ଲୋଇସିଂହା,୮।୭(ସୁଶାନ୍ତ ବାରିକ):ସମାଜର ତଳ ସ୍ତରର ଲୋକଙ୍କୁ ସରକାରୀ ଯୋଜନାରେ ପ୍ରାଥମିକତା ଦେବାକୁ ସରକାର ଗୁରୁତ୍ୱାରୋପ କରୁଛନ୍ତି। କିନ୍ତୁ ବଲାଙ୍ଗୀର ଜିଲା ଲୋଇସିଂହା ବ୍ଲକରେ ପ୍ରଧାନମନ୍ତ୍ରୀ ଆବାସ ଯୋଜନା ବାଟବଣା ହୋଇଥିବା ଅଭିଯୋଗ ହୋଇଛି। ବାଦିବାହାଲ ପଞ୍ଚାୟତ ଅଗଲାପାଲି ଗାଁର ଧନମାଳୀ ସାହୁ (୫୦)ଙ୍କ ପରିବାର ପକ୍କାଘର ପାଇବାକୁ ଯୋଗ୍ୟ ହୋଇଥିବା ସତ୍ତ୍ବେ ସେ ଆବାସ ଯୋଜନାରୁ ବଞ୍ଚତ୍ତ ହୋଇ ଦୁର୍ଦ୍ଦଶା ମଧ୍ୟରେ ଦିନ କାଟୁଛନ୍ତି। ଚଳିତବର୍ଷ ଆବାସ ଯୋଜନାରେ ପକ୍କାଘର ଯୋଗାଇ ଦେବାକୁ ପ୍ରଶାସନ ପକ୍ଷରୁ ସର୍ଭେ କରାଯାଇଥିଲା। ପଞ୍ଚାୟତ ଓ ବ୍ଲକରୁ କର୍ମଚାରୀ ଅଗଲାପାଲି ଗାଁର ଧନମାଳୀ ସାହୁଙ୍କ ଘରକୁ ଯାଇ ସର୍ଭେ ମଧ୍ୟ କରିଥିଲେ। କିନ୍ତୁ ନିକଟରେ ପ୍ରକାଶ ପାଇଥିବା ତାଲିକାରେ ତାଙ୍କ ନଁା ନାହିଁ। ଦୀର୍ଘ ବର୍ଷ ହେଲା ସେ ପକ୍କା ଘର ପାଇବାକୁ ବ୍ଲକ ପ୍ରଶାସନ ନିକଟରେ ଦାବି କରି ଆସୁଛନ୍ତି। ରାଜ୍ୟରେ ନୂତନ ସରକାର ଆସିବା ପରେ ଘର ମିଳିବା ନେଇ ସେ ଆଶାବାଦୀ ଥିଲେ। କିନ୍ତୁ ତାଲିକାରେ ନଁା ନ ଥିବାରୁ ତାଙ୍କ ପରିବାର ହତାଶ ହୋଇ ପଡିଛନ୍ତି। ଗାଁରେ ମାଙ୍କଡ ପଲ ଦୌରାତ୍ମ୍ୟ ଯୋଗୁ ତାଙ୍କ ଘର ଛପର ଭାଙ୍ଗି ନଷ୍ଟ ହୋଇଯାଇଛି। ଫଳରେ ବର୍ଷା ହେଲେ ଘରେ ପାଣି ଗଳୁଛି। ମରାମତି କରିବାକୁ ଆର୍ଥିକ ସମ୍ବଳ ନ ଥିବାରୁ ସ୍ତ୍ରୀ ଦେବକୀ ଓ ୩ ପିଲାଙ୍କ ସହ ବହୁ ଅସୁବିଧାରେ ରହିବାକୁ ପଡୁଛି ା ପଞ୍ଚାୟତଠାରୁ ଆରମ୍ଭ କରି ବ୍ଲକ କର୍ତ୍ତୃପକ୍ଷଙ୍କୁ ବାରମ୍ବାର ଜଣାଇବା ସତ୍ତ୍ୱେ କୌଣସି ସୁଫଳ ମିଳିନାହିଁି । ଏ ସମ୍ପର୍କରେ ସରପଞ୍ଚ ପ୍ରଶାନ୍ତ ତ୍ରିପାଠୀଙ୍କୁ ପଚାରିବାରେ ଅନେକ ଲୋକଙ୍କ ନାଁ ତାଲିକାରେ ନାହିଁ। ଏନେଇ ବ୍ଲକ ପ୍ରଶାସନର ଦୃଷ୍ଟିକୁ ଅଣାଯିବ ବୋଲି ସେ କହିଛନ୍ତି।