ନୂଆଦିଲ୍ଲୀ,୨୬।୪: କୌଣସି ଫର୍ମାଟ ହେଉ ନା କାହିଁକି ଭାରତ ପାକିସ୍ତାନ ମ୍ୟାଚ୍ କଥା ପଡ଼ିଲେ ପ୍ରଶଂସକଙ୍କ ଉତ୍କଣ୍ଠା ବଢ଼ିଯାଇଥାଏ। ହେଲେ ଦୁଇ ଦେଶ ଏବେ କେବଳ ଆଇସିସି ଟୁର୍ନାମେଣ୍ଟ ଖେଳୁଛନ୍ତି। ଏଣୁ ଯେବେ ବି ଉଭୟ ଟିମ୍ ମୁହାଁମୁହିଁ ହୁଅନ୍ତି ସମସ୍ତଙ୍କ ନଜର ମ୍ୟାଚ୍ ଉପରେ ଥାଏ। ୨୦୨୨ ଟି୨୦ ବିଶ୍ୱକପ୍ରେ ବିରାଟଙ୍କ ଇନିଂସ ହେଉ ଅଥବା ୨୦୧୧ ଦିନିକିଆ ବିଶ୍ୱକପ୍ରେ ସଚିନଙ୍କ ୮୫ ରନ୍ର ଇନିଂସ ଆଜି ବି ମନରେ ସତେଜ ଅଛି। ପ୍ରତି ଥର କେହି ନା କେହି ଷ୍ଟାର ପାଲଟିଛନ୍ତି। ଏବେ ଏହି ଭାରତ ପାକିସ୍ତାନ ମ୍ୟାଚ୍ ସହ ଜଡ଼ିତ ଏକ ଘଟଣାବଳୀକୁ ପୂର୍ବତନ ବ୍ୟାଟ୍ସମ୍ୟାନ ସୁରେଶ ରାଇନା ଜଣାଇଛନ୍ତି। କାରଣ ଉକ୍ତ ମ୍ୟାଚ୍ରେ ସଚିନ ଟିମ୍ ଇଣ୍ଡିଆର ଖେଳାଳିଙ୍କୁ ଲୋଭ ଦେଖାଇଥିଲେ।
୨୦୧୧ ବିଶ୍ୱକପ୍ର ସେମିଫାଇନାଲ ମୁକାବିଲା ଭାରତ-ପାକିସ୍ତାନ ମଧ୍ୟରେ ଖେଳାଯାଇଥିଲା। ଏହି ମୁକାବିଲା ଐତିହାସିକ ମୋହାଲି ଷ୍ଟାଡିୟମରେ ଖେଳାଯାଇଥିବା ବେଳେ ଉଭୟ ଦେଶର ପ୍ରଧାନମନ୍ତ୍ରୀ ଉପସ୍ଥିତ ଥିଲେ। ଏଥିଲାଗି ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିଲା। ଏହି ମ୍ୟାଚ୍ରେ ଖାଇବାରେ ବିଳମ୍ବ ହୋଇଯାଇଥିଲେ। ଏହାକୁ ନେଇ ଚିନ୍ତାରେ ପଡ଼ିଥିଲେ ଖେଳାଳି। ଏମିତିରେ ସଚିନ ତେନ୍ଦୁଲକରଙ୍କ କାନରେ କଥାଟି ପଡ଼ିଥିଲା। ସେ ଖେଳାଳିଙ୍କୁ କହିଥିଲେ କ’ଣ ଏଠାକୁ ଖାଇବାକୁ ଆସିଛ। ପାକିସ୍ତାନକୁ ହରାଅ। ଭୂରି ଭୋଜନ ମୁଁ ଦେବି। ନିକଟରେ ଏହା ରାଇନା ଏକ ସାକ୍ଷାତକାରରେ କହିଛନ୍ତି।
ଏହି ମୁକାବିଲାରେ ଭାରତ ପ୍ରଥମେ ବ୍ୟାଟିଂ କରି ୯ ଉଇକେଟ ହରାଇ ୨୬୦ ରନ୍ କରିଥିଲା। ଜବାବରେ ପାକିସ୍ତାନ ଟିମ୍ ୪୯.୫ ଓଭରରେ ୨୩୧ ରନ୍ରେ ଅଲଆଉଟ୍ ହୋଇଯାଇଥିଲା। ଉଭୟ ବ୍ୟାଟ୍ସମ୍ୟାନ ଏବଂ ବୋଲର ମ୍ୟାଚ୍ରେ ଭଲ ପ୍ରଦର୍ଶନ କରିଥିଲେ। ମ୍ୟାଚ୍ରେ ସଚିନ ପ୍ଲେୟାର ଅଫ୍ ଦ ମ୍ୟାଚ୍ ହୋଇଥିଲେ।
