୟପଟେ ଶ୍ରୀଲଙ୍କା ସରକାର ଆଇଏମ୍ଏଫ୍ ସହିତ ବେଲ୍ଆଉଟ୍ ପ୍ୟାକେଜ ସମ୍ପର୍କରେ ଆଲୋଚନା ଜାରି ରଖିଛନ୍ତି। ଅନ୍ୟ ଦେଶରୁ ମଧ୍ୟ ଦ୍ୱିପାକ୍ଷିକ ସହଯୋଗ ପାଇଁ ସରକାର ଆଶା ପ୍ରକଟ କରିଛନ୍ତି। ଶ୍ରୀଲଙ୍କାର ସେଣ୍ଟ୍ରାଲ ବ୍ୟାଙ୍କର ନୂତନ ଗଭର୍ଣ୍ଣର ନନ୍ଦଲାଲ ଭିରସିଂହେ କହିଛନ୍ତି, ଅତ୍ୟାବଶ୍ୟକ ସାମଗ୍ରୀ ଆମଦାନୀ ପାଇଁ ପାଖରେ ଥିବା ବୈଦେଶିକ ମୁଦ୍ରାର ବ୍ୟବହାର କରାଯିବ। ସୂଚନା ମୁତାବକ, ଶ୍ରୀଲଙ୍କା ଉପରେ ଅନ୍ୟ ଦେଶଗୁଡ଼ିକର ମୋଟ ଋଣ ହେଉଛି ୫,୧୦୦କୋଟି ଡଲାର। ଗତ ବର୍ଷ ଦେଶରେ ମୋଟ ଋଣ ୩,୫୦୦ କୋଟି ଡଲାର ଥିବା ବେଳେ ଗୋଟିଏ ବର୍ଷ ମଧ୍ୟରେ ଏହା ବୃଦ୍ଧି ପାଇ ଦେଶର ଋଣ ୧,୬୦୦ କୋଟି ଡଲାରରେ ପହଞ୍ଚିଛି।
