ଫୁଲବାଣୀ ଅଫିସ, ୧୨ା୨: ନୂତନ ପୋଲିସ ମହାନିର୍ଦ୍ଦେଶକ ସୁନୀଲ କୁମାର ବଂଶଲ ଶୁକ୍ରବାର କନ୍ଧମାଳ ଜିଲା ଗସ୍ତ କରି ମାଓବାଦୀ ଦମନ ଉପରେ ସମୀକ୍ଷା କରିଛନ୍ତି। ମାଓବାଦୀପ୍ରବଣ ୫ଟି ଜିଲାରେ ସେମାନଙ୍କୁ ଦମନ କରାଯିବା ଲାଗି ସ୍ବତନ୍ତ୍ର ରଣନୀତି ପ୍ରସ୍ତୁତ ହୋଇଛି। ହେଲେ ମାଓବାଦୀମାନେ ହିଂସା ଛାଡି ସମାଜର ମୁଖ୍ୟ ସ୍ରୋତରେ ସାମିଲ ହେବାକୁ ଡିଜିପି ଆହ୍ବାନ ଦେଇଛନ୍ତି। ଅନ୍ୟପକ୍ଷରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ସୁରୁଖୁରୁରେ ପରିଚାଳିତ ହେବ ବୋଲି ସେ କହିଛନ୍ତି।
ଡିଜିପି ବଂଶଲ ଅପରାହ୍ନ ସାଢ଼େ ୩ଟାରେ ଜିଲା ପୋଲିସ ରିଜର୍ଭ ପଡିଆରେ ହେଲିକପ୍ଟରରୁ ଓହ୍ଲାଇଥିଲେ। ସେଠାରୁ ଜିଲା ପୋଲିସ କାର୍ଯ୍ୟାଳୟକୁ ଆସି ୫ଟି ଜିଲାର ଏସ୍ପିଙ୍କ ସହ ଆଲୋଚନା କରିଥିଲେ। ଗତ ସପ୍ତାହକ ମଧ୍ୟରେ ମାଓବାଦୀମାନଙ୍କ ଦ୍ୱାରା ବିଚ୍ଛାଯାଇଥିବା ଲ୍ୟାଣ୍ଡମାଇନ ବିସ୍ଫୋରଣରେ ୨ ଜଣଙ୍କ ଜୀବନ ଯାଇଥିବାରୁ ତାହା ଉପରେ ଅଧିକ ଆଲୋଚନା କରିଥିଲେ। ମାଓବାଦୀ ରହୁଥିବା ସ୍ଥାନରେ କୋମ୍ବିଂକୁ ଜୋର୍ଦାର କରାଯିବା ସହ ଗୋଇନ୍ଦା ରିପୋର୍ଟକୁ ଡିଜିପି ପ୍ରାଧାନ୍ୟ ଦେଇଥିଲେ। ସମୀକ୍ଷା ବୈଠକରେ ଦକ୍ଷିଣାଞ୍ଚଳ ଡିଆଇଜି ସତ୍ୟବ୍ରତ ଭୋଇ, ଉତ୍ତରାଞ୍ଚଳ ଡିଆଇଜି ଦୀପକ କୁମାର, ରାଜ୍ୟ ଗୋଇନ୍ଦା ନିର୍ଦ୍ଦେଶକ ଲଳିତ କୁମାର ଦାସ, ସ୍ପେଶାଲ ଡିଜି ଏସ୍ଏପି ମନୋଜ କୁମାର ଛାବ୍ରା, ଆଇଜି ଅପରେଶନ ଅମିତାଭ ଠାକୁର, ଡିଆଇଜି ଏସ୍ଆଇଡବ୍ଲ୍ୟୁ ଅନିରୁଦ୍ଧ ସିଂ, ଆଇଜି ବିଏସ୍ଏଫ ଏସ୍. ବୁଦ୍ଧକୋଟି, କଳାହାଣ୍ଡି ଏସ୍ପି ଶ୍ରବଣ ବିବେକ, ବରଗଡ ଏସ୍ପି ରାହୁଲ ଜୈନ, ବଲାଙ୍ଗୀର ଏସ୍ପି ନୀତିନ କୁଶଲକର, ବୌଦ୍ଧ ଏସ୍ପି ଜ୍ଞାନରଞ୍ଜନ ମହାନ୍ତି, କନ୍ଧମାଳ ଏସ୍ପି ବିନୀତ ଅଗ୍ରୱାଲ, ବାଲିଗୁଡା ଏସ୍ଡିପିଓ ଜି.ରାଘବେନ୍ଦ୍ର ପ୍ରମୁଖ ଉପସ୍ଥିତ ଥିଲେ।
ସୂଚନାଯୋଗ୍ୟ, ଗତ ୮ ତାରିଖରେ ଫିରିଙ୍ଗିଆ ବ୍ଲକ ସାଡିଙ୍ଗିଆ ପଞ୍ଚାୟତ କିଆମୁଣ୍ଡା ଗ୍ରାମ ପାଖରେ ରାସ୍ତା ନିର୍ମାଣକୁ ବିରୋଧ କରି ମାଓବାଦୀମାନେ ଏକ ଠିକା ସଂସ୍ଥାର ଜେସିବି, ପୋକ୍ଲିନ ମେଶିନ ପୋଡିଦେଇଥିଲେ। ଉକ୍ତ ଅଞ୍ଚଳରେ ସେମାନେ ବିଛାଇଥିବା ଲ୍ୟାଣ୍ଡମାଇନ ବିସ୍ଫୋରଣରେ ୯ ତାରିଖରେ କିଆମୁଣ୍ଡା ଗ୍ରାମର ପିଙ୍କୁ କହଁରଙ୍କ ମୃତ୍ୟୁ ଘଟିଥିଲା। ସେହିପରି ଗତ ୫ ତାରିଖରେ କଳାହାଣ୍ଡି ଜିଲା ମ. ରାମପୁର ବ୍ଳକରେ ବିଛାଯାଇଥିବା ଲ୍ୟାଣ୍ଡମାଇନ ବିସ୍ଫୋରଣରେ ‘ଧରିତ୍ରୀ’ର ମୋହନଗିରି ଖବରଦାତା ରୋହିତ ବିଶ୍ୱାଳଙ୍କ ମୃତ୍ୟୁ ହୋଇଥିଲା।
