ପୁରୀ ଅଫିସ,୧୪ ।୧୧: ପୁରୀକୁ ବିଶ୍ୱସ୍ତରୀୟ ଐତିହ୍ୟ ସହର କରିବା ପାଇଁ ରାଜ୍ୟ ସରକାର ଅଣ୍ଟା ଭିଡ଼ିଛନ୍ତି। ଏଥିଲାଗି କେତେକ ପ୍ରକଳ୍ପ କାମ ଚାଲିଥିବାବେଳେ ଆଗକୁ ଆହୁରି ଏକାଧିକ ପ୍ରକଳ୍ପ କାମ ଆରମ୍ଭ ହେବ। ଏହି ପ୍ରକଳ୍ପ ମଧ୍ୟରୁ ଶ୍ରୀସେତୁ ଅନ୍ୟତମ। ଗୁରୁବାର ରାଜ୍ୟ କ୍ୟାବିନେଟରେ ଶ୍ରୀସେତୁ ସମେତ ୪ଟି ପ୍ରକଳ୍ପ ପାଇଁ ୪୬୧କୋଟି ୨୫ ଲକ୍ଷ ଟଙ୍କା ମଞ୍ଜୁର କରାଯାଇଛି। ଖୁବ୍ଶୀଘ୍ର ଶ୍ରୀସେତୁ କାମ ଆରମ୍ଭ କରାଯିବା ଲାଗି ଶୁକ୍ରବାର ପୁରୀ ସର୍କିଟ ହାଉସ୍ରେ ଏଥିପାଇଁ ଗଠିତ ଏକ୍ସପର୍ଟ କମିଟିର ବୈଠକ ଅନୁଷ୍ଠିତ ହୋଇଥିଲା। ଏଥିରେ ଏହି ପ୍ରକଳ୍ପ ଲାଗି ଜମି ଅଧିଗ୍ରହଣଠାରୁ ଆରମ୍ଭ କରି ଜନଶୁଣାଣିରେ ଲୋକେ ଦେଇଥିବା ମତାମତ ଉପରେ ଆଲୋଚନା କରାଯାଇଥିଲା। ଟିମ୍ରେ ଥିବା ୧୦ରୁ ଊର୍ଦ୍ଧ୍ୱ ଇଞ୍ଜିନିୟର ମଧ୍ୟ ବିଭିନ୍ନ ମତ ରଖିଥିଲେ। କମିଟି ଜିଲା ପ୍ରଶାସନ ମାଧ୍ୟମରେ ଶ୍ରୀସେତୁ ସଂକ୍ରାନ୍ତରେ ରାଜ୍ୟ ସରକାରଙ୍କୁ ରିପୋର୍ଟ ଦେବ। ରାଜ୍ୟ ସରକାରଙ୍କଠାରୁ ଅନୁମତି ମିଳିବା ପରେ କାମ ତ୍ୱରାନ୍ବିତ ହେବ ବୋଲି ସ୍ଥିର କରାଯାଇଛି। ବୈଠକରେ କମିଟି ଅଧ୍ୟକ୍ଷ ବିନ୍ଧେଶ୍ୱର ପାତ୍ର ଅଧ୍ୟକ୍ଷତା କରିଥିବାବେଳେ ଅତିରିକ୍ତ ଜିଲାପାଳ ବିନୟ କୁମାର ଦାଶ, ଉପଜିଲାପାଳ ଭବତାରଣ ସାହୁ, ଭୂଅର୍ଜନ ଅଧିକାରୀ ପ୍ରଶାନ୍ତ ଜେନାଙ୍କ ସମେତ ଏକ୍ସପର୍ଟ କମିଟି ସଦସ୍ୟ ଯୋଗଦେଇଥିଲେ।
