ଆର୍ସିବିକୁ ପରାଜୟରୁ ବଞ୍ଚାଇ ପାରିଲେ ନାହିଁ ଡି’ଭିଲୟର୍ସ
ଆବୁଧାବି,୬।୧୦: ଶେଷ ବଲ ପର୍ଯ୍ୟନ୍ତ ଚାଲିଲା ମ୍ୟାଚ୍। ତଥାପି ଜିତିପାରିଲା ନାହିଁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି)। ପ୍ଲେ-ଅପ୍ ପାଇଁ ଯୋଗ୍ୟତା ଅର୍ଜନ କରିସାରିଥିବା ଆରସିବିକୁ ୪ ରନ୍ରେ ହରାଇ ଦେଇଛି ସନରାଇଜର୍ସ ହାଇଦ୍ରାବାଦ୍। ୧୪୨ ରନ୍ର ସାଧାରଣ ବିଜୟ ଲକ୍ଷ୍ୟ ନେଇ ଓହ୍ଲାଇଥିବା ବିରାଟ କୋହଲିଙ୍କ ଦଳ ବହୁ ସମୟ ଧରି ମ୍ୟାଚ୍ରେ ଆଗୁଆ ଥିଲେ। ଏପରି କି ଶେଷ ୩ ବଲରେ ଦଳକୁ ୧୨ ରନ୍ ଦରକାର ଥିବା ବେଳେ ଷ୍ଟ୍ରାଇକ୍ରେ ଥିଲେ ଏବି ଡି’ଭିଲୟର୍ସ। ଏହାସତ୍ତ୍ୱେ ବାଙ୍ଗାଲୋରକୁ ପରାଜୟ ସମ୍ମୁଖୀନ ହେବାକୁ ପଡ଼ିଛି।
ପ୍ରଥମେ ବ୍ୟାଟିଂ କରିଥିବା ହାଇଦ୍ରାବାଦ୍ ୨୦ ଓଭରରେ ୭ ଉଇକେଟ ହରାଇ ୧୪୧ ରନ୍ କରିଥିଲା। ଦଳ ପାଇଁ ଜାସୋନ ରୟ ୪୪ (୫ ଚୌକା) ଓ ଅଧିନାୟକ କେନ ଓ୍ବିଲିୟମସନ ୩୧ (୪ ଚୌକା) ରନ୍ କରିଥିଲେ। ଆରସିବି ପାଇଁ ପୁଣି ଥରେ ସଫଳ ବୋଲର ସାଜିଥିଲେ ହର୍ଶଲ ପଟେଲ ( ୩ ଉଇକେଟ)। ୧୪୨ ରନ୍ର ବିଜୟ ଲକ୍ଷ୍ୟ ନେଇ ଓହ୍ଲାଇଥିବା ଆର୍ସିବି ପ୍ରାରମ୍ଭିକ ଓଭରରେ ୩ ଉଇକେଟ ହରାଇ ଦେଇଥିଲା। କିନ୍ତୁ ଗ୍ଲେନ ମ୍ୟାକ୍ସଓ୍ବେଲଙ୍କ ୪୦ (୩ ଚୌକା ଓ ୨ ଛକା) ରନ୍ର ଇନିଂସ ବାଙ୍ଗାଲୋର ପାଇଁ ସୃଷ୍ଟି କରିଥିଲା ବିଜୟ ସମ୍ଭାବନା। ମାତ୍ର ସେ ରନ୍ ଆଉଟ୍ ହେବା ପରେ ବଦଳି ଯାଇଥିଲା ମ୍ୟାଚ୍ର ସ୍ଥିତି। ଶେଷ ପର୍ଯ୍ୟନ୍ତ ଡି’ଭିଲୟର୍ସ (୧୯ ରନ୍, ଗୋଟିଏ ଲେଖାଏ ଚୌକା ଓ ଛକା) ଛିଡ଼ା ହୋଇଥିଲେ। ତଥାପି ବିଜୟ ଲକ୍ଷ୍ୟଠାରୁ ୫ ରନ୍ ଦୂରରେ ରହିଯାଇଥିଲା ଆର୍ସିବି।
