କୋଲକାତା,୧୪ା୨: ଭେଟେରାନ ଲେଗ୍ ସ୍ପିନର ଆଦିଲ ରଶିଦ(୩/୩୬)ଙ୍କ ୩ ଉଇକେଟ ସଫଳତା ଏବଂ ମିଡଲ ଓଭରରେ ଟମ୍ ବାଣ୍ଟନଙ୍କ ଆକର୍ଷଣୀୟ ଅପରାଜିତ ଅର୍ଦ୍ଧଶତକ ସହାୟତାରେ ଇଂଲଣ୍ଡ ଚଳିତ ଟି୨୦ ବିଶ୍ୱକପ୍ ଗ୍ରୁପ୍ ‘ସି’ର ଏକ ମ୍ୟାଚରେ ସ୍କଟଲାଣ୍ଡକୁ ୫ଉଇକେଟରେ ପରାସ୍ତ କରିଛି।
ଶନିବାର ଖେଳାଯାଇଥିବା ଏହି ମ୍ୟାଚ୍ରେ ଟସ୍ ଜିତି ପ୍ରଥମେ ବୋଲିଂ ନେଇଥିବା ଇଂଲଣ୍ଡ ରଶିଦଙ୍କ ପ୍ରଭାବୀ ବୋଲିଂ ଜରିଆରେ ସ୍କଟଲାଣ୍ଡକୁ ୧୫୨ରନ ସ୍କୋରରେ ସୀମିତ କରିଦେଇଥିଲା। ପେସର ଜୋଫ୍ରା ଆର୍ଚର ଏବଂ ବାମହାତୀ ସ୍ପିନର ଲିଆମ ଡସନ ଦୁଇଟି ଲେଖାଏ ଉଇକେଟ ନେଇଥିଲେ।
ସ୍କଟଲାଣ୍ଡର ଟପ୍ ସ୍କୋରର ଅଧିନାୟକ ରିଚି ବେରିଙ୍ଗଟନ ୩୨ ବଲ୍ରେ ୪୯ ରନ ସଂଗ୍ରହ କରିଥିବା ବେଳେ ଓପନର ମାଇକେଲ ଜୋନ୍ସଙ୍କର ୩୩ ରନ ଅବଦାନ ଥିଲା। ବିଜୟ ଲକ୍ଷ୍ୟ ପିଛା କରିବା ବେଳେ ଇଂଲଣ୍ଡର ଆରମ୍ଭ ଉତ୍ସାହଜନକ ନ ଥିଲା। ଦଳର ଦୁଇ ଓପନର ଫିଲ୍ ସଲ୍ଟ ଓ ଜୋସ ବଟଲର ମାତ୍ର ଦୁଇ ଓଭର ଭିତରେ ଆଉଟ ହୋଇଯାଇଥିଲେ। କିନ୍ତୁ ଜାକବ ବେଥେଲ (୨୮ ବଲ୍ରୁ ୩୨) ଏବଂ ବାଣ୍ଟନ (୪୧ ବଲ୍ରୁ ୬୩ନଟଆଉଟ) ତୃତୀୟ ଉଇକେଟରେ ୬୬ରନ ଯୋଗ କରିବା ଦ୍ୱାରା ଇଂଲଣ୍ଡ ମ୍ୟାଚ୍କୁ ପ୍ରତ୍ୟାବର୍ତ୍ତନ କରିଥିଲା। ସାମ କୁରାନ ୨୦ ବଲ୍ରେ ୨୮ରନ କରିଥିବା ବେଳେ ଶେଷ ଭାଗରେ ଓ୍ବିଲ୍ ଜ୍ୟାକ୍ସ ୧୦ବଲ୍ରୁ ୧୬ ରନ କରି ଅପରାଜିତ ଥିଲେ। ଇଂଲଣ୍ଡ ୧୦ଟି ବଲ୍ ବାକିଥାଇ ୧୫୩ ରନର ବିଜୟ ଲକ୍ଷ୍ୟକୁ ହାସଲ କରିନେଇଥିଲା।
